1 Njitemunuiseni ngue muje yange munjikatemunuisa Kilistu.

2 Njimishangazala yeni muomu mukanjivuluka mu viuma vioshe nakutualelaho kukavangeya vilongesa ngue muje vene munja mihanenevio. 3 Vuno honi njitonda muvuisise ngeci mutue ua yala uoshe uapua Kilistu, kaha mutue ua mpuevo uapua yaliendi, kaha mutue ua Kilistu uapua Njambi. 4 Kaha yala uoshe uje alombela cipue ahandeka vunanguizi oku nafuiki ku mutue uendi, kasingimikile mutue uendi. 5 Vuno honi mpuevo uoshe uje alombela cipue ahandeka vunanguizi cakuhona kulifuika ku mutue uendi kasingimika mutue uendi, mucifua cimo vene vinkambu viendi ngue vanavitehula. 6 Vuno honi nga mpuevo kafuiki ku mutue uendi, kaha napande kutehula vinkambu viendi, vuno honi nga cinapu cashuamua kuli mpuevo kulitehula vinkambu viendi, kaha napande kufuika ku mutue uendi. 7 Muomu yala kapandele kufuika mutue uendi, omo ikeye uapua cifua na vumpau vua Njambi, vuno honi mpuevo uapua vumpau vua yala. 8 Muomu yala kuvamutangele kuhuminina kuli mpuevo, vuno honi mpuevo vamutangele kuhuminina kuli yala. 9 Muomu yala kuva mutangelele mpuevo, vuno honi mpuevo vamutangelele yala. 10 Omu mukemo mpuevo napande kufuika ku mutue uendi muomu ya tungelo. 11 Cipue ngocovene, muli Muene mpuevo kalimanena likaliendi kuakuhona yala kaha cipuevene yala kalimanena likaliendi kuakuhona mpuevo. 12 Muomu ngue muje mpuevo vamutangele kuhuma hali yala, mucifua cimovene yala ikeye honi nasemuka kuli mpuevo. Kaha viuma vioshe viahuminina kuli Njambi. 13 Lisompeni yeni vavenia, nkuma cacili mpuevo kulombela kuli Njambi oku kalifuikile ku mutue ndi? 14 Nkuma keti cisemua ca viuma cikeco camilongesa yeni ngeci nga yala ali na vinkambu vialaha evuisa shuamua, 15 vuno honi nga mpuevo ali na vinkambu vialaha, nkuma keti cikeco kulihalesa cendi ndi? Muomu vinkambu viendi vamuhanavio kupua kulifuika cendi. 16 Nga muntu uoshe atualelelaho lutue kulinga vimpata, kutuesi na cisemua ceka naua, cipue mu vikungulukilo via Njambi.

17 Vuno honi ha vishika vimo kunjimishangazala, muomu yeni nga muliuana hamo kaha kuliuana ceni kucekupua cacili vuno honi cakupihisa. 18 Cakulivanga, omo muliuana hamo hakupua cikungulukilo, njilinakuivua ngeci kuli mahangununo hakati keni, kaha njili nakucitsiliela. 19 Cilivene hanapande kukala lihangununo hakati keni linga vavazivukileho vaje vali na vusunga. 20 Kaha omo muliuana hamo, keti ngue muli nakulia mesa ya Muene. 21 Kaha omo muli na kulia, muntu na muntu ali nakuya kulutue na via kulia viendi, kaha mukuavo natsi njala mukuavo ikeye napende. 22 Vika honi! Nkuma kumuesi na vinjivo via kulilamo na via kunuinamo ndi? Cipue nkuma muka sembulula cikungulukilo ca Njambi nakuvuisa shuamua vaje kuvesi na cimo ndi? Nkuma vika honi njikahandeka kuli yeni? Nkuma njimishangale mu cuma eci ndi? Houe kunjilingimo.

23 Muomu vije vinjatambuile kuli Muene vikevio vije njamihanene yeni, ngeci Muene Yesu ha vutsiki vuje omo vamuendele vungungu uambatele mbolo, 24 kaha hanima yakuhana citsantsela, uayipazuile nakuhandeka nguendi, "Ou ukeuo muvila uange uje uvanamihana yeni, kaha lingeni eci mukunjivuluka." 25 Mu ngila imo vene uambatele nganja naua hanima ya kulia mbolo kaha uahandekele nguendi, "Eyi nganja inapu litavasano lialiha mu maninga ange. Lingeni eci ntsimbu yoshe omo munuinamo mukunjivuluka." 26 Muomu ntsimbu yoshe muli na kulia eyi mbolo na kunuina mu nganja eyi, kaha mukulinga eci muli nakuhana vukaleho vua kutsa ca Muene noho akeja. 27 Nankuma uoshe uje alia mbolo cipue anua ku nganja ya Muene kuakuhona kasingimiko ali na mulonga ua upi uakuluisa muvila na maninga a Muene. 28 Eceleni muntu uoshe alihilule ikeye vavenia, ntsimbu kanda alie mbolo na kunuina mu nganja. 29 Muomu muntu uoshe uje alia na kunua cakuhona kuzivuka muje vika uje muvila ua Kilistu ualia na nganja ije yanuina muvilumbunuka, kaha alinehela kusompa hali ikeye vavenia. 30 Omu mukemo vuingi vueni muazeye na kuvavala, kaha vamo vanatsi. 31 Vuno honi nga tulisompa yetu vavenia mu vusunga, kaha kuvapandele kutusompa. 32 Vuno honi nga vanatusompo kuli Muene, kaha vanatuhaka mu ngila ya cili linga keti vatuhisile hamo na vaka mavu. 33 Nankuma vamuanetu nga muliuana hamo mu kulia mesa ya Muene, livandameneni umo na mukuavo, 34 nga kuli umo natsi njala napande kulila ku njivo yendi, linga honi omo muliuana hamo keti linga vamihise, kaha ha viuma vikuavo njikahana vishika omo njikeja.