1 Nankuma, muomu ya kuhitila mu cikeketima ca Njambi ngeci tuli na vipangi evi, kaha keti tuzeye. 2 Tunaviana viuma via vushueke via shuamua, kutue kupangesa makuli kaha naua kutue kuhandeka lizi lia Njambi mu makuli. Vuno honi hakuhandeka vusunga tulizumboka yetu vavenia ku mana a muntu uoshe ku mesho a Njambi. 3 Kaha cipue vene nga Muzimbu Uacili uetu vanaushueke, kaha vanaushuekela lika kuli vaje vanonga. 4 Kuli vakevoni njambi ua mavu aua napuisa mana a vaje vaka kuhona kutsiliela vupuputua linga keti vamone ceke ca Muzimbu Uacili ua vumpau vua Kilistu, ikeye uje cifua ca Njambi. 5 Muomu vije vitukambulula kutue kuliambuluila yetu vavenia, vuno honi Yesu Kilistu hakupua Muene, kaha netu naua tunapu vangamba veni muomu ya Yesu. 6 Muomu Njambi ikeye vene uahandekele nguendi, "Eceleni ceke citue ha milima," Njambi ikeye vene uatuililile mu mitima yetu mukutuhana ceke ca mana a vumpau vua Njambi ku mesho a Kilistu.

7 Vuno honi tuli na vufuko ovu mu vindeho via vuma mukumuesa ngeci nzili yakama yakala kuli Njambi keti kuli yetu. 8 Tukakala mu vukalu mu vingila via kuli seza seza, vuno honi ku ekutuhiana, akatukuomouesa vuno honi ku ekutumanusula kutsiliela coshe. 9 Vakatupakesa vuno honi kekutuseza, vaka tuvulumuina vuno honi kuve kutunongesa. 10 Ha vintsimbu vioshe tukambata kutsa ca Yesu mu mivila yetu, linga muono ua Yesu vaumone mu mivila yetu. 11 Muomu tuyoya ntsimbu yoshe tuli mu makalu akutsa muomu ya Yesu, linga muono ua Yesu ulimuese mu mivila yetu, ije yasa kutsa. 12 Nankuma kutsa cili nakupanga muli yetu, vuno honi muono uli na kupanga muli yeni.

13 Nankuma muomu tuli na Cimbembesi ca kulifua ca lutsilielo ngue muje muakala naco uje uasonekele nguendi, "Njatsilielele kaha njahandekele," Netu naua tutsiliela ngeci tukahandeka. 14 Ha kuzivuka ngeci uje uasanguile Muene Yesu akatusangula netu naua hamo na Yesu nakutuneha yetu hamo neni ku mesho endi. 15 Vioshe evi vinapu muomu yeni, linga kavumbi kahete ku vantu vavengi cikuma ngeci kavuezelele kuhana kutsantsela ku vumpau vua Njambi.

16 Nankuma keti tuhonoue. Cipue vene oku muvila uetu uahambaza uli na kuzeya vuno honi muvila uetu uamu ntima vali nakuulinga vuha ntsimbu yoshe. 17 Muomu tuyando otu tua ntsimbu yaindende tuli nakulingisa yetu kulivuahesela kutambula kavumbi kayaye kaje kakama cikuma kupulakana tuyando tuje. 18 Muomu yetu kutue kuyongola viuma vije vivamona vuno honi viuma vije kuvekumona, muomu viuma vije vivamona viapua via kantsimbu lika vuno honi viuma vije kuvamono viapua via yaye.