1 Njapande kulihalesa cipue vene nacimo cahi cinjasa kuuanaho, vuno honi njitualelelaho na vimona na visholola via Muene. 2 Njazivuka yala umo muli Kilistu uje ha miaka makumi auana laja vamutualele ku lilu lia mucitatu, yanini honi indi capuile ku muvila indi keti ku muvila kunjizivuka, Njambi lika ikeye azivuka. 3 Kaha njazivuka ngeci yala ou vamutualele mu Palandaisi, yanini honi indi ku muvila cipue keti ku muvila kunjizivuka, Njambi lika ikeye azivuka. 4 Kaha njovuile viuma vije kuvasa kuviambulula, vije muntu kasa kuhandeka. 5 Hakuimanenako ou yala njilihalesa, vuno honi hakulimanena yange vavenia kunjikalihalesa, kuvanga lika via kuzeya cange. 6 Kaha cipue vene nga njitonda kulihalesa, kunjikapu njicilema, muomu njikahandeka vusunga. Vuno honi kunjitondo kucilinga, linga keti muntu umo asinganieke cikuma hali yange kupulakana vije viamona muli yange cipue vievua kuli yange.

7 Kaha hakulinga yange keti njilihalese cikuma na vuingi vua visholola, ngeci vanjihakele mbimbo mu muvila, linga kanganda ua satana anjipakese, ngeci keti njilihalese cikuma. 8 Njalambelele Muene ha vintsimbu vitatu hali eci, linga cinjiseze. 9 Vuno honi uahandekele kuli yange nguendi, "Kavumbi kange kanapu kakama hali yove, muomu nzili yange yapua ya vusunga mukuzeya." Kaha njikavuahelela cikuma nakulihalesa ha kuzeya cange linga nzili ya Kilistu ihuimine hali yange. 10 Muomu ya Kilistu, njapuisamo na kuzeya, na vituka, na kuhundangana, na mapakeso na lamba, muomu nga njinazeye, ambahoni njikolesa.

11 Njilinakulinga ngue njicilema, muanjisindiiye linga njifuemo, muomu yeni muanjitavesele. Muomu kunjapuile njiuamundende kuli vaje valitumbula vavenia nguavo tunganda vakama, cipue vene yange nji muntu lika. 12 Vimueso via kanganda ua vusunga va vilingile hakati keni mukusimpa coshe, na vimueso na vikomoueso na vipangi via kuhiana 13 Nkuma vamikehesele vati hakati ka vikungulukilo vieka, oku yange kunjapuile citeli kuli yeni? Njikonekeleni ku kupihisa eci!

14 Honi njalivuahesela vualumo mukumimeneka ha ntsimbu ya mucitatu. Kaha kunjikapu citeli, muomu kunjitondo vije vinapu vieni vuno honi yeni, muomu vana kuvapandele kuniunga visemi vavo, vuno honi visemi kuniunga vana vavo. 15 Njikavuahelela cikuma kuhana na kunjihana muomu ya miono yeni. Nga yange njimizanga cikuma, kaha nkuma yange cinapande kunjizanga kavundende ndi?

16 Taveni ngeci yange kunjapuile citeli kuli yeni, vuno honi mukahandeka ngueni njapuile muka kuzangama na kumikuisa na makuli. 17 Nkuma njamizangamenene kuhitila muli vaje njatumine kuli yeni ndi? 18 Njalambelele Tito linga eje kuli yeni kaha njamutumine hamo na muanetu. Nkuma Tito uamizangamenene ndi? Nkuma kutualingile vilinga via cimbembesi umo lika ndi? Nkuma kutuendele mumolika ndi? 19 Nkuma vintsimbu vioshe muka singanieka ngueni tukaliluila yetu vavenia kuli yeni ndi? Ku mesho a Njambi kukeko kutuli nakuhandeka muli Kilistu, kaha vioshe evi vinapu viakutunga ceni vamuanetu. 20 Muomu njiteua nguange omo njikeja kaha njikamiuana muje kunjatondele, kaha naua nange mukanjiuana muje kumuatondele. Kaha kukakala kulicokota, na lifuua, na vutenu, na cipululu, na kuli zanga yeni vavenia, na kulishaula, na kulifueya, na kulihalesa, katumamesi kakuhona kuyilamo. 21 Njili na kuteua ngeci omo njikeja naua Njambi yange hamo akanjikehesa ku mesho eni, kaha hamo njikalila muomu ya vantu vavengi vaje valingile vupi laja kaha kuvatengulukile ku kulijualesa, na kuvupangala na ku vilinga via kuteuesa vije vivalingile.