1 Muomu, njayonguele mu mutima uange nguange kunjikejaho naua kuli yeni nakumivuisa kupihia ku mitima. 2 Muomu nga njikamiuvuisa kupihia, kaha iya naua akanjivuisa kuvuahelela nkuma keti yeni vene vaje vanjinovuisa kupihia ndi? 3 Kaha njasonekele ngue muje vene munjasonekelelemo, linga omo njikeja keti njikakale mulamba kuli vaje vanapande kunjivuahelesa, muomu njamitsiliela yeni voshe, ngeci nzolela yange ikeyo vene nzolela yeni muva voshe. 4 Njamisonekelele nakupihilila cakama cikuma na kulinienga mu mutima na misozi yaingi, ngeci keti njimipihise ku mutima, vuno honi linga muzivuke cizango cakama cije cinjakala naco hali yeni.

5 Vuno honi nga umo na vulumuina mukuavo, kavulumuinine cikuma yange ngue muje muanavulumuina yeni voshe, muomu kunjatondele ngeci njipue uamukalu kuli ikeye. 6 Muomu eci cinapumo kuli muntu uje ivanahana kashitiko ku vantu voshe vavengi. 7 Kaha naua cipue ngocovene munapande kumukonekela na kumuzembeleka, keti ngoconi akakala na vusiua cikuma. 8 Nankuma njimilomba nguange mu mumuese cilivene nkuma muamuzanga. 9 Muomu eci cikeco canehesele linga njisoneke uje mukanda, ngeci njase kumieseka na kumona nga yeni muononoka mu vioshe. 10 Muntu uoshe uje imukonekela nange naua njimukonekela, kaha vije vinjinakonekela, nga njakonekela vioshe kaha cinapu muomu yeni ku mesho a Kilistu, 11 linga Satana keti atuhiane, muomu yetu kutuesi kunzimba namatumbe endi.

12 Omo njayile ku Tolouase na kuambulula Muzimbu Uacili ua Kilistu, vanjishokoluelele cikolo kuli Muene. 13 Vuno honi njaliniengele cikuma omo kunjauanene muanetu Tito kuje. Nankuma njavasezele, nakutualelelaho kuya ku Masendoniya.

14 Vuno honi njitsantsela kuli Njambi, muomu muli Kilistu ntsimbu yoshe ikeye natutuamenena ngue vinzinda vakuhiana muli Kilistu. Njambi akatupangesa mukulingisa Kilistu ashandoke ngue luengo luacili luakumuzivuka kuoshe kuoshe. 15 Muomu tuapua ngue luengo luacili lua Kilistu kuli Njambi hakati kavaje vali na kuovoka na hakati kavaje vali nakunonga. 16 Kaha kuli vamo napu luengo luakuhuma kukutsa nakuya kukutsa, kaha kuveka napu luengo lua kuhuma ku muono nakuya ku muono. Nkuma iya honi napuisamo ha viuma evi? 17 Muomu kutuafuile ngue vaje vakalandesa lizi lia Njambi, vuno honi ngue vamala va vusunga vaje vavanatumu kuli Njambi, ku mesho a Njambi tuhandeka muli Kilistu.