1 Muntu uoshe napande kuononoka kuli vaka nzili yakama, muomu naumo uahi asa kushika kuvanga Njambi namuhangula, kaha vaka nzili yakama vaje valiko Njambi ikeye navahakaho. 2 Nankuma, uoshe uje aluisa vaka nzili yakama kaha naluisa na vije via nashiki Njambi, kaha uoshe alinga evi alinehela kusompa ikeye vavenia. 3 Muomu vaka kulinga muacili kuvasa kuvuila liova vaka kuyula, vuno honi kuvanga vaje valinga mua mupi. Nkuma yove kuvuila liova muntu uje alina nzili yakama ndi? Nankuma linga muacili kaha na ikeye akakushangazala, 4 muomu vanapu vangamba va Njambi valina kumipangela viacili. Vuno honi nga ulinga mua mupi, kaha vovuile liova, muomu nzili yavo yaku kuzangamesa inapu ya vusunga. Vakevo vanapu vangamba va Njambi, kaha valina kuneha kuzangamesa ca Njambi kuli vaje valinga mua mupi. 5 Nankuma ha cuma eci munapande kuononoka ku vaka nzili yakama, keti ngue hakuzangamesa ca Njambi lika houe, vuno honi naua muomu ha visinganieka viacili.

6 Eci cikeco naua mulina kufuetela lisimu, muomu vaka nzili yakama vali nakupangela Njambi nga vashulisisa vipangi viavo. 7 Nankuma fueteni vije vinapu viavo, vafueteni lisimu lieni neli lia ku vufuko vueni, kaha mueseni kasingimiko kuli ava voshe.

8 Keti mukale nalikongo kuli umo na mukuavo, likongo munapande kukala nalio linapande kulizanga umo namukuavo. Uoshe uje azanga mukuavo kaha nononoka lishiko. 9 Mashiko nguauo, "Keti ulinge vupangala, keti utsihe, keti uive, keti uliveyele cuma camukueni." Kaha vioshe evi, navieka naua, vanavipuisa lishiko limolika nguavo, "Zanga mukueni ngue mu ualizanga yove vavenia." 10 Nga uzanga mukueni, kaha ku ukasa kumulinga mua mupi, nankuma, kuzanga, cikeco kuononoka lishiko lia Mosesa lioshe.

11 Yeni munapande kulinga ngacijevene, muomu munazivuka ngueni ntsimbu inahete ya kuhinduka mutulo. Muomu ntsimbu ya kutuovola ilimuyehi kupulakana muje muyakele omo tuatsilielele ha kulivanga. 12 Vutsiki vuavuno vuhua, litangua vuavuno lituhuka. Tuyeni tulikele kulinga viuma vije viakundama ku milima, kaha tuambateni vitua viakulua navio mu mutania. 13 Tuendeni muacili, ngue vantu vaje valina kuyoya muceke ca mutania, keti kulinga kalua ka kuviuano cipue kupenda, cipue kulinga vupangala, cipue lizangamena, cipue kulinga luozi cipue cipululu. 14 Vuno honi zaleni vitua via Muene Yesu Kilistu, keti muvuilile naua cifua ceni ca vuntu na kukavangeya mashungu aco houe.