1 Njikundika muanetu uampuevo Fuivi kuli yeni, uje muka kupangela cikungulukilo ca ku Senkili. 2 Mutambuleni mu lizina lia Muene ngue muje muvakalingi vantu va Njambi, kaha mukuaseni vioshe vije atonda kuli yeni, muomu ikeye uapua kavusamba uacili ku vantu vavengi na kuli yange naua.

3 Vihindu kuli Pilisila na Akuila, vaje vaka kupanga nange mu vipangi via Kilistu Yesu, 4 vakevo vecelele muono uavo muomu yange. Njatsantsela, keti yange lika, vuno honi naua na vikungulukilo vioshe via vaje keti Vayunda. 5 Vihindu naua ku cikungulukilo ca vaje vakakungulukila mu njivo yavo.

Vihindu kuli kavusamba uange Epaenetase, uje uapuile yala uakulivanga kutsiliela muli Kilistu mu nganda ya Asiya. 6 Vihindu kuli Maliya, uje uamipangelele cikuma. 7 Vihindu naua kuli Andolonikase na Njuniyase, vakuetu Vayunda vaje mutuakelele mu kamenga, vapua vakutsimana hakati ka tunganda, kaha vapuile vaka Kilistu ntsimbu kanda yange njitsiliele.

8 Vihindu viange kuli Ampiliatase, kavusamba uange ha kulitombola muli Muene. 9 Vihindu naua kuli Ambanase, mukuetu mu vipangi via Kilistu, na kuli Sitacise kavusamba uange ua cizango. 10 Vihindu kuli Apelese, uje kulongua cendi muli Kilistu vanacishangala. Vihindu kuli vaje vanakundama ku ntanga ya Alisitombolase. 11 Vihindu kuli Helondione, mukuetu Kayunda, na kuli vaka Kilistu mu ntanga ya Nasisase.

12 Vihindu viange kuli Talafaena na kuli Talafosa vaje vapanga mu vipangi via Muene, na kuli kavusamba uange Pelesise, uje napanga cikuma vipangi via Muene. 13 Vihindu kuli Lufase, uje uakuhangula muli Muene, hamo na vaina vaje vakele nakunjiniunga ngue nji munavo. 14 Vihindu kuli Asinikilitase na Felengone na Helemese na Patolombase na Helemase na vamuanetu voshe vaje vali hamo navo. 15 Vihindu kuli Filolongese na Njuniyase na Neliase na munaina uampuevo, na kuli Olimpase na ku vantu voshe va Njambi vaje vali hamo navo.

16 Kaha lihinduiseni umo na mukuavo nakulitsemba cakulela. Vikungulukilo vioshe via Kilistu vanamimeneka.

17 Njimilomba vamuanetu nguange, zangameni kuli vaje vaneha kulihangununa nakutanganesa lutsilielo lua vantu nakuluisa vilongesa vije vimuatambuile. Vashondolokeni! 18 Kaha omo voshe vaje valinga viuma evi, kuvesi nakupangela Kilistu Muene uetu vuno honi vali nakupangela lika mazimo avo, kaha na mezi avo akukokueya na handekesi yavo yakuzembeleka vakuise vantu vakuhona mulonga.

19 Omo vantu voshe vanovu kulongua ceni ku Muzimbu Uacili kaha ha cuma eci njili nakuvuahelela cikuma hali yeni. Njitonda nguange mupue vaka mana ku viuma viacili, vuno honi pueni vakakuhona mulonga ku viuma via vupi. 20 Kaha Njambi ua ciyulo, vuavuno akatsena Satana muintsi ya viliato viendi.

Kavumbi ka Muene uetu Yesu kakale hamo neni.

21 Mukuetu Timateo muvipangi, alinakumihana vihindu, na Lusiyasi na Njasone na Sosipata vakuetu Vayunda.

22 Kaha yange Teshase muka kusoneka mukanda ou njamitumu vihindu muli Muene.

23 Ngayase, muka kunjijumbula, uje mu njivo yendi cikungulukilo cikaliuanena, na Elasitase uje mukakutulika cikuama ca nganda, na muanetu Kuatase, vanatumu vihindu viavo kuli yeni. 24 Ciyulo ca Muene Yesu Kilistu cikale neni. Ameni

25 Nankuma vumpau vukale kuli Njambi! Ikeye asa kumipangesa linga mukolese mu lutsilielo lueni, kuya ku Muzimbu Uacili njikambulula via Yesu Kilistu, nakuya kukusholola ca vusunga vuakushueka vuje vuvashuekele hume laja. 26 Vuno honi vuje vusunga vanavunehe hambanza mutania muelu muvisoneka via tunanguizi va Njambi, nakushika ca Njambi ua miaka yoshe vana vuzivukisa kuli vaje keti Vayunda voshe, linga voshe vatsiliele nakuononoka.

27 Kuli Njambi umo lika uje ua mana oshe, kukale vumpau kuhitila muli Yesu Kilistu ku miaka yoshe ya yaye! Ameni.