1 Kaha nga njihandeka mu vindaka via vantu cipue na via tungelo, vuno honi kunjesi na cizango, kaha njinapu lika ngue kutenda ca ngongi cipue kuohia ca ngenzo. 2 Kaha nga njili na nzili ya vunanguizi, na kuvuisisa vushueke vuoshe na mana oshe, kaha nga njili nalutsilielo luoshe luje luasa kuhumisa minkinda, vuno honi kunjesi na cizango kaha njinapu uangoco. 3 Kaha nga njihana vioshe vije njili navio, kaha naua nga njilihana muvila uange linga vautsimike, vuno honi kunjesi na cizango kaha nacimo cahi cinjiuanaho.

4 Mu cizango muakala kusimpa na ngozi, mu cizango kumuakele cipululu kaha naua mu cizango kumuakele kulihalesa cipue kulivua. 5 Mu cizango kumuakele kushaula, mu cizango kumuakele kulizanga yove vavenia, cipue kuniengua, mu cizango kumuakele nkulundundu. 6 Mu cizango kumuakele kuvuahelela ha viuma via vupi, vuno honi muakala kuvuahelela ha viuma via vusunga. 7 Mu cizango muakala kuliniunga, mu cizango muakala lutsilielo ku viuma vioshe, mu cizango muakala kutsiliela viuma vioshe, kaha muakala lukakateya ku viuma vioshe.

8 Mu cizango kumuakele kuhonoua, vuno honi vunanguizi vukahita lika, nakuhandeka mu vindaka kuoshe kukahua, kaha na mana nauo akahita lika. 9 Muomu mana etu ku azivuka vioshe kaha na vunanguizi vuetu kutue kuhandeka vioshe mukushula, 10 vuno honi omo viakushula vikeja, kaha vije via kuhona kushula vikahua.

11 Omo njapuile nji kanike, njakale nakuhandeka ngue kanike, njakele nakusinganieka ngue kanike, njakele nakulinga viuma ngue kanike, vuno honi omo njakolele kupua yala njalikelele kulinga viuma via vuanike. 12 Muomu hano honi tulinakumona lika viuma ngue tuli nakavimona muka likengelo, ambahoni tukamona mesho na mesho. Kaha vije njazivuka hano vinapu viavindende, vuno honi njikevuisisa muakushula, cipuevene njavivuisisa laja mukushula.

13 Nankuma lutsilielo, na kutsiliela na cizango, ha viuma evi vitatu vuoshe, vuno honi cakamaho hali evi vioshe capua cizango.