1 Nankuma, muomu vanatupuisa vaka vusunga ku mesho a Njambi kuhitila mu lutsilielo, kaha tuli mu ciyulo na Njambi hali Muene uetu Yesu Kilistu. 2 Hali ikeye natulingisa linga tuzivuke kavumbi ka Njambi, kaje tuli nakuyoyelamo hano. Kaha tulina kulihalesa ha kutsiliela kua vumpau vua Njambi! 3 Keti lika ovio vuno honi tuli nakulihalesa ha tuyando tuetu, muomu tunazivuka nguetu tuyando tusholola lukakateya, 4 kaha lukakateya lupuisa muntu linga apue ua vilinga viacili, kaha evi vilinga vineha kutsiliela. 5 Kaha kutsiliela eci kucasa kutuvuisa shuamua, muomu Njambi netila cizango cendi mu mitima yetu kuhitila muli Cimbembesi Uakulela, uje ikeye napu vuana vua Njambi kuli yetu.

6 Ha ntsimbu ije tuapuile tuvakakuzeya, Kilistu uatsililile vaka vupi ha ntsimbu ije yahanguile Njambi. 7 Cinapu cuma cacikalu cikuma kuuana muntu atava kutsila muka vusunga. Cipuevene nguavo casa kupua cacasi kuuana muntu uje atava kutsila muntu uacili. 8 Vuno honi Njambi nasholola cizango cendi cakama kuli yetu, omo ha ntsimbu ije tuapuile tuvaka vupi kaha Kilistu uatutsililile! 9 Vanatupuisa vaka vusunga ku mesho a Njambi muomu ya maninga endi, nankuma cikahiana cikuma Kilistu kutuamena ku vutenu vua Njambi! 10 Tuapuile vitozi va Njambi, vuno honi tunapu vavusamba vendi kuhitila ha kutsa ca munendi. Kaha honi muomu tunalikonekela na Njambi, tukovoka ha muono ua Kilistu! 11 Vuno honi keti evi lika houe, tujolela muomu ha vije vianalingi Njambi kuhitila muli Muene uetu Yesu Kilistu, uje hano honi natunehesa kulikonekela na Njambi.

12 Vupi vuezile hano ha mavu kuhitila mu muntu umolika, nankuma vupi vuendi vuanehele kutsa. Kaha kutsa kuezile ku miyati yoshe ya vantu muomu voshe vanalingi vupi. 13 Vupi vuakele ha mavu ntsimbu kanda vahane lishiko, vuno honi kuje kukuakele lishiko, vupi kuvavutandelako. 14 Vuno honi kuhuma ku ntsimbu ya Andama nakuheta ku ntsimbu ya Mosesa, kutsa cayulile ha vantu voshe, cipue hali vaje kuvalingile vupi ngue mualingile Andama omo kononokele lishiko lia Njambi.

Andama uapuile cimueso ca uje akeja. 15 Vuno honi vuana vuje kuvuapuile ngue vupi, muomu vuana vua Njambi kuvuapuile ngue vupi vua Andama houe. Muavusunga vene vantu vavengi vanatsi muomu vupi vua muntu umolika. Vuno honi kavumbi ka Njambi kakama cikuma, kaha na vuana vuendi vuakuhona kupangela vuje vuanahana ku vantu vavengi mu kavumbi ka muntu uje umolika, ikeye Yesu Kilistu vunapu naua vuakama cikuma. 16 Vuana vua Njambi kuvasa kuvusetekesa ngue vupi vua muntu umolika. Hanima ya vupi vumolika, kuezile "Kusompa," Vuno honi hanima ya vipi viavingi, kuneja vuana vuakuhona kupangela! 17 Muavusunga kuhitila mu vupi vua muntu umolika kutsa cayulile muomu ya uje muntu umolika. Vuno honi viuma vije vinasholoka vialingile uje muntu umolika, ikeye Yesu Kilistu vinahiana cikuma! Voshe vaje vanatambula kavumbi ka Njambi ka miaka yoshe ya yaye vanavapuisa vaka vusunga ku mesho endi vakayula mu muono kuhitila muli Kilistu.

18 Nankuma, ngue ha vupi vumolika vantu voshe vanavahisa, mu ngila eyi vene cipangi cimolika ca kulongua cinapatula vantu voshe nakuvahana muono. 19 Kaha ngue vantu voshe vavapuisile vaka vupi hakuhona kuononoka ca muntu umolika, mu ngila eyi vene voshe vakavapuisa vaka vusunga ku mesho a Njambi ha kuononoka ca muntu umolika.

20 Lishiko liasholokele linga vilinga via vupi vilane, vuno honi kuje kuvualanene vupi, kavumbi ka Njambi kalanene cikuma. 21 Nankuma, ngue omo vupi vuayulile ha kutsa, mukemo vene naua kavumbi ka Njambi kalinakuyula ha vusunga, nakututuamenena ku muono uayaye kuhitila muli Yesu Kilistu Muene uetu.