1 Nkuma vikahoni tukahandeka? Nkuma tunapande kutualelelaho kuyoya mu vupi ngeci kavumbi ka Njambi kalane ndi? 2 Houe keti ngoco! Tunatsi ku vupi, nkuma vati naua tuasa kuyoyelamo? 3 Muomu muavusunga munazivuka ngueni omo vatumbuitikile hamo muli Kilistu Yesu, vatumbuitikile naua hamo namu kutsa cendi. 4 Kaha hakutumbuitika, tuatsile hamo nendi kaha vatutsindile hamo nendi, ngeci, ngue omo Kilistu vamusanguile ku vatsi na vumpau vua Ishe, ngeci netu tunapande kuyoyela mu muono uauha.

5 Muomu nga tunapu hamo nendi mu kutsa cendi, mu ngila eyi vene tukapua hamo nendi ha kusanguka cendi. 6 Kaha tuazivuka nguetu vuntu vuetu vualaja vavushukikile hamo na Kilistu ha cilindakano, ngeci muvila ua vupi vaunongese, ngeci keti tupue naua tu vandungo va vupi. 7 Kaha omo tutsa, vatupatula ku nzili ya vupi. 8 Muomu tunatsi na Kilistu, tutsiliela nguetu tukayoya naua hamo nendi. 9 Muomu tuazivuka nguetu Kilistu uasangukile ku vatsi kaha kakatsi naua houe, kutsa kucesi na nzili naua hali ikeye. 10 Kaha muomu ikeye uatsile, kakatsiho naua ku vupi, kaha honi alinakuyoyela muli Njambi. 11 Mu ngila eyi vene munapande kuvuluka ngueni munatsi ku vupi, vuno honi muli nakuyoya muli Njambi muli Kilistu Yesu.

12 Keti mutave vupi vuyule mu mivila yeni ije kuye kuyoya yaye, mukononoke mashungu auo. 13 Cipue vilio vieni keti muviecelele ku vupi mukuvipangesa mu viuma via vuhenge vuno honi likundikeni kuli Njambi, ngue vantu vaje vavahumisa ku kutsa nakuvaneha ku muono, kaha kundikeni vilio vieni vioshe kuli Njambi ngeci vavipangese mu viuma via vusunga. 14 Vupi kuvuapandele ku miyula houe, muomu kumuesi nakuyoya ku Lishiko lia Mosesa houe vuno honi, mu kavumbi ka Njambi.

15 Nkuma tukahandeka vikahoni? Nkuma tunapande kulinga vupi, muomu kutuesi ku Lishiko lia Mosesa vuno honi tuli mu kavumbi ka Njambi ndi? Houe keti ngoco.

16 Muavusunga muazivuka ngeci omo mulikundika yeni vavenia ngue vandungo kukuononoka muntu umo, munapu mu vandungo va uje muene imuli nakuononoka, cipue ku vupi vuje vuneha kutsa, cipue hakuononoka, kuje kuneha kumipuisa vaka vusunga. 17 Vuno honi tutsantsela kuli Njambi! Muomu cipue laja muapuile mu vandungo va vupi, muononoka na mitima yeni yoshe mu vusunga vuli mu vilongesa vije vimuatambuile. 18 Kaha vamipatuile ku vupi, munapu vandungo va vusunga. 19 (Njilinakulikuasesa mezi amasi ku akuata muomu kuzeya ca mitima yeni ya vuntu) Kaha ha ntsimbu imo mua likundikile vutuntu kupua vandungo va viuma via mazilo na kapenga. Kaha mu ngila eyi vene hano vene munafuila kulikundika muva mutuntu kupua vandungo va vusunga ngeci mulinge viuma via kulela. 20 Omo muapuile vandungo va vupi, vusunga kuvuakele nakumituamenena. 21 Nkuma vikahoni muauaneneho hakulinga viuma vije vimuli nakuvuila shuamua? Fueto ya viuma vije inapu kutsa! 22 Vuno honi vanamipatula ku vupi, kaha munapu vandungo va Njambi linga mulele kaha mukale na muono uayaye. 23 Muomu fueto ya vupi inapu kutsa, vuno honi vuana vua Njambi vunapu muono uayaye muli Kilistu Yesu Muene uetu.