1 Muomu tuzivuka nguetu, nga mbalaka ya hano ha mavu ije ituakalamo vainongesa tuli na njivo kuli Njambi, njivo ije keti yakutunga na mavoko vuno honi ya yaye muilu. 2 Hano cilivene tuli nakulikemanga, kaha tushunguiya cikuma Njambi linga atuzike muvila uje ukapua ngue njivo yetu ya muilu. 3 Linga haku uzala kaha keti tukakale vuntselentsele. 4 Muomu tucili na kuyoyela mu mbalaka eyi, tulina kulikemanga na tuyando, keti ngue nguavo tutonda linga vatuhumise muvila ou uaka ntsimbu lika, vuno honi linga hanga vene vatuzikeuo ngeci uje muvila uakutsa vaumine ku muono. 5 Uje natuvuahesela cuma eci ikeye vene Njambi uje natuhana Cimbembesi kupua fueto ya kushulisisa cikulaheso.

6 Nankuma ntsimbu yoshe tunasimpi cikuma. Tuazivuka nguetu muomu tucili kuimbo mu muvila kaha tuli kulahako na Muene. 7 Muomu tukende na lutsilielo keti na mesho. 8 Tuasimpi cikuma kaha tuasa kuhuma mu muvila ou nakuya kuimbo kuli Muene. 9 Nankuma cipue tuli kuimbo indi tuvahiko, vitukatondoni kumuvuahelesa. 10 Muomu tuva voshe tunapande kusholoka ku cituamo ca kusompa ca Kilistu, linga umo na umo atambule vucili cipue vupi kuya ku vije vianapanga mu muvila.

11 Nankuma, muomu ya kuzivuka kuvuila Muene liova, tusindiya vantu vuno honi Njambi ikeye azivuka muje mutuafua kaha njatsiliela nguange neni vene naua muacizivuka mu mana eni. 12 Kutuesi nakulizumbuoka yetu vavenia kuli yeni naua vuno honi kumihana cije cilingisa ngeci mulihalese muomu yetu, linga neni cimiasiuise kukumbulula vaje vali na kulihalesa vakevo vavenia ku mesho a vantu keti ngue ha vilinga viavo. 13 Muomu nga yetu kutuesi nakusinganieka muacili, kaha cinapu muomu ya Njambi. Nga naua tusinganieka muacili kaha cinapu muomu yeni. 14 Muomu cizango ca Kilistu cikeco cikatuendesa, cilivene tuzivuka nguetu umo uatsililile voshe. Nankuma voshe vanatsi. 15 Kaha uatsililile voshe, linga voshe vaje vayoya keti valiyoyele vakevo vavenia vuno honi hali ikeye uje muomu yavo ngeci uatsile kaha vamusanguile. 16 Nankuma hume hano honi, kutukambata muntu uoshe kuya ku cifua ca vuntu, cipuevene nguavo ntsimbu imo tuambatele Kilistu mu cifua ca vuntu, vuno honi kutuka muambatamo naua. 17 Nankuma, nga kuli umo uje ali muli Kilistu, kaha napu kutanga ca ciha. Kaha via laja vinahiti, taleni, viavihia vineja. 18 Vioshe evi vihuma kuli Njambi, uje kuhitila muli Kilistu uatukonekelele linga tuije kuli ikeye kaha uatuhanene cipangi ca kulikonekela umo na mukuovo. 19 Kaha kuhitila muli Kilistu, Njambi uakonekelele mavu naku aneha kuli ikeye vavenia cakuhona kutanda milonga yavo ije yakuvaluisa nayo kaha nakundika kuli yetu muzimbu uakulikonekela umo na mukuavo.

20 Nankuma, yetu tunapu vaka kuimanena Kilistu, Njambi alina kumilania kuhitila muli yetu. Tumilambelela hali Kilistu, likonekeleni kuli Njambi. 21 Kaha muomu yetu, Njambi uamupuisile muka vupi uje kazivukile vupi, linga kuhitila muli ikeye ngeci tupue vaka vusunga kuli Njambi.