1 Vamuanetu njitonda linga muzivuke nguange vakukuluila vetu voshe vakele muintsi lia lishelua, kaha voshe vahitile mu cisali. 2 Kaha voshe va vambuitikile kuhitila muli Mosesa mu lishelua na mu cisali, 3 kaha voshe valile viakulia via kulifua viaku cimbembesi, 4 kaha voshe vanuine via kunua via kulifua viaku cimbembesi muomu vanuine mu Livue lia ku cimbembesi lije lia vakavangeyele, kaha lije Livue liapuile Kilistu. 5 Cipue ngocovene Njambi kavuahelele ku vamo vavo kaha mivila yavo vayumbilile mu mpambo.

6 Honi evi viuma vinapu cinangulo kuli yetu, keti tushunguiye vupi ngue muje muvalingile vakevo. 7 Keti mulemese tumponia ngue muje muvalingile vamo vavo, ngue muje muvacisoneka nguavo, "Vantu vatumamene mu kulia na kunua kaha vemanene mukukina." 8 Kutuapandele kulinga vupangala ngue muje vamo vavo valingile, kaha voshe makulukazi makumi avali na atatu (23,000) vatsile litangua limo. 9 Kutuapandele kueseka Muene, ngue muje muvalingile vamo vavo kaha voshe vavashumine ku manoka na kutsa. 10 Kaha kutuapandele kulinienieta ngue muje mu valingile vamo vavo kaha vavanongesele kuli kangelo uje muka kutsiha.

11 Honi viuma vioshe evi vialingiuile kuli vakevo kupua ngue cinangulo, vuno honi vavisonekele kupua ngue vishika kuli yetu, muomu tuli na kuyoya ku ntsimbu ya mamanusuilo.

12 Nankuma nga kuli umo asinganieka nguendi asa kuimana ngoo kaha napande kuzangama linga keti aue. 13 Nacimo cahi ceseko civamieseka naco cije keti ca mualolo kuli muntu. Njambi uapua uakulongua, kaha kamitavesa linga vamieseke vieseko vije vipulakana nzili yeni, vuno honi asa kumieseka na ceseko cije casa naua kumisholuela na ngila ije imuasa kuteuelamo, linga muase kuimana ngoo nalukakateya.

14 Nankuma honi vamuanetu vanjazanga, teueni kulemesa tumponia. 15 Njilinakuhandeka ngue ku vantu vaje vanananguka, kaha lisompeni yeni vavenia hali evi njili nakuhandeka. 16 Nganja ya cikuisulo ije tukakuisula, Nkuma keti kulipandakana mu maninga a Kilistu ndi? Kaha nkuma na mbolo ije tukapazula, Nkuma keti kulipandakana mu muvila ua Kilistu ndi?

17 Muomu kuakala lika mbolo imo, kaha netu vaje vavengi tunapu muvila umo lika, muomu tuvoshe tukali mbolo imo lika. 18 Singaniekeni ha vantu va mu Isaleli, nkuma keti vakevo vaje valipangelele mu kulia vinkombelo via ha mutula ndi? 19 Nkuma vika njilumbununa honi? Nkuma via kulia vije vivakalambuila ku tumponia viasa kupua cakulia coshe, indi nkuma kamponia asa kupua cuma coshe ndi? 20 Houe, vuno honi njilinakuhandeka ngeci vinkombelo vivakalambuila vaje vaka kuhona kutsiliela vaka vilambuila ku mahamba keti kuli Njambi, kunjitondo nguange neni mukale hamo na mahamba. 21 Kumuasa kunuina mu nganja ya Muene kaha naua na kunuina na mu nganja ya mahamba. Kaha kumuasa kulia ku mesa ya Muene kaha naua na kulia ku mesa ya mahamba. 22 Nkuma tuapande kulingisa Muene linga ovue cipululu ndi? Nkuma yetu tuvakukolesa kupulakana ikeye ndi? 23 "Viuma vioshe viakala na lishiko," Vuno honi keti viuma vioshe viapua viaseho. "Cilivene viuma vioshe viakala na lishiko," Vuno honi keti viuma vioshe vikatungisa. 24 Muntu uoshe keti atonde vucili vuendi, vuno honi atonde vucili vua kavusamba kendi.

25 Lieni vioshe vije vivalandesa ku cihela cakulandesela ntsitu kuakuhona kuihula kuje kuvihuminina linga mitima yeni keti imihise. 26 Muomu visoneka vihandeka nguavio, "Mavu apua a Muene, na viuma vioshe vije vilimo."

27 Nga umo ua vaje vakakuhona kutsiliela amilania ku kulia ca cinguezi, kaha mutonda kuya, lieni vioshe vije vivana mivuahesela cakuhona kuihula cihula ca kuje kuvihuminina linga mitima yeni keti imihise. 28 Vuno honi nga muntu umo ahandeka kuli yeni nguendi, "Evi vanavilambula kupua nkombelo." kaha honi keti uvilie muomu ya mulonga ua uje uakulekele, na mulonga uavisinganieka viove. 29 Evi kuviapuile visinganieka viove vavenia houe, vuno honi visinganieka via muntu uje nakuleka umo ehula nguendi,

Muomu vika honi kupatuka cange cakulinga vioshe vije njitonda vanacivindika muomu ya visinganieka via muntu ueka? 30 Kaha nga njiitsantsela oku njilia, nkuma vati honi vahandeka hali yange viuma via vipi muomu yakuhana citsantsela kuli Njambi ndi?

31 Nkuma cipue mulia cipue munua, cipue vioshe vimulinga, vilingeni vioshe ku vumpau vua Njambi. 32 Keti muhane mulonga kuli Vayunda cipue kuli Vangelengu cipue ku cikungulukilo ca Njambi, 33 ngue muje munjili nakueseka kuvuahelesa vantu mu viuma vioshe vinjili nakulinga, kunjekutonda vucili vuange vavenia lika, vuno honi vucili vua vavengi, linga vase kuovoka.