1 Yange Paulu, njimilambelela nakulikehesa na kulionuenesa ca Kilistu, yange uje uakulikehesa omo njilineni, vuno honi njiuakukaluua kuli yeni nga kunjesi hamo neni. 2 Njimilambelela ngeci omo njija hamo kunjikamuesa kukaluua ngue munjitondelamo ku vantu vamo vaje vasinganieka nguavo tuayoya mu futisi ya mavu. 3 Muomu cipue vene tuayoya ha mavu, vuno honi yetu kutuekulua nzita ngue muje muvakalingilamo vaka mavu, 4 muomu vitua vije vitukalu navio keti via hano ha mavu vuno honi vikevo vili na nzili ya Njambi ije yasa kunongesa vinganda. 5 Tukanongesa vimpata na cakutanganesa coshe cije cakulihalesa cije ciluisa mana a Njambi, kaha tukalingi viyongola vioshe kupua vunzinda linga viononoke Kilistu. 6 Kaha tukalivuahesela vualumo kuhana kashitiko ku vilinga vioshe vije viakuhona kuononoka, omo nga yeni munapuisamo kuononoka ceni.

7 Yeni mukamono lika muje viuma mu visholokelamo hambanza. Nga kuli vamo vakalitanda nguavo vapua vantu va Kilistu, kaha vanapande kusinganieka ngeci netu naua tuapua tuvaka Kilistu. 8 Muomu cipue vene nga njilihalesa cikuma ha nzili yakama ije Muene uahanene mukumitunga yeni kaha keti mukuminongesa, kunjika ivuila shuamua. 9 Kunjitondo cimuese ngeci njilinakumiteuesa na mikanda yange. 10 Muomu vamo vahandeka nguavo, "Mikanda yendi yapua yakulema nakukola, vuno honi muvila uendi uapua uakuzeya, kaha navihandeka viendi viapua viakuhona seho." 11 Vantu ava vanapande kuzivuka ngeci vije vitukahandeka mu mikanda omo tuvahiko, vikevio tukalingi omo kutuli.

12 Kutuekutonda kulijundula cipue kulisetekesa yetu vavenia navamo vaje vakalijundula vakevo vavenia. Vuno honi omo nga valieseka vakevo vavenia ku umo na mukuavo, vakahandeka nguavo vakevo vapua vacili. Kaha valiseteka vakevo vavenia cakuhona kuvuisisa. 13 Kutukalihalesa mukupulakana, vuno honi kulihalesa cetu cikapuamo kuya muje Njambi natuhanenamo, eci cipandakana vene na vipangi vije vitunalingi kuli yeni. 14 Muomu kutuesi na kutualelelaho kulihalesa cetu ngue yetu kutuezile kuli yeni, yetu tuapuile vakulivanga kuhuma kulahako nakuminehela Muzimbu Uacili ua Kilistu. 15 Kutukalihalesa kupulakana seteko yetu mu vipangi vije vivanalingi vakuetu veka, vuno honi kutsiliela cetu cinapu ngeci lutsilielo lueni linga lulivuezelele na vipangi vietu hakati keni linga vilivuezelele, 16 ngeci tuase kuambulula Muzimbu Uacili keti kuli yeni lika vuno honi na mu vinganda vieka, kuakuhona kulihalesa ha vipangi vije vivanalingi laja vakuetu.

17 Vuno honi ngue muje muvihandeka visoneka kuavio, "Eceleni uoshe uje alihalesa, alihalesele hali Muene." 18 Muomu keti muntu uje alijundula ikeye vavenia ikeye uje ivakatambula, vuno honi muntu uje Muene akajundula.