1 Honi kuya ha via kulia vije viakukombelela ku tumponia, tuzivuka nguetu, "Tuva voshe tuli namana." Mana aje akalingisa muntu linga alihalese, vuno honi cizango cikeco cika tungisa. 2 Nga kuli umo akasinganieka nguendi azivukako vimo, vuno honi kazivuka kuya muje muanapandele kuzivukilamo. 3 Vuno honi nga uoshe uje azanga Njambi, ou vanamuzivuka muomu ya Njambi. 4 Nankuma kuya ku kulia viakulia vije viakukombelela tumponia, tuzivuka nguetu kamponia cilivene kekuyoya, kaha kukuesi Njambi ueka naua vuno honi umo lika. 5 Muomu cipue vene nga kuvali vaje vavasana nguavo, "vanjambi," muilu cipue hano ha mavu, cilivene ngue muje mukuli "vanjambi" vavengi na "vimuene" vavengi, 6 vuno honi kuli yetu kuli lika Njambi umo, Tatetu, kaha kuli ikeye kukeko kuahuma viuma vioshe, kaha muli ikeye mukemo tuyoyela, ikeye Muene umo lika, Yesu Kilistu, ikeye uje muli ikeye muli viuma vioshe kaha muli ikeye mukemo tuyoyela.

7 Vuno honi keti vantu voshe vazivuka mana aua, vuno honi vamo hanga vacili na cisemua cakulemesa tumponia, vakali viakulia vije vivana kombelela ku tumponia, kaha visinganieka viavo hakupua via kuzeya vinajuala. 8 Viakulia kuviasa kutuneha kuyehi na Njambi, nacimo cahi casa kutukuasa cipue nga kutuvili, kaha nacimo cahi naua cituuanaho cipuevene tuvilie. 9 Kaha zangameni lika kuteua eci kupatuka ceni linga keti cikapue citsuntsuiso kuli vaje vanazeye. 10 Muomu nga muntu umo akumona, yove yala uje ua mana, uatumama ku mesa mu njivo ya tumponia, nkuma kasa kusimpa nga visinganieka viendi viazeye linga alie viakulia vije vivanakombelela ku tumponia ndi? 11 Muomu ya mana ove kaha uje yala uakuzeya akanonga, muanoko uje muomu ya ikeye mukemo Kilistu uatsile. 12 Kaha nga ulinga vupi kuli muanoko nakuvulumuna visinganieka viendi omo vinazeye, kaha uli nakulinga vupi kuli Kilistu. 13 Nankuma nga viakulia vilingisa muanetu linga alinge vupi, kaha kunjikaliho ntsitu naua, kuteua njilingisa muanetu kuuila mu vupi.