1 Yange Paulu uje ivasanene ku cizango ca Njambi kupua kanganda ua Kilistu Yesu, njili na muanetu Sosetane.

2 Njili nakusonekela ku cikungulukilo ca Njambi cije cili mu Kolinte, kuli vaje vanakundama kuli Kilistu Yesu, vaje vavasanene nguavo vantu va kulela va Njambi hamo na voshe vaje vali mu mitambela yoshe ije ikasana ha lizina lia Muene Yesu Kilistu, ikeye Muene uavo na Muene uetu.

3 Kavumbi kakaleneni na ciyulo kuhuminina kuli Njambi Tatetu na Muene Yesu Kilistu.

4 Ntsimbu yoshe njikahana citsantsela kuli Njambi, hali yeni muomu ya kavumbi ka Njambi kaje kavamihanene yeni muli Kilistu Yesu, 5 linga mu viuma vioshe mupue vakupita muli ikeye na vihandeka vioshe na mana oshe, 6 cipue vene vukaleho vua Kilistu vanavushulisisa hali yeni, 7 ngeci keti muhonoue cimo mu vuana vua Cimbembesi, omo muli nakuvandamena cikuma kusholoka ca Muene uetu Yesu Kilistu, 8 ikeye uje akamikolesa noho na kumamanusuilo, linga keti vaka miuane na mulonga ha litangua lia Muene uetu Yesu Kilistu. 9 Njambi uapua ua kulongua uje muli ikeye vamisanene kupua vumo na munendi Yesu Kilistu Muene uetu.

10 Njimilambelela yeni vamuenetu, mu lizina lia Muene uetu Yesu Kilistu, ngeci yeni muva voshe mu litavasane kaha naua linga keti hakale mahangununo hakati keni, vuno honi linga mu litombole mu mana amo na viyongola vimo. 11 Muomu vantu vaku Koloe vanacambulula kuli yange nguavo kuli kulicokota hakati keni vamuanetu. 12 Njilumbununa ngeci umo na umo ueni ahandeka nguendi, "Njakundama kuli Paulu," cipue nguendi, "Njakundama kuli Apolo," cipue nguendi "Njakundama kuli Kefase," cipue nguendi "Njakundama kuli Kilistu." 13 Nkuma Kilistu vamutepe ndi? Nkuma Paulu vamushukikile muomu yeni ndi? Cipue nkuma vamimbuitikile mu lizina lia Paulu ndi? 14 Njitsantsela ngeci kunjambuitikile cipue umo kuli yeni kuvanga lika Kilisipase na Ngayase, 15 linga naumo uahi ase kuhandeka nguendi vamumbuitikile muli lizina liange. 16 (Njambuitikile naua ntanga ya Setefanase. Kuhuma hali ava kunjizivuka indi njambuitikileho umo naua) 17 Muomu Kilistu kanjitumine mukumbuitika vuno honi mukuambulula Muzimbu Uacili, keti na mana a vuntu, linga cilindakano ca Kilistu keti vacihuise nzili yaco.

18 Muomu lizi lia cilindakano linapu lia vulema kuli vaje vananongo, vuno honi kuli yetu vaje vavanovola linapu nzili ya Njambi. 19 Muomu vanacisoneka nguavo, "Njikanongesa mana a vaka kuzangama, nakuvuisisa ca vaka kulilongesa njikacipihisa." 20 Nkuma ali kuli yala ua mana? Nkuma ali kuli mulongisi? Nkuma ali kuli muka kulilongesa ua matangua ano? Nkuma Njambi kalingile mana a mavu ku apuisa vulema ndi? 21 Hume laja mu mana a Njambi, mavu kazivukile Njambi kuhitila mu mana auo, mavu avuahelesele Njambi kuhitila mu viuma via ngoco vije vituambuluile mukuovola vaje vaka kutsiliela. 22 Muomu Vayunda vakatondo vimueso kaha va Ngelengu vakatondo mana, 23 vuno honi yetu tuambulula kushukika ca Kilistu ha cilindakano, livue lia kutsuntsuka kuli Vayunda kaha liapua lia vulema kuli vaje keti Vayunda, 24 vuno honi kuli vaje vavanasana voshe Vayunda na va Ngelengu, Kilistu ikeye nzili ya Njambi na mana a Njambi. 25 Muomu vulema vua Njambi vunapu vua mana kupulakana vantu, na kuzeya ca Njambi cinapu ca nzili kupulakana vantu. 26 Vamuanetu singaniekeni muje mumuafuile omo vamisanene, keti vuingi vueni vuoshe muapuile vaka mana kuya mucinafuilamo hano ha mavu, keti voshe vapuile va nzili, keti vuingi vuavo vasemukile muacili. 27 Vuno honi Njambi uahanguile via vulema ha mavu linga apayese vaka mana, naua Njambi uahanguile vije via kuzeya hano ha mavu linga apayese vaka nzili, 28 Njambi uahanguile vije via kulikehesa na vije viakusembulula ha mavu, na viuma vije kuviesiko, linga ahonouese viuma vije vivanamono nguavo vili naseho kupua viangoco, 29 linga keti muntu alihalese ku mesho a Njambi. 30 Ikeye ntsina ya vuyoye vueni muli Kilistu Yesu, uje Njambi yanapuisa mana etu, vusunga vuetu, nakulela cetu na vuovoke vuetu, 31 nankuma ngue muje muvanacisoneka nguavo, "Eceleni uoshe uje alihalesa, alihalesele muli Muene."