1 Vamuanetu tutonda linga muzivuke, ha kavumbi ka Njambi kaje kavanamuesa mu vikungulukilo via Masendoniya, 2 muomu cipuevene vakele muvieseko viakama, vuno honi nzolela yavo yapuile yakama ngeci vakele nakuhana na mutima umo oku cipuevene vapuile vihutu cikuma. 3 Muomu vakele nakuhana muvaselelemo muoshe, ngue muje munjicambuluilamo, vakele nakuhana kupulakana muvije vivakele navio. Kuya ku cizango cavo, 4 vakele nakutulambelela linga tulipandakane mukulinga cipangi eci cakukuasa vantu vakulela va Njambi. 5 Omu keti mukemo mutua yonguelelemo, vuno honi ha kulivanga valihanene vakevo vavenia kuli Muene nakuli yetu ku cizango ca Njambi. 6 Nankuma tuananguile Tito muomu ikeye hakupua uje uaputukile laja, napande kumanusula naua na hakati keni cipangi eci ca kavumbi. 7 Honi ngue muje mu mulina kutualelelaho kukala muacili mu lutsilielo, na mukuhandeka, namu mana, na mu vusunga vuoshe, na mu cizango ceni hali yetu, taleni tutonda naua nguetu mutualeleho kulinga muacili namu cipangi eci ca kavumbi naua.

8 Njilinakuhandeka eci keti ngue cishika, vuno honi kushulisisa kukolesa ca vakueni ngeci na cizango ceni naua capua ca vusunga. 9 Muomu muazivuka kavumbi ka Muene uetu Yesu Kilistu, ngeci cipuevene ikeye uapuile muka kufuka, vuno honi muomu yeni uapuile cihutu, ngeci ya kuhutua cendi linga mupue vaka kufuka.

10 Kaha ha cuma eci njihana visinganieka viange, cacili kuli yeni hano vene kumanusula vije vimuaputukile muaka uali, vije keti lika vimualingile vuno honi muavilingile muomu muatondele kuvilinga, 11 ngeci kulivuahesela ceni mukucishunguiya hamo vacipuisa mumo nakucimanesa na vije muli navio. 12 Muomu nga kulivuahesela kucili, kaha vanacitambula kuya ku vije muntu ali navio, keti ngue kuya ku vije muntu kesi navio.

13 Kunjesi nakulumbununa nguange vakueni vavehuise kaha yeni mukale na citeli, 14 vuno honi yeni muomu muli na viavingi ha ntsimbu ino, cinapu cacili ngeci munapande kukuasa vaje vanajena. Ambahoni, omo neni naua mukajena kaha vaje vali na viavingi, kaha navo naua vakamikuasa. Mu ngila eyi vene muva voshe vanamipuisa hamo. 15 Ngue muje muvanacisoneka nguavo, "Uje uakunguluile viavingi kesi na cimo cahi, kaha uje uakunguluile viavindende kajenene."

16 Vuno honi kutsantsela cikale kuli Njambi uje akahaka kushungozola cakama cakulifua hali yeni mu mutima ua Tito. 17 Muomu ikeye katambuile lika kulomba cetu, vuno honi uakolesele mukumikuasa mu cizango cendi vavenia ngeci akeja kuli yeni. 18 Tulina kutuma hamo nendi muanetu uje uakutsimana hakati ka vikungulukilo vioshe muomu ya kuambulula cendi ca Muzimbu Uacili. 19 Kaha keti evi lika, vuno honi vana muhangula ku vaka vikungulukilo linga ende netu mu vipangi evi via kavumbi vije vituli nakulinga, muomu ya vumpau vua Muene nakumuesa vucili vuetu.

20 Tulina kulinga muacili ngeci keti kukakale umo akatupaye ha vuana ovu vuacili vuje vutuli nakulinga. 21 Muomu tutonda kulinga lika viakasingimiko, keti lika ku mesho a Muene vuno honi naua naku mesho a vantu.

22 Kaha tulina kutuma vakevo na muanetu uje ituneseka lualuingi kaha tunamuuana kupua ualukakateya mu viuma vioshe, vuno honi uapua uakulongua cikuma kupulakana laja muomu ya kutsiliela cendi cakama muli yeni. 23 Kaha hali Tito ni, napu mukuasi na muanetu mutukapangela mu vipangi vieni, kaha hali vamuanetu ni, vanapu tunganda va vikungulukilo, na vumpau vua Kilistu. 24 Nankuma mueseni ava vantu vukaleho vua cizango ceni na vika vije yetu tukalihalesela muli yeni, linga vikungulukilo vavimone.