1 Tambuleni vaje vanazeye mu lutsilielo, vuno honi keti mulinge vimpata navo ha visinganieka viavo. 2 lutsilielo lua vantu vamo luvatavesa kulia nkala cuma, vuno honi vantu vamo vaje vanazeye mulutsilielo valia lika visapa sapa. 3 Muntu uje alia vioshe keti ayengule muntu uje ke kulia vioshe, kaha uje alia lika visapa sapa keti asompe uje alia nkala cuma, muomu Njambi ikeye namutavesa. 4 Nkuma yove iya honi linga usompe ngamba yambala? Kuvanga uje Muene yavo ikeye ahangula nga valinga muacili cipue vanahonoua. Muomu Muene yavo akavakolesa linga vase.

5 Vantu vamo vasinganieka ngue litangua limo lili naseho kupulakana matangua akuavo, kaha vakuavo naua vasinganieka nguavo matangua oshe apua hamolika. Muntu na muntu napande kukolesa mu visinganieka viendi ngeci viapua viacili. 6 Uoshe uje asingimika seho ya litangua limo alisingimika muomu ya kusingimika Muene, uoshe uje alia ntsitu cuma napande kuyilia mukusingimika Muene, muomu akahana kutsantsela kuli Njambi. Voshe vaje vaviana viakulia vimo vaviana kusingimika Muene, kaha atsentsela kuli Njambi. 7 Naumo uahi hali yetu aka liyoyela ikeye vavenia, kaha naumo uahi hali yetu akalitsila ikeye vavenia. 8 Nga tuyoya, tulina kuyoyela kuli Muene, kaha nga tutsa, tutsila kuli Muene. Nankuma, cipue tuyoya cipue tutsa, tunakundama kuli Muene. 9 Omo Kilistu uatsile, kaha uayoyele naua mukupua Muene ua vaka kuyoya na vatsi. 10 Nankuma, kuli yove ukali lika visapa sapa, nkuma vikahoni usompela mukueni? Kaha naua yove ukali vioshe, muomu vikahoni uyenguila mukueni? Yetu voshe tukemana ku mesho a Njambi na kutusompesa. 11 Muomu va visoneka mu visoneka nguavo,

"Muavusunga omo njiyoya,

vantu voshe vakatsikama ku mesho ange,

kaha vantu voshe vakalitavela nguavo yange Njambi."

12 Nankuma, yetu voshe, tukahandeka vietu vavenia ku mesho a Njambi.

13 Nankuma tueceleni kulisompa umo namukuavo. Vuno honi uapande kusinganieka linga keti uhake citsuntsuiso mu ngila ya mukueni cipue cakumuuisa. 14 Muvumo vuange muli Muene Yesu muavusunga njizivuka nguange kukuesi viakulia viakuhona kulela halika liavio, vuno honi nga munatsiliela linga viakulia vimo vinapu viakuhona kulela, nankuma, vipua viakuhona kulela kuli yeni. 15 Nga uvulumuina vakueni muomu ya cakulia, kuuesi nakumuesa cizango houe. Keti utave viakulia vije viulia vinongese muntu uje yatsililile Kilistu! 16 Nankuma, keti utave vije viunazivuka nguove viacili ku mesho ove linga vavipuise via vipi. 17 Muomu vumuene vua Njambi keti ngue vunapu vuakulia na kunua houe, vuno honi vunapu vua vusunga na ciyulo na kujolela mu Cimbembesi Uakulela. 18 Kaha nga mupangela Kilistu mu ngila eyi vene, muvuahelesa Njambi, kaha na vantu vamitsiliela naua.

19 Nankuma, ntsimbu yoshe tunapande kusinganieka ha viuma vineha ciyulo navije vikuasa kukolesa umo na mukuavo. 20 Keti unongese vipangi via Njambi muomu ha viakulia lika. Viakulia vioshe viapua viakulela, vuno honi keti muacili kulia cuma cimo cije casa kulingisa umo linga auile mu vupi. 21 Cuma cacili kulinga cinapu keti mulie ntsitu na kunua viniu, cipue kulinga cuma cimo cije citsuntsuisa mukueni. 22 Lutsilielo luje lu muli nalio lutulikeni hakati keni vavenia na Njambi, naku kuisula muntu uje kevu shuamua omo apanga cuma cimo cije namono nguendi cacili! 23 Vuno honi nga vakevo valina vimpata hali vije vialia, kaha Njambi navahisa laja omo vavilia, muomu vilinga viavo ku viakundamene ha lutsilielo. Muomu cuma coshe cije kucakundamene ha lutsilielo cinapu vupi.