1 Yange Paulu uje ivasanene ku cizango ca Njambi kupua kanganda ua Kilistu Yesu, njili na muanetu Timateo.

Tulina kusonekela ku cikungulukilo ca Njambi cije cili ku Kolinte, naku vantu vakulela va Njambi voshe vaje vali mu Akaya muoshe.

2 Kavumbi na ciyulo vikale kuli yeni vije vihuminina kuli Njambi Tatetu na Muene Yesu Kilistu.

3 Tushangazala Njambi Ishe ya Muene uetu Yesu Kilistu, Tate ua cikeketima, ikeye Njambi kuje kukahumu kuzembeleka coshe! 4 Ikeye muka kutuzembeleka mu tuyando tuetu tuoshe, ngeci netu linga tuase kuzembeleka vaje vali mu tuyando tuakuliseza seza, na kuzembeleka cije catuzembelekele naco yetu ca kuhuminina kuli Njambi. 5 Ngue muje mutukalipangela mu vuingi mu tuyando tua Kilistu, mukemuo vene naua tuli nakulipangela mu vuingi mu kuzembeleka ca Kilistu. 6 Nga tuyanda, tuyandela kuzembeleka na kuovoka ceni, cipue nga vatuzembeleka kaha neni naua vamizembeleke, kuzembeleka cije ciminehela lukakateya na kusimpa mu tuyando tuakulifua tuje tutuli nakuyanda netu naua. 7 Nankuma, kutsiliela cetu muli yeni cakolo, muomu tuazivuka nguetu ngue muje mutuli nakulipangela hamo mu tuyando tuetu, mukemuo naua vene mutukalipangela hamo mukuzembeleka cetu.

8 Vamuanetu muomu kututondo linga mukale kunzimba ha tuyando tuje tuahitilemo tele tuli mu Asiya. Muomu tuakele mulamba cikuma, ngeci kutuakele nakutsiliela nguetu tukayoya naua. 9 Tuayonguele nguetu kutsa vene vacihakele hali yetu, vuno honi eci calingiuile ngeci keti tulitsiliele yetu vavenia, vuno honi kuvanga kuli Njambi lika uje muka kusangula vatsi. 10 Uatuhumisile mu vushonde vuakama vua kutsa, kaha akatuovola, hali ikeye tunahaka kutsiliela cetu ngeci akatuovola naua. 11 Neni naua munapande kutukuasa na malombelo eni ngue muje muli nakutukuasa ha malombelo eni akutulombelela, linga vavengi vakahane citsantsela muomu yetu na muomu ya cikuisulo civatuhanene yetu cinapu cikumbululo ku malombelo amengi.

12 Muomu kulihalesa cetu cikeco eci, vukaleho vua visinganieka vietu via kuyoya cetu hano ha mavu, kaha cikuma vene na hali yeni, nakulela na vusunga vuakuhuma kuli Njambi keti na mana a vuntu houe, vuno honi na kavumbi kakuhuma kuli Njambi. 13 Muomu tukamisonekela lika vije vimuasa kutanda na kuvuisisa. Kaha njitsiliela ngeci mukevuisisa mukushula. 14 Ngue muje mumunovuile ku vimo, ngeci munapande kulihalesa muomu yetu kaha netu naua tulihalesa muomu yeni ha litangua lije lia Muene uetu Yesu.

15 Muomu cilivene njavizivukile viuma evi, njatondele kuija kuli yeni ha kulivanga linga ngeci muvuahelele luvali. 16 Njatondele kumimenekela ha vungenzi vuange vuakuya ku Masendoniya, kaha naua nahakuhilukamo kuhuma ku Masendoniya, ngeci njiuane ngila yakunjikuasa ha vungenzi vuange vuakuya ku Yundeya. 17 Omo njatondele kulinga eci, nkuma njakele na mitima ivali ndi? Cipue nkuma njikalingi matumbe ange ngue vaka mavu vaje valivuahesela kuhandeka nguavo "Eyo," na "Houe," ha ntsimbu imolika ndi? 18 Ngue muje cilivene Njambi uapua uakulongua, lizi lietu kuli yeni kuliapuile, "Eyo" na "Houe." 19 Muomu Yesu Kilistu Muna Njambi, uje ituambuluile hakati keni, kuli yange na Silase na Timateo, kapuile "Eyo" na "Houe" vuno honi muli ikeye ntsimbu yoshe muakala lika "Eyo," 20 Muomu vikulaheso vioshe via Njambi vikauana "Eyo" yavio muli ikeye. Muomu ha cuma eci mukemo tukahandeka "Ameni," kuhitila muli ikeye ku vumpau vua Njambi. 21 Vuno honi Njambi ikeye akatukolesa ngoo muli Kilistu, na kutuvuavesa yetu. 22 Nahaka kapateso kendi hali yetu, na kutuhana Cimbembesi cendi mu mitima yetu kupua ngue vikulaheso vije vianatutulikila kulutue.

23 Vuno honi njitumbula Njambi kupua mukaleho uange, azivuka mutima uange! Mu ngila ya kumitetela njayonguele ngeci keti njiye ku Kolinte. 24 Keti ngue tuli nakumisindiya vije vimunapande kutsiliela houe, tulina kupanga hamo neni muomu yanzolela yeni, muomu yeni munemana ngoo mu lutsilielo lueni.