1 Honi vamuanetu njimivulukisa nguange mucifua muka muje njambuluile kuli yeni Muzimbu Uacili, uje umuatambuile, uje umunemana nauo mu lutsilielo, 2 uje umunovoka nauo, nga mukakateya ku lizi lije njambuluile kuli yeni. Keti ngoconi muatsiliela muangoco.

3 Muomu vije njatambuile njavihanene kuli yeni kupua via kulivanga via seho, ngeci Kilistu uatsililile vipi vietu, kuya muje mu vihandekelamo visoneka, 4 nguavio vamutsindile, kaha vamusanguile ha litangua lia mucitatu kuya muje mu vihandekelamo visoneka, 5 kaha ngeci uasholokele kuli Kefase, ambahoni kuli vaje likumi na vavali. 6 Ambahoni naua uosholokele kuli vamuanetu vavengi kupulakana vihita vitanu (500) a ntsimbu imo lika, vamo vavo vacili nakuyoya, vuno honi cipuevene vamo vanatsi. 7 Ambahoni uosholokele kuli Yakomba, naua na ku tunganda voshe.

8 Kaha ha kumanusuila ku viuma vioshe ambahoni uasholokele na kuli yange naua uje uasemukile vuvishu. 9 Muomu yange njinapu uamundende ku tunganda, uje kafuila kumutumbula kanganda, muomu yange njapakesele cikungulukilo ca Njambi. 10 Vuno honi muomu ya kavumbi ka Njambi mukemo njili muje munjilimo, kaha kavumbi kendi hali yange kukapuile kangoco. Cipue ngoco, njapangele cikuma kupulakana voshe, cipuevene keti yange, vuno honi kavumbi ka Njambi kaje kali nange. 11 Cipuevene nguavo yange cipue vakevo, nankuma yetu tuambuluile kaha yeni honi muatsilielele.

12 Honi nga Kilistu vamuambulula nguavo vamusanguile ku vatsi, nkuma kuija vati ngeci vamo veni vahandeka nguavo kukuesi kusanguka kuvatsi? 13 Vuno honi nga kukuesi kusanguka ku vatsi, kaha ngue Kilistu kuvamusanguile. 14 Nga Kilistu kuvamusanguile, ambahoni kuambulula cetu cinapu ca ngoco kaha na lutsilielo lueni lunapu lua ngoco. 15 Kaha tunauaniua nguetu kutuesi nakuimanena Njambi muacili, muomu tuahanene vukaleho vua Njambi ngeci uasanguile Kilistu, nga cilivene vatsi kuvakasanguka kaha na Njambi vene kasanguile Kilistu. 16 Muomu nga vatsi kuvakasanguka, kaha na Kilistu naua kuvamusanguile. 17 Nga Kilistu kuvamusanguile, kaha lutsilielo lueni lunapu luangoco kaha hangavene mucili mu vipi vueni. 18 Ambahoni na vaje naua vanatsila muli Kilistu vananongo. 19 Nga muomu ya vuyoye ovu lika tunatsiliela muli Kilistu, kaha hali voshe, yetu vanapande kutuvuila cikuma ngozi.

20 Vuno honi muavusunga vene Kilistu vamusanguile ku vatsi, ikeye uakulivanga kusanguka ku vatsi. 21 Muomu kuhitila mu muntu mukemo kutsa cezile, kaha muli muntu naua mukemo muhuminina kusanguka ca vatsi. 22 Muomu kuhitila muli Andama vantu voshe vatsa, mucifua cimovene naua kuhitila muli Kilistu vantu voshe vakayoya. 23 Vuno honi umo na umo akasanguka kuya mungila yendi, Kilistu ikeye vua kulivanga kusanguka ku vatsi, ambahoni hakuija cendi kaha vaje vanakundama kuli ikeye navo naua vakasanguka. 24 Ambahoni kukeja mamanusuilo, muomu Kilistu akahana vumuene kuli Njambi Tate hanima yakunongesa vaka kuyula vahano ha mavu, na nzili yakama yoshe na nzili. 25 Muomu napande kuyula kuvanga noho nahaka vitozi viendi voshe muintsi lia viliato viendi. 26 Kaha citozi ca kumanusuila kunongesa cikapua kutsa. 27 Muomu Njambi nahaka viuma vioshe linga vipangele muintsi lia viliato viendi, vuno honi muomu visoneka vihandeka nguavio "Viuma vioshe navihaka linga vipangele muintsi liendi," Calimuesa cilivene ngeci kucakundamene kuli Njambi, uje aka viuma vioshe muintsi lia Kilistu. 28 Omo viuma vioshe vanavihaka kuli ikeye, ambahoni na muana ikeye vavenia akalihana kuli Njambi uje nahaka viuma vioshe muintsi liendi, linga Njambi apue cuma coshe kuli muntu uoshe.

