1 Vamuanetu omo njezile kuli yeni, kunjezile nakuambulula kuli yeni vukaleho vua Njambi muku likuasesa mezi akama cipue mana. 2 Muomu kunjatondele kuzivuka cipue cimo cahi hakati keni kuvanga lika Yesu Kilistu uje ivashukikile ha cilindakano. 3 Kaha njakele neni mu kuzeya na mu liova cikuma na kujaja, 4 kaha vihandeka viange na muzimbu uange kuviakele na mezi avutongue a mana, vuno honi na cimueso ca Cimbembesi ua nzili, 5 ngeci linga lutsilielo lueni keti lukundame mu mana a vantu vuno honi mu nzili ya Njambi.

6 Honi kuli vaje vanakolo mu mana tukahandeka navo mu mana, cipue vene keti mana a ntsimbu ino cipue a vaka kuyula va ntsimbu ino, vaje nzili yavo ikahua. 7 Vuno honi tukahandeka vushueke na mana a Njambi akulishueka, aje Njambi nahangula muomu ya vumpau vuetu tele ntsimbu kanda mavu aputuke. 8 Na umo uahi hali vaka kuyula va ntsimbu ino vovuisisile eci, nga vovuisisile ngue kuvashukikile Muene ua vumpau. 9 Vuno honi ngue muje muvana visoneka mu visoneka nguavo,

"Cije lisho ku liamuene cipue lituitui kulievuile,

cipue mutima ua muntu ku uasinganiekele nguavo cikalingiua,

vikevio vije Njambi navuahesela vaje vamuzanga,"

10 Njambi na tusholuela laja kuhitila mu Cimbembesi cendi. Muomu Cimbembesi akatondo viuma vioshe, cipue vene viuma viakulova via Njambi. 11 Nkuma keti cimbembesi ua muntu uje ali muli ikeye, ikeye azivuka visinganieka viendi ndi? Nankuma mu ngila imo vene naumo uahi azivuka mana a Njambi kuvanga lika Cimbembesi ua Njambi. 12 Honi kutuatambuile cimbembesi ua mavu, vuno honi Cimbembesi uje ahuminina kuli Njambi, linga tuvuisise vuana vuanatuhana Njambi.

13 Tuahandeka evi mu mezi aje keti akutulongesa ku mana a vuntu vuno honi ku mezi aje atualilongesele kuli Cimbembesi, kulumbununa vusunga vua ku cimbembesi kuli vaje vali na Cimbembesi. 14 Muntu uje uakuhona cimbembesi kekutambula mavuana a Cimbembesi ua Njambi, muomu anapu akuhona seho kuli ikeye, kaha kasa ku evuisisa muomu anapu aku Cimbembesi. 15 Muntu uaku cimbembesi akasompo viuma vioshe, vuno honi ikeye naumo uahi asa kumusompa. 16 Ngue muvihandeka visoneka nguavio,

"Nkuma iya azivuka mana a Muene

linga amushike?"

Vuno honi tuli na mana a Kilistu.