1 Kaha njihula nguange, nkuma Njambi naviana vantu vendi ndi? Houe keti ngoco! Nange vene njapua njika Isaleli, mutekuluila ua Avilahama, uaku muyati ua Mbenjemani. 2 Njambi kavianene vantu vendi, vaje vahanguile kuhuma hambangelo. Yeni muazivuka ngue muvanasoneka mu visoneka mu mutambela uje uhandeka hali Eliya uje ualiniengele kuli Njambi hali vaka Isaleli nguendi, 3 "Muene, vanatsihi tunanguizi vove, kaha vanasihula mitula yove, yange lika njinasalaho kaha naua vali na kutonda kunjitsiha." 4 Nkuma Njambi uamukumbuluile nguendi vika? "Njalitumbikila vamala vakupua makulukazi atanu na avali (7,000) vaje kanda valemese kamponia ka Mbale." 5 Nankuma, cinapu cuma cimo vene, vuavuno ku civunga ca cindende ca vantu vanasalaho vaje vahanguile Njambi muomu ya kavumbi kendi. 6 Kuhangula cendi cinajendamena ha kavumbi kendi, keti ngue ha vije vivanalingi houe. Muomu nga kuhangula ca Njambi caya ngue kuli vije vivanalingi vantu, ngue kavumbi kendi kukapuile kavusunga. 7 Nkuma vatihoni? Vantu Vaisaleli kuvauanene cije vakele nakutonda. Capuile lika civunga cacindende ca vantu vaje vahanguile Njambi vakevo vaciuanene, kaha vaje vasaleleho vapuile tusinda matuitui kukusana ca Njambi. 8 Ngue muvanasoneka mu visoneka nguavo, "Njambi navahana cimbembesi cakuhona kulitavasana, na mesho akuhona kumona na matuitui akuhona kuvua nakuheta kuli litangua lialelo." 9 Kaha Ndaviti ahandeka nguendi,

"Viuano viavo vipue miheto yavo, kaha vatsemo

vanapande kuua, vanapande kuvazangamesa!

10 Mesho avo apue a vupuputua linga keti vamone,

kaha vakotame miongo yavo mu tuyando tuavo ntsimbu yoshe."

11 Nankuma njihula nguange, omo Vayunda vatsuntsukile, nkuma vauile nakunonga ndi? Houe keti ngoco! Muomu valingile vupi, kuovoka kuneja kuli vaje keti Vayunda linga Vayunda vavovuile cipululu. 12 Kaha vupi vua Vayunda vuanehele vikuisulo viakama ha mavu, kaha kuhutua kuavo kua mu Cimbembesi kuanehele vikuisulo viakama kuli vaje keti Vayunda. Nkuma cikafua vati kulana ca vikuisulo nga vayunda vavengi vakalivuezelela.

13 Njili nakuhandeka honi kuli yeni vaje keti Vayunda. Hakupua njikanganda ua vaje keti Vayunda njilinakulihalesa mu vipangi viange. 14 Hamo njasa kulingisa vantu vaku muyati uange cipululu, linga njase kuovolako vamo. 15 Nga kuvaviana cavo canehele kulikonekela kuvaka mavu. Nkuma cikafua vatihoni nga vanavatambula? Cikapua ngue vanahana muono ku vatsi!

16 Nga mbazuvuila yakulivanga ya mbolo vaihana kuli Njambi, nankuma, namukasha uoshe uamutuntu unapu uendi naua, nga mizi ya muti vaikombelela kuli Njambi, kaha na mintango naua inapu yendi. 17 Vuno honi nga mintango imo ya ku muti ya olive yakukuna vanaihojolako, kaha muntango ua olive ua mu musenge vanainungiyako. Kaha yeni keti Vayunda munapu ngue muti uamu musenge ua olive, kaha honi mulipangela cimbembesi ca vuyoye vua Vayunda. 18 Nankuma, kumuapandele kuyengula vaje vavahojuele ngue mintango. Nkuma vatihoni muasa kulihalesa? Yeni munapu lika mu mintango, kumue kukuata mizi, vuno honi mizi ikeyo ili nakumikuata.

