1 Nankuma, vamuanetu muomu cikeketima ca Njambi cakama cikuma kuli yetu, njimilambelela nguange, lihaneni yeni vavenia kuli Njambi ngue nkombelo yakuyoya, likundikeni ku vipangi viendi na kumuvuahelesa. Eci cikeco kulemesa ca vusunga cije munapande kulinga. 2 Keti mulipuise ngue mu vantu vahano ha mavu, vuno honi eceleni Njambi atengulule visinganieka via mu mitima yeni. Ambahoni mukazivuke cizango ca Njambi, vije viacili nevi vimuvuahelesa nevi via kusungama.

3 Muomu njinatambula vuana vua kavumbi ka Njambi, njihandeka kuli yeni voshe nguange, keti musinganieke yeni vavenia kupua vakama cikuma kupulakana muje mumunafu. Vuno honi, munapande kulikehesa muvisinganieka vieni, lihiluleni yeni vavenia ngue ku lutsilielo lueni luje lua namihana Njambi. 4 Tulina vilio viavingi mu muvila umo, kaha cimo na cimo cili navipangi viaco. 5 Mucifua cimo vene, cipue tunapu tuvavengi, tunapu muvila umolika muli Kilistu kaha yetu voshe vanatunungu ku vilio via muvila umolika. 6 Nankuma, tunapande kupangesa vuana vuetu vuakuliseza seza ngue ku kavumbi ka Njambi, kaje natuhana. Nga vuana vuetu vunapu vuakuambulula vunanguizi, kaha tunapande kuambulula vunanguizi kuya ngue na lutsilielo luetu tuli naluo, 7 nga vuakupangela, kaha tunapande kupanga vene, nga vuakulongesa, tulongeseni vene, 8 nga vuakukolesa vakuetu, kaha tunapande kulinga ngoco vene. Uoshe uje muka kuhana vakuavo napande kuhana na mutima umo, kaha uje uoshe muka nzili napande kupanga cikuma na nzili, uoshe uje amuesa ngozi kuli vakuavo napande kucilinga na kuvuahelela.

9 Cizango cinapande kutungukua. Zindeni viuma vioshe vije vinapu viavipi, kakateyeni kuli vije viacili. 10 Lizangeni umo na mukuavo, kaha lisingimikeni umo na mukuavo. 11 Nankuma pangeni cikuma na nzili keti mupue vilenda. Pangeleni Muene nakulihakako na mutima uoshe. 12 Vuaheleleni mukutsiliela ceni, pueni vaka kusimpa mu tuyando tueni, kaha lombeleni ntsimbu yoshe. 13 Lipangezeleni vije mulinavio navakueni vaka Kilistu vaje vana honoua, tambuleni vangenzi mu vinjivo vieni.

14 Vezikiseni vaje valina kumiyandesa, eyo, vavezikiseni, kaha keti muvasinge houe. 15 Vuaheleleni navaje valina kuvuahelela, lileni navaje vali nakulila. 16 Yoyeni mu litavasano umo na mukuavo. Keti mulihalese, vuno honi likeheseni mu vipangi. Keti musinganieke yeni vavenia ngue munapu vaka kuzangama.

17 Nga umo nakupihisila, keti umuhiluisile vupi vuendi naua. Lingeni viacili ku mesho a vantu voshe. 18 Lingeni viuma vioshe ngue mu mumuhasela nakuyoya mu ciyulo ku muntu na muntu. 19 Keti muhiluisile vupi ku vupi, vuno honi eceleni vukalu vua Njambi vucilinge. Muomu visoneka vihandeka nguavio, "Yange njikahiluisila vupi, njikavahiluisila fueto yavo, muanahandeka Muene." 20 Vuno honi ngue muvanasoneka mu visoneka nguavo, "Nga citozi cove ali na njala, muhane viakulia, nga ali nampuila, muhane mema anue, muomu hakulinga eci ulina kumulingisa ngeci ovue shuamua." 21 Keti mutave vupi vumihiane, vuno honi hianeni vupi na viuma viacili.