1 Nkuma Vayunda vanapulakana vaje keti Vayunda ndi? Cipue nkuma kulovoka cili na seho ndi? 2 Cuma cakama cikuma mu vingila vioshe! Mu cihela cakulivanga, Njambi uakundikile lizi liendi kuli Vayunda. 3 Vuno honi vatihoni nga vamo vavo kuvapuile vakulongua? Nkuma eci cilumbunuka ngue Njambi keti muka kulongua ndi? 4 Houe keti ngoco! Njambi napande kupua ua kulongua, cipue vantu voshe vapua vaka makuli. Ngue muvanavisoneka mu visoneka nguavo,

"Unapande kusholoka uakulongua omo uhandeka,

unapande kuhiana mulonga uove omo vakusompa."

5 Vuno honi nga vilinga vietu viakupihia vije vituli nakulinga visholola muacili vusunga vua Njambi, nkuma tuasa kuhandeka nguetu Njambi akalingi muamupi omo atuhana kashitiko ndi? (Njilinakuhandeka mucifua ca vuntu) 6 Houe keti ngoco! Nga Njambi keti ua kulongua, nkuma vatihoni asompa vaka mavu?

7 Vuno honi nga makuli ange amuesa vumpau vua Njambi hakusholola vusunga vuendi muacili, muomu vika naua hanga vacinjisompa ngue muka vupi? 8 Nkuma vikahoni kumuhandekela ngueni, "Tulingeni vupi linga vucili vusholoke?" Cilivene, vantu vamo vali nakunjishaula nakunjivangeya nguavo njinahandeka cuma eci! Vakavahisa ngue mucinapandelamo.

9 Nkuma vatihoni yetu Vayunda tunapu tuvacili kupulaka Vangelengu ndi? Keti ngoco houe! Muomu njamilekele laja nguange Vayunda na Vangelengu voshe vali mu nzili ya vupi. 10 Ngue muvanavisoneka mu visoneka nguavo,

"Naumo uahi muka vusunga,

11 naumo uahi ali na mana

cipue muka kulemesa Njambi.

12 Voshe vanatenguluka kuhuma kuli Njambi,

voshe vanalingi vupi,

naumo uahi akalingi cuma ca vusunga.

13 Mezi avo anashulu na vusungu vua makuli,

vindaka viavo vihandeka makuli,

tunua tuavo tuhandeka mezi akupihia ngue vusungu vua linoka.

14 Handekesi yavo inashulu na visingo via kushasha.

15 Vakazambula kuvulumuna na kutsiha vakuavo,

16 mu vingila viavo muli kupihisa na kunongesa.

17 Ku vazivuka ngila ya ciyulo,

18 kaha na mu mesho avo kuvekuvuila Njambi liova."

19 Honi tuazivuka ngeci viuma vioshe mu lishiko viakundama kuli vaje vali mu lishiko, mukuvindika kulikonela coshe ca vantu nakuneha vantu voshe kukusompa ca Njambi. 20 Muomu naumo uahi napu muka vusunga ku mesho a Njambi mukulinga vije lishiko litonda, vipangi via lishiko vikevio vinapu kuleka yetu linga tuzivuke nguetu tu vaka vupi.

21 Vuno honi ngila ya Njambi yakupuisa vantu linga vapue vaka vusunga ku mesho endi inasholoka. Kuyesi nacimo na lishiko, cipue lishiko lia Mosesa na tunanguizi vahanene vukaleho hali lishiko eli. 22 Vusunga vua Njambi kuhitila mu lutsilielo muli Yesu Kilistu kuli voshe vaka kutsiliela. Muomu kukuesi kahangu kahi, 23 vantu voshe vanalingi vupi, kaha vakele kulahako na vumpau vua Njambi. 24 Vuno honi vana vapuisa vaka vusunga kuli Njambi ha vuana vua kavumbi ka Njambi kuhitila muli Yesu Kilistu, uje navapatula. 25 Njambi uamupuisile nkombelo, linga ha nkombelo ya kutsa cendi akapue cihingo ca kukonekela vupi vua vantu halutsilielo luavo muli ikeye. Njambi ualingile cuma eci mukumuesa ngeci napu muka vusunga. Ha kulivanga Njambi uasimpile, kaha kahakeleko mutima ku vupi vua vantu, 26 vuno honi ku ntsimbu ino alinakusompa vupi vua vantu, mukumuesa vusunga vuendi. Mu ngila eyi vene Njambi alinakumuesa ngeci ikeye vavenia napu muka vusunga kaha muntu uoshe uje atsiliela muli Yesu Njambi amupuisa muka vusunga. 27 Nkuma honi kuli naua tukalishasha? houe vene! Nkuma muomu ya kuononoka lishiko ndi? houe, vuno honi muomu tutsiliela. 28 Muomu tukayongola nguetu muntu vamupuisa muka vusunga ku mesho a Njambi ha lutsilielo lika, vuno honi keti mukulinga vije lishiko vilishika. 29 Cipue Njambi nkuma uapua Njambi ua Vayunda lika ndi? Nkuma kapuile naua Njambi ua vaje keti Vayunda ndi? Cilivene uapua Njambi uavoshe. 30 Muomu Njambi uapua umolika, kaha akapuisa Vayunda kupua vaka vusunga ku mesho endi ha lutsilielo luavo nakupuisa naua vaje keti Vayunda navakevo linga vapue va vusunga kuhitila mu lutsilielo luavo. 31 Nkuma eci cinalumbunuka ngeci halutsilielo tunaviana lishiko ndi? Houe keti ngoco, vuno honi tulina kukolesa lishiko.