1 Nkuma kunjapatukile ndi? Nkuma keti nji kanganda ndi? Nkuma kunjamuene Yesu Muene uetu ndi? Nkuma keti yeni vushuka vua vipangi viange muli Muene ndi? 2 Nga honi kuveka keti yange kanganda, cilivene kuli yeni njinapu nji kanganda, muomu yeni munapu kasateso ka vunganda vuange muli Muene. 3 Kaha eci cikeco kuliluila cange kuli vaje vanjeseka. 4 Nkuma kutuesi nakapandi ha viakulia na viakunua ndi? 5 Nkuma kutuesi nakapandi ka kutusindikiya kuli mpueyetu, ngue vakuetu tunganda na vamunaina ya Muene na Kefase ndi? 6 Nkuma kuvanga yange na Mbanambase yetu lika vaje kuvesi na kapandi kakuhona kupangela vuyoye ndi? 7 Nkuma iya akapanga ngue lisualale kaha alifueta ikeye vavenia? Nkuma iya akuna lihia lia mikolovozi cakuhona kulia ku vushuka vuayo? Nkuma iya akaniungu vampanga kuakuhona kunua mavele avo? 8 Nkuma njili nakuhandeka evi na nzili yakama ya vuntu ndi? Nkuma lishiko kulihandeka evi vene viakulifua ndi? 9 Muomu vanacisoneka mu lishiko lia Mosesa nguavo, "Keti mukute ngombe ku kanua omo alinakujungula vinona." Nkuma Njambi nahakela lika mana vangombe ndi? 10 Nkuma cilivene kekuhandeka evi vioshe omo yetu ndi? Vacisonekele muomu yetu nguavo, uoshe uje muka kulima napande kulima mu kutsiliela kaha na muka kujungula napande kujungula mu kutsiliela ku mutambela ua vimbuto viendi. 11 Nga tunakunu vimbuto via Cimbembesi hakati keni, nkuma kucipu cuma cakama cikuma nga tuteja vuana vuje vuli muli yeni ndi? 12 Nga kuli vamo vaje vali na vukuasi vuje vuhuminina kuli yeni, nkuma kutuesi navuo mu vuingi ndi?

Cipue ngoco vene kutualikuaseseleko muacili aka kapandi. Vuno honi tunapande kuyanda mu viuma vioshe kupulakana kutanganesa Muzimbu Uacili ua Kilistu. 13 Nkuma kumuzivuka ngueni vaje valina kupanga mu njivo ya Njambi vakauana viakulia viavo mu njivo ya Njambi, kaha na vaje vakapanga ha mutula vakalipangela nkombelo ije ivakankomelela ha mutula ndi? 14 Mu ngila imo vene, Muene uashikile nguendi vaje vambulula Muzimbu Uacili vanapande kuuana vuyoye vuavo ku ukeuo.

15 Vuno honi kunjalikuasesele cipue cimo kukapandi aka, kaha naua kunjesi nakusoneka eci linga aka kapandi kapue kange, muomu cacili njitse kupulakana kutavesa muntu uoshe kunjihumisa eci kulihalesa cange. 16 Muomu nga njambulula muzimbu uacili, cije cinjilinga yange linga keti njilihalese, muomu canjipande yange kuambulula, kaha cikafua vati vukalu kuli yange nga kunjambulula Muzimbu Uacili. 17 Muomu nga njilinga eci cuma muayilamo cizango cange, kaha njinatambula vuana, vuno honi nga keti muayilamo cizango cange, kaha vananjikundika cipangi eci. 18 Nkuma honi vuana vuange vuka? Hali eci muomu mukuambulula cange hamo njikapuisa Muzimbu Uacili kupua ua vuana vua kuhona ndando, kuakuhona kupangesa kapandi kange mukushula ku Muzimbu Uacili. 19 Muomu cipuevene nguavo njapatuka kuli muntu uoshe, vuno honi njalipuisa yange vavenia ndungo ku voshe, linga njinganiale vantu vavengi. 20 Ku Vayunda njezile ngue nange nji Kayunda linga njivanganiale Vayunda, kaha kuli vaje vali vakava lishiko lia Mosesa njezile ngue uje akava lishiko lia Mosesa, vuno honi cipuevene yange kunjekukava lishiko lia Mosesa, vuno honi linga njivanganiale vaje vakava lishiko. 21 Kuli vaje kuvekukava lishiko lia Mosesa njezile ngue umo uje kekukava lishiko lia Mosesa, eci ku cilumbununa ngeci kunjekukava lishiko lia Njambi vuno honi njikakava lishiko lia Kilistu linga njinganiale vaje kuvekukava lishiko. 22 Kuli vaka kuzeya njapuile muka kuzeya, linga njinganiale vaje vaka kuzeya. Kaha njinalipuisa viuma vioshe ku vantu voshe, linga njase kuovolako vamo. 23 Njili nakulinga vioshe evi muomu ya Muzimbu Uacili, linga njiuaneko vikuisulo viamo. 24 Nkuma kumuzivuka ngueni vaka kushatuka voshe vakaliluisa ndi? Vuno honi umo lika ikeye akatambula vuana, nankuma neni shatukeni linga mukatambule vuana. 25 Muka kuliluisa uoshe akalivuahesela mu viuma vioshe. Vaka cilingi linga vatambule cilongo cije ca kantsimbu lika, vuno honi yetu linga tukatambule cilongo ca yaye. 26 Nankuma yange kunjekushatuka muangoco, yange kunjekulua ngue uje muka kulua na vinkome uje apupa vinkome mu mpuzi, 27 vuno honi yange njikakolesa muvila uange na vinkome naku upuisa ndungo yange linga munima ya kuambulula ku vakuetu, ngeci yange vavenia keti njikahonoue kuuana fueto.