1 Eyi inapu ntsimbu ya mucitatu ije njija kuli yeni. Mulonga uoshe uapande kukala na vakaleho vavali cipue vatatu. 2 Njananguile vaje valingile vupi ha kulivanga na vaje vakuavo voshe, kaha njivanangula hano oku njiuahiko, ngue muje munjalingile oku tele kunjili ha vungenzi vuange vua mucivali, ngeci nga njija naua kaha kunjikavovola, 3 muomu mutonda cimueso ngeci Kilistu ali nakuhandeka muli yange. Kapuile uakuzeya linga amihonoue, vuno honi uapua uanzili muli yeni. 4 Muomu vamushukikile mukuzeya, vuno honi uayoya ha nzili ya Njambi. Muomu tuapua vakuzeya muli ikeye, vuno honi mu vusamba neni tukayoya hamo nendi ha nzili ya Njambi.

5 Lihiluleni yeni vavenia, linga mumone indi hanga muakakateya ku lutsilielo lueni. Liesekeni yeni vavenia. Nkuma kumuazivukile ngueni Yesu Kilistu ali muli yeni ndi? Kuvanga mulihilule keti ngoconi cilivene kaha munahonoua ceseko! 6 Njitsiliela nguange mukauana ngueni kutuahonouele. 7 Vuno honi tulomba kuli Njambi ngeci keti mulinge viavipi, keti cisholoke ngue yetu tunasa eci ceseko, vuno honi linga mulinge vije via kusungama, cipue vene oku cimuesa ngeci tunahonoua. 8 Muomu kutuasa kulinga vioshe hakuluisa vusunga, vuno honi vioshe lika muomu ya vusunga. 9 Muomu tuna vuahelela ngeci yetu tunapu vakuzeya kaha yeni muvakukolesa. Yetu tuli nakulomba lika mutualeleleho lutue. 10 Njilinakusoneka eci oku kunjesi hamo neni, linga ngeci omo njija keti cikanjikaluuile mukupangesa nzili yakama ije Muene nanjihana yakutunga kaha keti yakushandola.

11 Cakumanusuila, vamuanetu, saleniho. Kakateyeni kulinga viuma via kulumbunuka, ivuilileni kukulambelela cange, litavasaneni umo na mukuavo, yoyeni mu ciyulo. Kaha Njambi ua cizango na ciyulo akakala neni.

12 Lihinduiseni umo na mukuavo na kulitsemba ca kulela.

13 Vantu voshe vakulela va Njambi vanatumu vihindu kuli yeni.

14 Kavumbi ka Muene Yesu Kilistu na cizango ca Njambi na kulitombola ca Cimbembesi Uakulela vikale neni voshe.