1 Njishunguiya ngue munjitavesako kavundende kulinga vulema vuange. Njitaveseni. 2 Njilinakumiuvuila cipululu ca vunjambi, muomu njamikulahesa yeni kuli Kilistu mukumihana ngue shombolua ua vusunga kuli yaliendi umo lika. 3 Vuno honi njili nakuteua ngeci ngue muje linoka uakuisile Eva na kuzangama cendi ca makuli, kaha visinganieka vieni vikamituala kulahako nakuhona kuononoka Kilistu na vucili na kusungama. 4 Muomu nga muntu umo eja nakuambulula Yesu ueka kupulakana uje ituambuluile yetu, cipue nga mutambula cimbembesi ueka kupulakana uje imuatambuile, indi cipue nga mutambula muzimbu uacili ueka uakuliseza na uje umuatambuile, kaha mulihana kuli vikevio mukushula.

5 Njisinganieka ngeci kunjapuile njiuamundende kuli ava vavahandeka nguavo tunganda vakama cikuma. 6 Cipue vene nga keti njiuakulilongesa mukuhandeka muacili, vuno honi njili na mana mu vingila vioshe tunalumbununa evi muacili kuli yeni mu viuma vioshe.

7 Nkuma njalingile vupi mukulikehesa yange vavenia ngeci yeni vamijundule, muje munjambuluile Muzimbu Uacili ua Njambi cakuhona ndando kuli yeni ndi? 8 Njevililile vikungulukilo vieka hakutambula vukuasi kuli vakevo muomu yakumikuasa yeni. 9 Kaha muomu njakele neni nakutonda vimo, kunjahanene citeli kuli muntu uoshe muomu vukuasi vuange vuakele nakuhuma kuli muanetu uje uahumine ku Masendoniya. Nankuma njalikelele, kaha njikalikela naua kupua citeli kuli yeni mu vingila vioshe. 10 Kaha ngue ha vusunga vua Kilistu uje ali hali yange, eci kulihalesa cange ku vakaciholuesa kuluu mu vihela via Akaya. 11 Nkuma vika honi njihandekela eci? Muomu yange kunjamizangele ndi? Njambi azivuka ngeci njamizanga!

12 Kaha vije vinjikalingi njikavitualelelaho kuvilinga, ngeci njikahonouese vihandeka via vaje vakahandeka nguavo ku vipangi viavo viakulihalesa vakapanga hamo netu ngue muje mutukalingi. 13 Muomu vantu ava vapua tunganda va makuli, vaka kupanga va makuli vakalipuisa vakevo vavenia ngue tunganda va Kilistu. 14 Kutukomoka, ngeci cilivene cipue Satana ualipuisile ikeye vavenia ngue kangelo ua ceke. 15 Nankuma kucasa kupua ca kukomouesa nga vangamba vendi na vakevo naua valipuisa vakevo vavenia ngue vangamba va vusunga, mamanusuilo avo akalifua na vilinga viavo.

16 Njihilukilaho naua nguange, eceleni muntu uoshe keti asinganieke nguendi njicilema, vuno honi cipuevene nga mucisinganieka, kaha njitambuleni ngue vene cilema ngeci nange naua linga njikalihaleseko muvundende. 17 (Vinjili nakuhandeka kunjesi nakuhandeka na nzili yakama ya Muene vuno honi ngue cilema mukulihalesa eci ca kusimpa, 18 nankuma muomu vavengi vakalihalesa na viuma via mavu, nange naua njikalihalesa) 19 Muomu yeni muka litavasana muacili na vilema, hakupua yeni vavenia vakuzangama. 20 Muomu yeni mukacitava cipue vene nga muntu amilinga vundungo, cipue amikuisa, cipue amizangamena, cipue uje amikehesa, cipue uje amipupa mbanda ku cihanga. 21 Na shuamua yange, njihandeka nguange tuazeyele cikuma hali evi!

Vuno honi vioshe vije muntu atonda linga alihalesele, njilinakuhandeka ngue cilema, nange naua njinapande kulihaleselaco. 22 Nkuma vanapu Vahevelu ndi? Kaha nange vene nji Kahevelu. Nkuma vanapu Vaisaleli ndi? Kaha nange vene nji Kaisaleli, nkuma vapua vatekuluila va Avilahama ndi? Kaha nange vene njimutekuilila ua Avilahama. 23 Nkuma vapua vangamba va Kilistu ndi? Kaha yange njapua njiuakama kuvapulakana, njilinakuhandeka ngue muntu uakuzaluka, njinapanga cikuma na kuhundangana, njinakala mu kamenga vintsimbu viavingi na kunjipupa lualuingi kutonda nakutsa. 24 Ha vintsimbu vitanu, vanjipupile makote makumi auana kuhumisako likote limo ku vakuluntu va Vayunda. 25 Ha vintsimbu vitatu vanjipupile na vivanzi, kaha lumo vanjashele mavue. Kaha ha vintsimbu vitatu omo njendele mu vuato, vuje vuato vunjendelelemo vuapihile, ha vutsiki na mutania njakele mu cisali. 26 Ha mangenzi amengi, njakele mu vukalu vua vindonga, njakele muvukalu ku mihuza, njakele mu vukalu ku vantu vange vavenia, njakele mu vukalu kuli vaje keti Vayunda, njakele mu vukalu mu nganda, njakele mu vukalu mu mpambo, njakele mu vukalu ku cisali, njakele mu vukalu kuli vaka kutsiliela va makuli. 27 Njahundanganene na kupanga cikuma, kunjakele na kukosa ku vintsimbu viavingi, njakele mu njala na mpuila, vintsimbu viavingi cakuhona viakulia, njakele mulisika nakuhona vuzalo. 28 Kaha ku vikuavo viekani, kuli vukalu vua ha litangua na litangua hali yange vuakushoshomua vikungulukilo vioshe. 29 Iya nazeye, nkuma yange kunjazeyele ndi? Iya ivauisilile mu vupi, nkuma yange kunjanienguele ndi?

30 Kaha nga njilihalesa njikalihalesa ha viuma vije vimuesa kuzeya cange. 31 Njambi na Tate ya Muene Yesu, uje ikeye uakukuisula vintsimbu vioshe nazivuka nguendi kunjekukuisa. 32 Ku Ndamasika nguvulu uje uakele muintsi lia Muene Aletasa uaniungile nganda ya Ndamasika linga vanjikute. 33 Vuno honi vanjisosele mu mutonga kuhitila mu njanena mu civumbe, kaha njovokele ku mavoko endi.