1 Kavangeyeni ngila ya cizango na kushunguiya cikuma mavuana a cimbembesi, cikuma kuma mavuana a kunangula vunanguizi. 2 Muomu uoshe uje ahandeka mu vindaka kekuhandeka ku vantu vuno honi akahandeka kuli Njambi, muomu naumo uahi asa kumuvuisisa, vuno honi ahandeka viuma via vushueke mu Cimbembesi. 3 Vuno honi uje ahandeka vunanguizi akahandeka ku vantu mu kuvakolesa naku vasimpisa na kuvazembeleka. 4 Uje uoshe akahandeka mu vindaka akalikuasa ikeye vavenia lika, vuno honi uje muka kuhandeka via vunanguizi ikeye akakuasa cikungulikilo.

5 Honi njitonda linga muva voshe muhandeke mu vindaka, vuno honi cakama cikuma njitonda nguange muhandeke vunanguizi. Uje ahandeka vunanguizi ali cikuma na seho kupulakana uje ahandeka mu vindaka, kuvanga nga kuli umo uje alumbununa vije viahandeka, linga vikuase cikungulukilo coshe. 6 Honi vamuanetu nga njija kuli yeni oku njihandeka mu vindaka, nkuma honi njikamikuasa vati kuvanga mpamo njiminehele kusholola cimo cipue mana cipue vunanguizi cipue vilongesa.

7 Nga cipuevene viakuimbisa vije viakuhona muono vije ngue mbendo cipue kalialia, nga kuviohio muacili, nkuma muntu asa kuzivuka vati vije vivemba? 8 Kaha nga tolombita kuyohio muacili, nkuma iya honi asa kuli vuahesela nzita? 9 Mucifua cimo vene neni naua nga muhandeka mu vindaka vije kuvivuika, nkuma vati honi muntu umo asa kuzivuka vije muhandeka? Muomu mukahandekela lika mu mpunzi. 10 Cilivene hano ha mavu hali miyati yaingi ya kuliseza, vuno honi yoshe ili naseho. 11 Vuno honi nga kunjizivuka muje vije viulumbununa uje muyati, kaha njikapua nji mungezi kuli uje ahandeka kaha na uje ahandeka akapua mungezi kuli yange. 12 Mu ngila imovene neni naua muomu muli nakutonda cikuma vije viahandeka cimbembesi, asekeneni kutonda mavuana aje atunga cikungulukilo.

13 Nankuma, uje ahandeka mu vindaka napande kulomba nzili ya kulumbununa. 14 Muomu nga njilombela mu vindaka, cimbembesi cange cilombela vuno honi mana ange ali kuvieka. 15 Nkuma njikalinga vika honi? Njikalombela mu cimbembesi cange kaha naua njikalombela mu mana ange, kaha njikemba mu cimbembesi cange kaha naua njikemba mu mana ange. 16 Keti ngoconi nga mushangazala Njambi na cimbembesi, nkuma vati honi muntu uje ahuminina kueka ahandeke nguendi "Ameni" ku kutsantsela ceni? Muomu ikeye kazivuka vije muli nakuhandeka. 17 Muomu yeni muasa kuhana citsantselo ceni muacili cikuma, vuno honi veka kucivakuasa cipue cimo.

18 Njitsantsela kuli Njambi ngeci njikahandeka mu vindaka cikuma kupulakana yeni voshe. 19 Vuno honi lika mu cikungulukilo njapande kuhandeka lika mezi atanu mu mana ange ngeci njituamenene vakuetu kupulakana kuhandeka mezi makulukazi likumi (10,000) mu vindaka.

20 Vamuanetu, keti mupue ngue vanike mukusinganieka ceni, pueni tukeke mu viuma via vipi, vuno honi kusinganieka ceni cipue ca vukuluntu. 21 Vana visoneka mu visoneka nguavo,

Muene nahandeka nguendi,

"Kuhitila mu vantu vakuhandeka vindaka via vungenzi

Na kuhitila mutunua tuavangenzi.

