1 Vuno honi vamuanetu, kunjasele kuhandeka kuli yeni ngue vantu vaje vayoya mu cimbembesi, vuno honi ngue vantu vaje vayoya mu vuntu, ngue tukeke muli Kilistu. 2 Njamilisile na mavele keti na via kulia via kukola, muomu tele kanda mucili vuaheselelevio, kaha cipue hano vene kanda mulivuahesele, 3 muomu hanga mucili ku vuntu. Muomu nga hanga hakati keni ha cili cipululu na lifuua, nkuma keti yeni vaka mavu, vantu vaje vayoya kufutisi ya mavu ndi? 4 Nkuma nga omo umo ahandeka nguendi, "Yange njakundama kuli Paulu," kaha mukuavo nguendi, "Yange njakundama kuli Apolo," Nkuma yeni keti mu vantu va mavu ndi?

5 Nkuma Apolo ikeye iya? Nkuma Paulu ikeye iya? Tu vangamba lika kuhitila muli uje imuatsilielele, kuya muje Muene uacihanene kuli umo na umo. 6 Yange njakunine, kaha Apolo uetilile mema, vuno honi Njambi ikeye uakolesele. 7 Nankuma muka kukuna cipue muka kuitilila na umo uahi ali naseho, vuno honi kuvanga lika Njambi uje muka kukolesa. 8 Muka kukuna na muka kuitilila voshe vanalieseka. Kaha umo na umo akatambula fueto kuya kuvipangi viendi. 9 Muomu tunapu vamo mu vipangi via kupangela Njambi, kaha yeni munapu lihia lia Njambi,

Naua munapu njivo ya Njambi. 10 Kuya ku kavumbi kaje kanjihanene Njambi, ngue muka kutunga uavutongue njajalele luvula, kaha muntu ueka naua alinakutungilaho. Kaha muntu ueka napande kuzangama muje muatungilaho. 11 Muomu nalumo luahi luvula lueka luje muntu asa kujalaho kupulakana luje luvanajala laja lukeluo Yesu Kilistu. 12 Honi nga muntu umo atunga haje ha luvula na ngolinde, na siliva, na mavue a seho cikuma, na viti na muila cipue na vishati, 13 muntu na muntu vipangi viendi vikasholoka, muomu Litangua lia Muene lika visholola, muomu vikasholoka na tuhia, tuhia tukeseka cifua muka ca vipangi cije muntu na muntu napanga. 14 Nga vipangi vije viatungile muntu na muntu uoshe ha luvula vili muacili, kaha akatambula vuana. 15 Kaha nga vipangi via muntu na muntu uoshe vaka viuemeka, kaha nacimo cahi cakauanaho, cipue vene ikeye liavenia vaka muovola, vuno honi kuhitila lika ngue unaputumuka mu tuhia.

16 Nkuma yeni kumuazivukile ngeci muapua mu njivo ya Njambi, kaha ngeci Cimbembesi ua Njambi uakala muli yeni ndi? 17 Nga muntu apihisa njivo ya Njambi, kaha na Njambi akamupihisa. Muomu njivo ya Njambi yapua lika ya kulela, kaha ije njivo ya Njambi ikeyo vene yeni.

18 Keti kukale muntu umo alikuise ikeye vavenia. Nga hakati keni hali umo asinganieka nguendi ali na mana a matangua ano, mueceleni apue cilema ngeci akapue ua mana. 19 Muomu mana a mavu ano apua a vulema kuli Njambi. Muomu vacisoneka nguavo, "Akakuata vaka mana mu kuzangama cavo," 20 kaha naua nguavo, "Muene azivuka ngeci visinganieka via vaka mana viapua viangoco." 21 Nankuma keti kukale muntu cipue umo alihalese muomu ya vantu. Muomu viuma vioshe vinapu vieni, 22 cipue vene Paulu, cipue Apolo, cipue Kefase, cipue mavu, cipue muono, cipue kutsa, cipue ntsimbu ino, cipue kulutue, vioshe vinapu vieni, 23 kaha yeni munapu vantu va Kilistu, kaha Kilistu napu ua Njambi.