1 Nankuma vamuanetu, omo tuli na vikulaheso evi tuyeni tulilelese yetu vavenia ku vioshe vije vijualesa muvila na Cimbembesi. Kaha tuyeni tulilelese muavusunga muomu yakuvuila Njambi liova.

2 Tushokolueleni mitima yeni, naumo uahi utunapihisila, kaha naumo uahi utunazimbalesa lutsilielo luendi kaha naumo uahi naua utunakuisa. 3 Kunjesi nakuhandeka evi mu kumisompa, ngue muje munjahandekele ha kulivanga nguange muli mu mitima yetu, tukatsa hamo na kuyoya hamo. 4 Njili na lutsilielo luakama muli yeni, njili nakulihalesa cikuma muli yeni, kaha njashulu na kusimpa na mu tuyando tuetu tuoshe njili na nzolela yakama.

5 Muomu cipuevene tuezile mu Masendoniya mivila yetu kuyahuimine vuno honi ntsimbu yoshe tuakele mulamba nakulua na veka kaha naliova muli yetu. 6 Vuno honi Njambi uje muka kusimpisa vaje vanazeye, uatusimpisile mukuija ca Tito, 7 kaha keti lika hakuija cendi vuno honi naua nakusimpa cije civamusimpisile muli yeni ngue muje muatulekele cishota mitima ceni, nakulila ceni, na cizango ceni cakama cikuma hali yange linga nzolela yange ipue yakama cikuma.

8 Muomu cipuevene njamivuisile vusiua na mukanda uange, kunjalipayele (cipuevene nguavo njalipayele), muomu njamuene ngeci uje mukanda uamiuvuisile vusiua cipuevene capuile mu kantsimbu lika. 9 Ngue muje mucinafu njivuahelela, keti ngue nguavo muomu muakele na vusiua vuno honi muomu vusiua vueni vuapuile vua kutenguluka ku vupi vueni muomu muovuile vusiua vua vunjambi, kaha kumuayandele muangoco hamo yetu. 10 Muomu vusiua vua vunjambi vukanehe kutenguluka cije cituala kukuovoka kaha kucekuneha kulipaya, vuno honi vusiua vua mavu vukanehe kutsa. 11 Muomu taleni vusunga vua vusiua vua vunjambi vuje vivunaneha muli yeni, cilivene muje muvunamuesa vusunga vueni, taleni vutenu vuje vuasholokele, kulikomokela eci, cishota mutima eci, na cizango cakama eci, na kashitiko kakama aka. Mu vintsimbu vioshe mualimuesa yeni vavenia ngeci kumuesi na mulonga mu cuma eci.

12 Nankuma cipue vene njamisonekelele mukanda, kuuapuile ya mulonga ua umo uje ualingile vupi cipue ha mulonga ua umo uje uayandele muomu ya vupi, vuno honi linga cizango ceni cakama hali yetu cisholoke kuli yeni ku mesho a Njambi. 13 Nankuma vatuzembeleka.

Kaha muku tuzembeleka cetu tuavuahelele cikuma muomu ya nzolela ya Tito, muomu mana endi anahuimi muomu yeni. 14 Njalihalesele kuli ikeye muomu yeni, kunjevuile shuamua vuno honi muomu ngue muje vene vioshe vije vituahandekele kuli yeni viapuile via vusunga, nankuma kulihalesa cetu kuli Tito capuile ca vusunga. 15 Kaha cizango cendi hali yeni capua cakama cikuma muomu nga avuluka kuononoka ceni voshe, na liova nakujaja cije cimuamutambuile naco. 16 Njivuahelela muomu njili na lutsilielo lua kusimpa muli yeni.