1 Vanacambulula vene nguavo kuli cikuma vupangala hakati keni, vuje cipue hakati ka vaje vakakuhona kutsiliela kuve kuvulinga, muomu muana ua yala alinga vupangala na mpuevo ya ishe. 2 Kaha muli nakulihalesa! Nkuma kumuapandele kukala na vusiua ndi? Kaha uoshe uje nalingi eci vamuhumise hakati keni. 3 Cipuevene nguavo kunjesi neni mu vuntu, vuno honi njili neni mu cimbembesi. Kaha nga kunjili, njinasompo laja, 4 mu lizina lia Muene Yesu hali yala uje nalingi viuma evi. Omo mukunguluka hamo, kaha cimbembesi cange cili neni hamo na nzili ya Muene uetu Yesu, 5 haneni ou yala kuli Satana linga anongese muvila uendi, ngeci cimbembesi cendi vakacovole ha litangua lia Muene Yesu. 6 Kulihalesa ceni keti cacili, nkuma kumuzivuka ngueni cimbaluila cacindende casa kufutunuisa mukasha uoshe ndi? 7 Humiseni cimbaluila calaja linga mupue mukasha uauha, ngue muje cilivene mumulimo vakuhona cimbaluila, muomu Kilistu ikeye napu muna mpanga ua Paseka yetu kaha vana mukombelela laja. 8 Nankuma tuyeni tuvuahelele Ciuano eci, keti na cimbaluila calaja, cikeco cimbaluila ca vungungu na vupi, vuno honi na mbolo yakuhona cimbaluila ya kulela na vusunga. 9 Njasonekele mu mukanda uange nguange yeni keti mukalehamo na vantu vaje vakakulinga vupangala, 10 kunjilumbununa nguange vupangala vua hano ha mavu, cipue vaje vaka lizangamena na vezi, cipue vaje vaka kulemesa tumponia, ambahoni ha cuma eci yeni munapande kuhuma a mavu aua. 11 Vuno honi njimisonekela nguange keti mukalehamo na uoshe uje alitumbula ikeye liavenia nguendi muka kutsiliela nga ikeye ali na mulonga uakulinga vupangala cipue cipululu, cipue ikeye ali na kulemesa tumponia, muka kushaula, muka kupenda, cipue muizi. Keti mueseke cipue kulia na muntu uacifua eci. 12 Nkuma vikahoni vinjilinga nga njisompa vaje vali hambanza? Nkuma keti vaje vali mukati ka cikungulukilo vakevo vamunapande kuvasompa indi? 13 Njambi akasompo vaje vali hambanza. Ngue muje muvihandeka visoneka nguavio, "Humiseni uoshe uje muka vupi uje ali hakati keni."