1 Honi kucesi na seho naua yange kumisonekela ha vukuasi vua vantu vakulela va Njambi. 2 Muomu njazivuka ngeci muakala na cizango cakukuasa, cije cinjikalihalesela muomu yeni ku vantu vamu Masendoniya, njikahandeka nguange vaka Akaya vanalivuahesela vualumo hume muakauali kukuasa, kaha cizango ceni cinakolesa vavengi vavo. 3 Vuno honi njilina kutuma vamuanetu linga kulihalesa cetu hali yeni ha cuma eci keti ciye muangoco, linga mulivuahesele vualumo, ngue muje munjahandekele nguange mulinge. 4 Keti ngoconi, hamo nga vaka Masendoniya vamo veja nange kaha nakuuana nguavo yeni kumualivuaheselele vualumo, kaha tukevua shuamua, nacimo cahi vakahandeka hali yeni muomu vamitsiliela laja. 5 Nankuma, njacisinganiekele ngeci cinapande kutuma vamuanetu linga valivange kuija kuli yeni ntsimbu kanda yange njihete, linga mulivuahesela vualumo vuana vuje vumuakulahesele, cimuese ngeci mulinakuhana muomu mutonda kucilinga keti ngue valina kumisindiya.

6 Anukeni eci ngeci uoshe uje akuna viavindende akateja naua viavindende, kaha uoshe uje akuna viavingi akateja naua viavingi. 7 Umo na umo ueni napande kuhana vije vianasinganieka mu mutima uendi ku vihana, keti oku ulinienga, cipue ngue vanakusindiya, muomu Njambi uazanga uje muka kuhana na mutima umo. 8 Kaha Njambi asa kukuhana cikuisulo coshe mu vuingi, linga ntsimbu yoshe ukale na viavingi kaha naua uase kukala na viavingi muvuingi, viakulikuasesa ku vipangi viacili. 9 Ngue muvana cisoneka nguavo,

"Akahana voshe vaje vanajena,

vusunga vuendi vuapua vuayaye."

10 Kaha uje muka kuhana mbuto kuli ndimi na mbolo kupua cakulia, akamihana na kuvuezelela viuma vieni nakuvuezelela kuteja ca vusunga. 11 Mukafuka mu vingila vioshe linga mukale na ngozi yakuhana cikuma vintsimbu vioshe, kaha kuhitila muli yetu ngozi yeni ikapua citsantsela kuli Njambi. 12 Muomu cipangi eci cimuli nakupanga keti lika cakukuasa vantu vakulela va Njambi vaje vanajena vuno honi naua cinapu kuneha kushula mu vitsantsela viavingi kuli Njambi. 13 Muomu ya cipangi cije munamuesa yeni vavenia, vavengi vakalemesa Njambi ha kuononoka cije cinalipandakana nakuambulula ceni ca Muzimbu Uacili ua Kilistu, kaha muomu ya ngozi yeni mukulipangela navo na veka voshe. 14 Kaha mu malombelo avo hali yeni, vakashoto mitima yavo muomu ya kavumbi kakama kaje kanamihana Njambi. 15 Tutsantseleni Njambi muomu ya vuana vuendi vuje kutuasa kulumbununa!