29 Honi nkuma vantu valumbununa vika omo vavambuitika nguavo kuimanene vatsi? Nga vatsi vakevo kuva kasanguka, Nkuma vati vantu vavambuitika mukuvemanena? 30 Nkuma vika njili mu makalu ntsimbu yoshe? 31 Vamuanetu njilina kuluisa kulihalesa cange hali yeni cije njili naco muli Kilistu Yesu Muene uetu, njikatsi ha litangua na litangua! 32 Nkuma vika njiuanaho nga njihandeka mu vuntu nguange, njaluile na vikashama ku Efeso, nga vakakutsa kuvakasanguka, "Kaha tuyeni tulie na kunua muomu imene tutsa."

33 Keti vamikuise "Omo vantu vavapi vakapihisa visinganieka viacili." 34 Hilukeni kuvisinganieka vieni via cili, kaha keti mukalingeho vupi naua, omo vamo kuvesi na mana a Njambi njihandeka eci na shuamua yeni.

35 Vuno honi umo akehula nguendi, "Nkuma vakakutsa vaka vasangula vati? Nkuma na mivila yacifua muka ije vakeja nayo?" 36 Yeni vantu vavilema vije mukuna ku viekuija ku muono kuvanga noho vinatsi. 37 Kaha vije vimukakunu keti ikeyo nona ije ikakalako, vuno honi nona, cipue ya tiliku cipue nona kualukele. 38 Vuno honi Njambi akahana vinona kuya muje muanahanguilamo, kaha ku nona na nona na cifua cayo.

39 Muomu keti mivila yoshe yapua ya kulifua, vuno honi kuli umo uacifua ca vuntu, ukuavo ua cifua ca tusitu ukuavo ua tuzila kaha na ukuavo ua vantsi.

40 Kaha kuli mivila ya muilu na mivila ya ha mavu, vuno honi vumpau vua muilu vuapua vumo lika, kaha vumpau vua ha mavu vuapua vueka naua. 41 Kuli kuviakuma ca litangua, kaha kuli kuviakuma ca ngonde, kaha kuli naua kuviakuma ca vintanga ntanga, muomu ntanga ntanga ya liseza ku ntanga ntanga ikuavo mu kuviakuma cavio.

42 Nankuma omu mukemovene mucinafu na kusanguka ca vatsi. Omo cije civanakunu cikanonga, vuno honi cije civanasangula kucikanongo. 43 Omo muvila vaka utsindi kua kuhona kasingimiko na kuzeya, kaha vakausangula mu vumpau na nzili. 44 Vakautsindi oku ucili muvila ua vuntu, vuno honi vakausangula oku uli mu cimbembesi, kaha nga kuli muvila ua vuntu, kaha kuli na muvila ua cimbembesi naua. 45 Nankuma vacisoneka muvisoneka nguavo, "Yala uakulivanga Andama, uapuile muntu uakuyoya," vuno honi Andama uamamanusuilo uapuile cimbembesi uakuhana muono. 46 Keti via ku cimbembesi viapua via kulivanaga, vuno honi via vuntu, ambahoni via ku cimbembesi. 47 Muntu uakulivanga uahumininine a mavu, muntu uakuhuma ku mpumputa, kaha muntu uamucivali uahumine muilu. 48 Ngue muje uapuile muntu ua kuhuma ku mpumputa, mukemo vene muvanafu na vaje vahuma ku mpumputa, kaha ngue muje naua muanafu muntu uje uakuhuma muilu, mukemo vene muvanafu na vaje vahuma muilu. 49 Ngue mujevene mutunasemuka ku cifua ca muntu uje uahumine ku mpumputa, mukemo vene naua tukakala na cifua ca muntu uje uahumine muilu.

50 Vamuanetu njimileka evi nguange muvila na maninga kuviasa kusuana Vumuene vua Njambi, mucifua cimovene cipue cuma cije casa kunonga kucasa kusuana cuma cije kucenonga.

51 Taleni, njilinakumileka vushueka, tuva voshe kutukatsi, vuno honi tuva voshe vakatuhimpula. 52 Mukantsimbu lika ngue muje mulikakemuna lisho, ha tolombita ya mamanusuilo. Muomu tolombita ikohia, kaha vatsi vaka vasangula, kuakuhona kunonga naua, kaha vaka tuhimpula. 53 Muomu muvila ou uakunonga unapande kuzala uje uakuhona kunonga, muomu muvila ou ua kutsa unapande kuzala uje uakuhonoua kutsa. 54 Omo cije cakunonga nga cizala cije cakuhonoua kunonga kaha cije cakutsa nga cizala cije cakuhona kutsa ambahoni cilishulisise kuhandeka cije civanasoneka nguavo, "Kutsa vanacimanusula mu kuhiana!"

55 "Tala kutsa, nkuma kuhiana cove cili kuli?

Tala kutsa, nkuma vusungu vove vuli kuli?"

56 Vusungu vua kutsa vuapua vupi, kaha nzili ya vupi yapua lishiko lia Mosesa. 57 Vuno honi tutsantsela kuli Njambi uje akatuhana kuhiana kuhitila muli Muene uetu Yesu Kilistu.

58 Nankuma vamuanetu vanjazanga, imaneni ngo kuakuhona kulininganga. Ntsimbu yoshe pangeni na nzili mu vipangi via Muene, oku muzivuka ngueni vipangi vieni vije muli nakupanga muli Muene kuviyi muangoco.