19 Vuno honi yeni muhandeka ngueni, "Eyo, muomu ije mintango vaihojuele ngeci vanjinungileko yange." 20 Eci cinapu ca vusunga. Vavahojuele muomu kuvatsilielele, vuno honi yeni muatumamene mu cihela ceni muomu munatsiliela. Vuno honi keti mulihalese ha visinganieka evi, munapande kulikolesa kaha mukale na liova. 21 Nga Njambi katetela Vayunda vaje vanapu ngue mintango ya cisemua, nkuma musinganieka ngueni akamitetela ndi? 22 Hano tumona ngozi ya Njambi nakukaluua cendi. Ikeye napu uakukaluua kuli vaje vanau, vuno honi napu muka ngozi kuli yeni nga mutualelelaho mu ngozi yendi. Vuno honi nga kumulingi ngoco, kaha neni naua vakamihojolako. 23 Nga Vayunda vakaseza kuhona kutsiliela cavo, kaha vaka vahiluisila naua mu mutambela muje muvakele, muomu Njambi asa kulinga ngacije naua. 24 Yeni keti Vayunda munapu ngue muntango ua muti ua olive uamu musenge uje uvanahojola, kaha ngue keti mucifua cauo, vuno honi vanaunungila ku muti ua olive uakukuna. Vayunda vanapu ngue uje muti uakukuna, kaha cikapua cacasi cikuma kuli Njambi kunungilako eyi mintango ivanahojuele ku muti uayo naua.

25 Vamuanetu kuli vusunga vua vushueke vuje njitonda linga muzivuke, muomu vukamivindika kusinganieka ngueni munapu vakuzangama. Eci kukaluua ca mitima yeni vantu Vaisaleli keti ngue ku miaka yoshe houe, vuno honi cikakalako mu kantsimbu lika kuvanga noho vaje keti Vayunda vanapumo kuija kuli Njambi. 26 Omu mukemo vantu Vaisaleli voshe muva kavamena. Ngue muvanasoneka mu visoneka nguavo,

"Muyoyesi akahuma ku Siyone,

kaha akahumisa vupi vuoshe kuvatekuluila va Yakomba.

27 Kaha njikalitavasana navo litavasano

eli omo njikahumisa vupi vuavo."

28 Muomu vanaviana Muzimbu Uacili, kaha ava Vayunda vanapu vitozi va Njambi muomu yeni keti Vayunda. Vuno honi muomu ya kuhangula ca Njambi vanapu va vusamba vendi muomu ya vakukuluila vavo. 29 Muomu Njambi kekutengulula visinganieka viendi kuli vaje nahangula na kukuisula. 30 Ngue hali yeni keti Vayunda, kumuononokele Njambi kuntsenkulu, vuno honi vuavuno munatambula cikeketima ca Njambi muomu yakuhona kuononoka ca Vayunda. 31 Mucifua cimo vene, muomu ya cikeketima cimunatambula, Vayunda honi kuvesi nakuononoka Njambi linga navakevo vatambule cikeketima ca Njambi. 32 Muomu Njambi napuisa vantu voshe vinzinda vakuhona kuononoka, linga amuese cikeketima kuli voshe.

33 Vufuko vua Njambi vuapua vuavuingi cikuma! Kuzivuka cendi na mana endi viapua viakulova cikuma! "Nkuma iya honi asa kulumbununa matumbe endi?" 34 Ngue muvanasoneka mu visoneka nguavo,

"Nkuma iya honi azivuka mana a Muene?

Nkuma iya honi asa kumunangula?"

35 "Cipue nkuma iya honi uamuhanene cuma cimo

linga amuhiluisile fueto?"

36 Muomu ikeye uatangele viuma vioshe, kaha viuma vioshe vilinakuyoya muli ikeye na hali ikeye. Kuli Njambi kukale vumpau ku miaka yoshe ya yaye! Ameni.