1 Vamuanetu kuya ha mavuana a cimbembesi, kunjitondo linga mukale kunzimba. 2 Muazivuka ngeci omo muapuile vaka kuhona kutsiliela, kaha vintsimbu viavingi vamitanganesele na kumizimbalesa ku tumponia vatuveveve. 3 Nankuma njitonda nguange muzivuke ngueni naumo uahi uje asa kuhandeka mu Cimbembesi ua Njambi evi nguendi, "Yesu asingiue!" kaha naumo uahi naua asa kuhandeka nguendi, "Yesu ikeye Muene," kuakuhona Cimbembesi Uakulela.

4 Vuno honi kuli mavuana akuliseza seza, honi Cimbembesi uapua umo lika ikeye muka ku ahana. 5 Kaha kuli vipangi viakuliseza seza, vuno honi Muene uapua umo lika. 6 Kaha kuli muakupangela muakuliseza seza, vuno honi Njambi umo lika ikeye akavituamenena vioshe kuli uoshe.

7 Ku muntu na muntu vanamuhana vukaleho vua Cimbembesi muomu ha viuma viacili. 8 Ku umo vanamuhana kuhitila mu Cimbembesi ca muzimbu ua mana, kaha mukuavo vanamuhana mangana kuya ku Cimbembesi uje vene ua kulifua. 9 Ueka vanamuhana lutsilielo kuli Cimbembesi uakulifua, kaha mukuavo vanamuhana vuana vua kukanguisa kuli Cimbembesi ujevene umo lika. 10 Kaha ku mukuavo vanamuhana vinzili via vikomoueso, mukuavo vanamuhana kuambulula vunanguizi, mukuavo vanamuhana mana akunongonona vifua via vimbembesi, kaha mukuavo vanamuhana kuhandeka mu vindaka via kuli sezaseza, kaha naua ueka vanamuhana kulumbununa vindaka. 11 Kaha viuma vioshe evi vavituamenena ku Cimbembesi umo lika uakulifua, kaha uavipangelele kuli umo na umo, kuya muje muatondelamo.

12 Muomu ngue muje vene muvila uapua umo lika kaha uakala na vilio viavingi, kaha vilio via muvila vioshe cipuevene viapua viavingi, vuno honi viapua muvila umo lika, kaha mukemo vene mucafua na Kilistu. 13 Muomu ha Cimbembesi umo tuva voshe vatumbuitikile mu muvila umo lika, Vayunda cipue Vangelengu, vandungo cipue vaka kupatuka kaha tuva voshe vatuhanene kunua ku Cimbembesi umo lika.

14 Muomu muvila ku uakele lika na cilio cimo vuno honi viavingi. 15 Nga ciliato cihandeka nguaco, "Muomu kunjapuile nji livoko, kaha kunjakundamene ku muvila," Eci keti cikeco casa kulingisa nguavo cimo cavio keti cipue cilio ca muvila. 16 Kaha nga lituitui lihandeka ngualio, "Muomu kunjapuile lisho, kaha kunjakundamene ku muvila." Eci keti cikeco casa kulingisa ngeci cimo cavio keti cipue cilio ca muvila. 17 Nga muvila uoshe uapuile lisho, kaha ngue ukevuila kuli? Kaha nga muvila uoshe uapuile lituitui, kaha ngue ukevuila kuli kunika? 18 Vuno honi ngue muje mucilimo, Njambi uavuahesele vilio vioshe via mu muvila, cimo na cimo kuya muje muatondelelemo. 19 Kaha nga vioshe viapuile cilio cimo, kaha ngue muvila uli kuli? 20 Ngue muje mucilimo viapua vilio viavingi, vuno honi muvila umo.

21 Kaha lisho kuliasa kuhandeka ku livoko ngualio, "Kunjesi nove naseho," Cipuevene mutue kuhandeka ku ciliato nguauo, "Kunjesi nove naseho," 22 Mu ngila ikuavo naua, vilio via muvila vije vikamoneka ngue viakuzeya kutuasa kupanga cuma coshe kuakuhona vikevio. 23 Kaha vilio via muvila vije tusinganieka nguetu kuviesi na seho cikuma vikevio tukaniungu cikuma na seho. Kaha vilio vije kuvie kusholoka ku vantu vikevio tukaniungu cikuma na seho, 24 vilio vietu vije vikasholoka ku vantu kutuekutonda kuviniunga cikuma na seho, vuno honi Njambi uanungakanene muvila kaha uahana kasingimiko kakama cikuma ku vilio vije kuviakele na seho, 25 linga keti muvila ulihangunune, vuno honi linga vilio viliniunge muakulifua kuli cimo na cikuavo. 26 Nga cilio cimo ciyanda, kaha vilio vioshe viyandela hamo, nga cilio cimo vacisingimika, kaha vilio vioshe vivuahelela hamo.

27 Honi yeni munapu muvila ua Kilistu kaha muntu uoshe napu cilio ca muvila ou. 28 Njambi mu cikungulukilo ha kulivanga uahanguile tunganda, kaha kuhilukilaho tunanguizi, kaha luamucitatu valongisi, ambahoni vaka kulinga vikomoueso, kuhatakanako vaka kukanguisa, kaha na vakuasi, na vaka kutuamenena, kaha na vaka kuhandeka mu vindaka via kuliseza seza. 29 Nkuma voshe vapua tunganda ndi? Nkuma voshe vapua tunanguizi ndi? Nkuma voshe vapua valongisi ndi? Nkuma voshe vakalingi vikomoueso ndi? 30 Nkuma voshe vali na mavuana a kukanguisa ndi? Nkuma voshe vakahandeka mu vindaka ndi? Nkuma voshe vaka lumbununa ndi? 31 Vuno honi na mitima yeni yoshe tondeni mavuana aje aseho cikuma,

Kaha hanga naua vene njikamimuesa cije ca cili cikuma kuma.