1 Nkuma tuaputuka kulizumboka yetu vavenia naua ndi? Cipue nkuma yetu tunapande kulinga ngue muje mu vakalingi veka, kukala na mikanda ya vukaleho vuetu kuli yeni cipue yakuhuma kuli yeni ndi? 2 Yeni vene vavenia munapu mukanda uetu uavukaleho, uje vanasoneka mu mitima yeni linga vauzivuke na kuutanda ku vantu voshe. 3 Kaha yeni mumuesa ngeci munapu mukanda uakuhuma kuli Kilistu uje utunaneha yetu. Uje keti uakusoneka na tinta, vuno honi na Cimbembesi ua Njambi uakuyoya, keti uakusoneka ha vitale via mavue vuno honi ha vitale via mitima ya vantu.

4 Eci cikeco kusimpa cije tuli naco kuhitila muli Kilistu hali Njambi. 5 Keti ngue nguavo yetu vavenia tuasa kulinga cili coshe cije cija kuli yetu vuno honi vioshe vije vituasa kulinga vikahuminina kuli Njambi. 6 Ikeye na tuasesa kupua vangamba valitavasano lia lihia, lije keti liakusoneka, vuno honi lia mu cimbembesi. Muomu liakusoneka lineha kutsa, vuno honi lia Cimbembesi lineha muono.

7 Honi nga vije vipangi vianehele kutsa vavicokuele mu visona ha livue, kaha viezile na vumpau vuangacije ngeci vaka Isaleli kuvasele kutala ku cihanga ca Mosesa muomu ya kuviakula cipue vene cikeco capuile cakutsitsivala. 8 Nkuma vipangi via Cimbembesi kuvikapu via vumpau cikuma kuma ndi? 9 Muomu nga kuakele vumpau mu vipangi vije vianehele cihiso. Kaha vipangi vije via vusunga vinapande kuvipulakana cikuma ku vumpau. 10 Cilivene ha cuma eci, cije cakeleho na vumpau kucesiho naua na vumpau, muomu ya vumpau vuje vua cihiana. 11 Muomu nga vije viatsitsivalele viezile na vumpau kaha vukahiana vati vumpau vuje vua viuma vije kuviekuhua.

12 Nankuma tulina kutsiliela eci, kaha tunasimpi cikuma. 13 Yetu kutuapuile ngue Mosesa uje uafuikile lilesu ku cihanga cendi ngeci vantu Vaisaleli keti vamone vumpau vuje vuakele nakutsitsivala. 14 Vuno honi mana avo va akolesele, muomu kuneha na ku litangua lino omo nga vatanda litavasano lia laja, lije lilesu lia kulifua hangavene liakala liakuhona kufukula muomu kuvanga lika kuhitila muli Kilistu amba lihume. 15 Eyo, nakuneha na ku litangua lino ntsimbu yoshe nga vatanda Lishiko lia Mosesa, kaha lije lilesu lifuika mana avo. 16 Vuno honi muomu muntu nga atengulukila kuli Muene kaha lije lilesu vana lihumisa. 17 Honi Muene ikeye Cimbembesi kaha kuje kuli Cimbembesi ua Muene kukeko kuli kupatuka. 18 Kaha yetu voshe na vihanga via kuhona kufukula lilesu vaje vamuesa vumpau vua Muene vanatuhimpula mucifua cendi kuhuma haseteko imo ya vumpau nakuya haseteko yeka, muomu eci cihuminina kuli Muene ikeye vene Cimbembesi.