1 Yange Paulu kanganda uje keti uakuhuma ku vantu cipue kuhitila mu muntu, vuno honi kuhitila muli Yesu Kilistu na Njambi Tate, uje uamusanguile ku vatsi, 2 yange na vamuanetu voshe vaje vanjili navo, tuli nakumitumina ou mukanda,

Ku vikungulukilo via mu Ngalatiya:

3 Kavumbi na ciyulo vikale neni vije vihuma kuli Njambi Tate na Muene uetu Yesu Kilistu, 4 uje ualihanene ikeye vavenia ha vipi vietu mukutuhumisa ku vupi ovu vua vuavuno, kuya ku cizango ca Njambi yetu Tatetu. 5 Kuli ikeye kukale vumpau ku miaka yoshe ya yaye! Ameni.

6 Njalikomokela ngeci yeni voshe muahumu vuasi kuli uje uamisanene mu kavumbi ka Kilistu nakutengulukila ku Muzimbu Uacili ueka. 7 Keti ngue nguavo kuli muzimbu ueka naua, vuno honi kuli vamo vaje vali nakumitanganesa kaha vatonda kutangula Muzimbu Uacili ua Kilistu. 8 Vuno honi cipue vene nga yetu indi kangelo uakuhuminina muilu, uje akambulula Muzimbu Uacili ueka uakuliseza na uje utuambuluile yetu kuli yeni, kaha apue uakusinga. 9 Ngue muje mutunahandeka ha kulivanga, nahano hanga naua njicihandeka nguange, nga kukala umo akambulula kuli yeni Muzimbu Uacili ueka uakuliseza na uje umuatambuile, kaha apue uakusinga.

10 Nkuma yange njilinakutonda ngeci vantu vanjishangale indi Njambi? Indi nkuma njilinakueseka kuvuahelesa vantu ndi? Nga hanga njicili nakuvuahelesa vantu, ngue kunjapuile nji ngamba ua Kilistu.

11 Muomu njitonda linga muzivuke vamuanetu, ngeci Muzimbu Uacili uje yange njambuluile kuuapuile uakuhuma ku muntu. 12 Muomu kunjautambuile kuli muntu, cipue kulilongesauo, vuno honi uezile kuhitila mukusholola ca Yesu Kilistu. 13 Muomu munevu vuyoye vuange vualaja mu futisi ya Vayunda, muje vati munjapakesele cikungulukilo ca Njambi muakupihia nakutonda kucinongesa. 14 Kaha njahianene mu futisi ya Vayunda kupulakana vavengi vaje mutunapuila hamo ku miaka hakati ka vantu vange, nankuma njalihanene cikuma ku vilika via vakukuluila vetu.

15 Vuno honi omo Njambi uje uanjihanguile laja tele kanda njisemuke, nakunjisana kuhitila mu kavumbi kendi, 16 uavuahelele cikuma hakusholola Munendi kuli yange linga njikamuambulule viendi hakati ka vaje keti Vayunda, kunjaile kuli muntu umo mukunjinangula, 17 cipue kuya ku Yelusalema kuli vaje vapuile tunganda tele kanda yange, vuno honi njaile mu Alambiya kaha naua njahilukile ku Ndamasika. 18 Ambahoni hanima ya miaka itatu njaile ku Yelusalema mukumenekela Kayafase kaha njakele nendi kuje matangua likumi na atanu. 19 Vuno honi kunjakamueneko tunganda veka naua kuvanga lika Yakomba munaina ya Muene.

20 Muli evi njinasonekela yeni, vusunga vua Njambi kunjesi nakukuisa.

21 Ambahoni njayile ku mitambela ya ku Siliya na Silisha. 22 Vuno honi hanga vene kuvanjizivukile ku vikungulukilo via Kilistu via mu Yundeya, 23 vovuile lika nguavo, "Uje uatuyandesele vuno honi alinakuambulula lutsilielo luje luatondele kunongesa." 24 Kaha vahanene vumpau kuli Njambi muomu yange.