1 Honi kuya ha kukuasa vantu vakulela va Njambi, ngue muje munjashikilile vikungulukilo viaku Ngalatiya, neni vene mukemo munapande kulinga. 2 Lia calumingu na calumingu, umo ku umo ueni napande kutulikako cuma cimo kumukulo, ngue muje mumunaselamo, linga omo njikeja keti kukakale naua kutonda via vukuasi. 3 Kaha omo njiheta, njikatuma vaje vamunahangula na mikanda linga vakambate vuana vueni nakuvutuala ku Yelusalema. 4 Nga cimuesa ngeci nange naua njinapande linga njiyeko, kaha njikaya hamo navo.

5 Njikamimeneka hanima yakuhita mu Masendoniya, muomu yange njinapande kuhita mu Masendoniya, 6 kaha njikakala neni cipue ku ntsimbu ya cisika, linga honi mukanjikuase muvuasi mu vungezi vuange kuoshe kuje kunjikaya. 7 Muomu kunjitondo kumimona lika na kumihitilila houe, vuno honi njatsiliela kukala neni mu vintsimbu, nga Muene acitavesa.

8 Vuno honi njikakala mu Efese noho ha litangua lia Pantekosita. 9 Muomu Njambi nanjishokuelela cikolo cakama cakupanga vipangi viacili, kaha vavengi valina kunjiluisa.

10 Omo Timateo akeja, munapande kumutambula muacili hakati keni, muomu ali nakupanga vipangi via Muene, ngue yange. 11 Nankuma keti kukale umo amuyengule, mukuaseni mu vuasi mu vungezi vuendi mu ciyulo, linga ahiluke kuli yange, muomu njamuvandamena hamo na vamuanetu.

12 Kaha hali muanetu Apolo, ntsimbu yoshe njikamusindiya cikuma linga akeje nakumimeneka hamo na vamuanetu vakuavo, tele keti cizango cendi kuija vuavuno vene, vuno honi akeja omo akauana ntsimbu.

13 Taleleni, imanene ngo mulutsilielo lueni, pueni vaka kusimpa, pueni vaka kukolesa. 14 Eceleni vioshe vije vimulinga muvilinge mu cizango.

15 Vamuanetu honi muazivuka ngueni, ntanga ya Setefanase ikeyo yapuile ya kulivanga kutenguluka mu Akaya, Kaha valihana vakevo vavenia kuvipangi via vantu vakulela va Njambi, 16 kaha njimilambelela ngeci mukave vantu ava na kuli vaka kupanga vakuavo na vaka kuhundangana hamo navo.

17 Njavuahelele cikuma hakuija ca Setefanase na Fotunatase na Akaikase, muomu vakevo vanapumo mukunjikuasa omo yeni muvahiko. 18 Muomu vanavuahelesa cimbembesi cange, neci ceni naua. Vantu vangacije vanapande kuvavuluka naua.

19 Vikungulukilo via ku Asiya viatuma vihindu. Akuila na Pilisila, hamo lika na cikungulukilo ca mu njivo yavo, vanamimeneka muli Muene. 20 Vamuanetu vanamimeneka. Lihinduiseni umo na mukuavo na kulitsemba ca kulela.

21 Yange Paulu njili nakusoneka vihindu evi na livoko liange vavenia.

22 Nga uoshe kesi na cizango hali Muene, vamusinge! Muene uetu Ija! 23 Kavumbi ka Muene Yesu kakale neni.

24 Cizango cange cikale neni mu va voshe muli Kilistu Yesu. Amen.