1 Muomu nga hakati keni hali umo alinienga hali munaina, nkuma napande kuya kuvaka lishiko vaje vaka kuhona kulela kupulakana kuya ku vantu vakulela va Njambi ndi? 2 Nkuma kumuzivuka ngueni vantu va Njambi vakulela vakasompa mavu ndi? Kaha nga mavu vakasompa kuli yeni, kaha muhonoua vati kusompa vimpande via vindende? 3 Nkuma kumuzivuka ngueni yetu tukasompa tungelo ndi? Kaha tukahonoua vati honi kusompa viuma vije viakundama ku vuyoye ovu! 4 Nankuma nga muli na vimpande via cifua eci, nkuma vika mukavitualela kuli vaje kuvasingimikiua mu cikungulukilo? 5 Njilinakuhandeka evi linga shuamua imikole. Nkuma hakati keni kukuesi yala ali na mana cikuma linga ase kusompa kulinienga cije cili hakati ka vaka kutsiliela ndi? 6 Vuno honi muka kutsiliela atuala mukuavo muka kutsiliela ku lishiko mukulisompa kuli vaje vakakuhona kutsiliela?

7 Cije cineha linga mulituale umo na mukuavo kuvaka lishiko cimuesa ngeci muahonoua. Nkuma vikahoni kumutavela linga vamipihisile? Nkuma vikahoni kumutavela linga vamikuise? 8 Vuno honi yeni vavenia mukapihisa na kulikuisa, cipue kuli vamuanoko. 9 Nkuma kumuzivuka ngueni vaka vupi ku vakasuana Vumuene vua Njambi ndi? Keti vamikuise, cipue vikuizi cipue vaka kulemesa tumponia cipue vaka kulinga vupangala cipue vamala vaka kulinga vukoyi na vakuavo vamala, 10 cipue vaka kuiva cipue vaka lizangamena cipue vaka kupenda cipue vaka kushaula cipue mihuza navakevo kuva kasuana Vumuene vua Njambi. 11 Kaha na hakati keni vamo muapuile ngue vakevo, vuno honi vamikushile na kumilelesa, vamipuisile vaka vusunga mu lizina lia Muene Yesu Kilistu na mu Cimbembesi ua Njambi yetu.

12 Vuno honi muka handeka ngueni, "Viuma vioshe viapua via lishiko kuli yange," vuno honi keti viuma vioshe vije viapua viaseho. Viuma vioshe viapua via lishiko kuli yange. Vuno honi yange kunjikapu nji ndungo ku cuma coshe. 13 Kaha neni naua muka handeka ngueni, "Viakulia viapua via lizimo, kaha lizimo liapua lia viakulia." Vuno honi Njambi akapihisa vioshe. Nankuma muvila kuvaupangelele kulinga vupangala vuno honi ukeuo vaupangelele Muene, kaha Muene vamupangelele muvila. 14 Kaha Njambi uje uasanguile Muene ikeye naua akatusangula na nzili yendi. 15 Nkuma kumuzivuka ngueni mivila yeni yapua vilio via Kilistu ndi? Nankuma njasa kuambata vilio via Kilistu na kuvipuisa vilio via cikoyi ndi? Houe! 16 Nkuma ngeci kumuzivuka ngueni uoshe uje alipandakana ikeye vavenia na cikoyi apua muvila umo nendi ndi? Muomu ngue muje muvacisoneka nguavo, "Vavali vakapua muvila umo." 17 Vuno honi uoshe uje nalipandakana kuli Muene napu umo nendi mu Cimbembesi. 18 Teueni ku vupangala. Kaha vupi voshe vueka vuje muntu a linga vunapu vua hambanza lia muvila uendi, vuno honi muntu uje alinga vupangala akalingi vupi ku muvila uendi vavenia. 19 Nkuma kuzivuka nguove muvila uove uapua njivo ya Njambi ya Cimbembesi ua kulela uje ali muli yove, uje yuli nendi kuhuminina kuli Njambi ndi? Kaha yeni kumuakundamene kuli yeni vavenia, 20 yeni vamilandele na ndando. Nankuma singimikeni Njambi mu mivila yeni.