1 Hakupua vaka kupangela hamo na Njambi, tumilambelela nguetu keti mutambule kavumbi ka Njambi nakukecela linga kaye muangoco. 2 Muomu Njambi nahandeka nguendi,

"Ntsimbu yacili yahetele

njamivuililile,

kaha njamikuasele ha litangua lia kuovoka."

Taleni, honi ntsimbu yacili ino, kaha taleni naua litangua lia kuovoka lino.

3 Kaha tuli na kueseka linga keti tuhake citsuntsuiso mu ngila ya muntu uoshe, ngeci keti vakauane mulonga na vipangi vietu. 4 Vuno honi hakupua vangamba va Njambi tulihana yetu vavenia mu vioshe kuhitila mu lukakateya luakama, na mu tuyando, na mu lamba, na mu vitanga, 5 na mu vipumpu, na mu tumenga, na mu kulua, na mu kuhundangana, na mu cilavu lavu, na mu njala, 6 na mu kulela, na mu mana, na mu kusimpa, na mu ngozi, na mu Cimbembesi Uakulela, na mu cizango ca vusunga, 7 na mu kuhandeka ca vusunga, na mu nzili ya Njambi, na mu vitua via vusunga via ku livoko lia cilio na lia cimoshue. 8 Mu kasingimiko na mukuhona kasingimiko, mukutushaula na muku tushangazala. Vali nakutuambata ngue tuvaka makuli vuno honi tuvaka vusunga, 9 ngue vaje kuvatuzivuka, vuno honi vatuzivuka, ngue vaje vanatsi, kaha taleni tuyoya ngue vaje vali hakashitiko, vuno honi kanda vavatsihe, 10 ngue vaje vali mu vusiua, vuno honi ntsimbu yoshe tujolela, ngue vihutu, vuno honi tukapuisa vantu vavengi kupua vaka kufuka, ngue vaje kuvesi nacimo, vuno honi tuli navioshe.

11 Tunahandeka muavusunga kuli yeni vaka Kolinte, tunashokolola mitima yetu kuli yeni. 12 Kutuesi nakuvindika cizango cetu kuli yeni, vuno honi yeni muli nakuvindika cizango ceni kuli yetu. 13 Kaha muomu yeci, njihandeka kuli yeni ngue vana vange, shokololeni mitima yeni neni naua.

14 Keti mupangele hamo na vaje vaka kuhona kutsiliela. Muomu nkuma vusamba muka vuliho hali vaka vusunga na vaje vaka kuhona kutsiliela? Cipue nkuma vumo muka vuli ha ceke na milima? 15 Nkuma vumo muka vuliho hali Kilistu na Liyavolo? Cipue nkuma kulifua muka ciliho hali vaka kutsiliela na vaka kuhona kutsiliela? 16 Nkuma Njivo ya Njambi ili na litavasano muka na tumponia? Muomu yetu tunapu Njivo ya Njambi, Njambi ua kuyoya, ngue muje muahandekele Njambi nguendi,

"Njikakala muli vakevo

nakuenda hakati kavo,

kaha njikapua Njambi yavo,

kaha navo vakapua vantu vange."

17 Kaha Muene uahandekele nguendi,

"Humeni muli vakevo,

kaha litepeni navo.

Kaha keti mukuate via kuhona kulela,

ambahoni njikamitambula.

18 Njikapua nji Ishueni,

kaha mukapua vana vange va vamala na va vampuevo." Evi vikevio vianahandeka Muene Uanzili yoshe.