Mukemo njikahandeka ku vantu ava,

vuno honi cipue ngoco kuvakanjivuila."

22 Kaha kuhandeka mu vindaka keti cimueso ca vaka kutsiliela vuno honi ca vaka kuhona kutsiliela, kaha vunanguizi keti vua vakakuhona kutsiliela vuno honi vua vaka kutsiliela.

23 Nankuma nga cikungulukilo coshe cilikunguluila hamo na kuhakandeka mu vindaka, kaha vantu veka cipue vakakuhona kutsiliela omo vakovela, nkuma kuvakahandeka nguavo muazaluka ndi? 24 Vuno honi nga voshe vahandeka vunanguizi, kaha uje muka kuhona kutsiliela cipue muntu uje ahuminina kueka akovela, voshe vakatsiliela nguavo vaka vupi muomu yavije vivanovu kaha naua voshe vaka vasompa muomu yavije vivanovu, 25 kaha vushueke vua mutima uendi vaka vusholola, kaha akatsikama ha mavuli nakulemesa Njambi, nakulitavela nguendi, "Muavusunga Njambi ali hakati keni!"

26 Vamuanetu nkuma vika honi tukahandeka? Omo mukaliuana hamo kaha umo na umo ueni ali na muaso, mukuavo ali na cilongesa, mukuavo ali na kusholola, mukuavo ali na kuhandeka mu vindaka, cipue mu kulumbununa, kaha viuma vioshe evi vavilinge mu kukuasa cikungulukilo. 27 Nga muntu umo ahandeka mu vindaka, kaha kukale vavali cipue vatatu vahandeke kaha umo na umo napande kuhandeka ha ntsimbu yendi, kaha umo alumbunune. 28 Vuno honi nga kukuesi umo uje alumbununa kaha voshe vanapande kuholoka mu cikungulukilo, kaha napande lika kuhandeka kuli ikeye vavenia na kuli Njambi. 29 Aceleni vavali cipue vatatu tunanguizi vahandeke, kaha vakuavo vanapande kuhilula vije vivali nakuhandeka. 30 Kaha nga kusholola vanacimuesa kuli mukuavo uje natumama kuyehi, kaha uje muka kuhandeka uakulivanga napande kuholoka. 31 Muomu muva voshe muasa kuhandeka vunanguizi umo na umo, linga voshe valilongese na kulikolesa. 32 Kaha vimbembesi via tunanguizi viakala muintsi lia tunanguizi. 33 Muomu Njambi keti Njambi uampindangano vuno honi uapua ua ciyulo.

Ngue muvikungulukilo vioshe via vantu vakulela va Njambi, 34 vampuevo vanapande kuholoka mu vikungulukilo. Muomu kuvavatavesele kuhandeka vuno honi vanapande kuononoka ngue muje mulihandeka lishiko. 35 Nga kuli vimo vije vashunguiya kuzivuka, vanapande kuihula va yaliavo ku vinjivo viavo. Muomu cinapu cuma ca shuamua cikuma mpuevo kuhandeka mu cikungulukilo.

36 Nkuma lizi lia Njambi lihuma kuli yeni ndi? Cipue nkuma kuli yeni lika liezile ndi? 37 Nga uoshe asinganieka nguendi ikeye napu kananguizi, cipue ali na vuana vua cimbembesi, napande kunanguka ngeci evi vinjili nakusoneka kuli yeni vinapu lishiko lia Muene. 38 Kaha nga muntu kazivukile evi, kaha nendi naua kuva kamuzivuka.

39 Nankuma vamuanetu, shunguiyeni kuhandeka vunanguizi, vuno honi keti mu vindike vaje vahandeka mu vindaka. 40 Vuno honi viuma vioshe viapande kulingiua muacili na muje muviayilamo.