1 Njilina kulumbununa nguange uje muka kusuana nga acili muanike kaha akapua ngue ndungo cipue nguavo ikeye vene vavenia viuma vioshe. 2 Vuno honi akakala mu mavoko avakakumuniunga na vaje vavanatsiliela kuvanga noho ha litangua lije liatumbuile ishe. 3 Kaha netu vene omo tele tuvanike tuapuile tu vandungo va vimbembesi vije vikendesa mavu. 4 Vuno honi omo ntsimbu yahetele, Njambi uatumine Munendi uje uasemukile ku mpuevo, uakusemukila mu Lishiko, 5 mukupatula vaje vakele nakukava lishiko linga vatupuise vana va Njambi. 6 Muomu munapu mu vana, Njambi natumu Cimbembesi ua Munendi mu mitima yetu, uje akatambeka nguendi, "Tate! Tatetu!" 7 Nankuma, kuhitila muli Njambi kuuapuile naua ndungo vuno honi muana, kaha nga unapu u muana kaha yove muka kusuana.

8 Ku laja, omo tele kanda muzivuke Njambi, muakele mu vundungo kuli vaje ku vuntu keti vanjambi. 9 Vuno honi muomu muazivuka Njambi, cipue muomu honi Njambi namizivuka, nkuma vati naua muhilukila kuli vije vimbembesi via kuzeya viangoco, nkuma mutonda naua linga mupue vandungo vavio ndi? 10 Yeni mukaniungu matangua, na vingonde, na vintsimbu na miaka. 11 Njilina kulishoshomuena nguange hamo nzili yange hali yeni inai muangoco.

12 Vamuanetu njilinakumilambelela linga mupue ngue yange, muomu nange naua njinapu ngue yeni. Kumuanjilingile cipue vupi vumo. 13 Muazivuka ngueni muomu ya kuvavala mukemo njambuluile Muzimbu Uacili kuli yeni ha kulivanga. 14 Kaha cipue vene cihindu cange capuile vieseko kuli yeni, kumuanjiyenguile cipue kunjisembulula, vuno honi muanjitambuile ngue kangelo ua Njambi, cipue ngue Kilistu Yesu. 15 Nkuma vikahoni vije muavuahelelele cikuma? Muomu njinapu mukaleho nguange nga casiuile ngue muahumisile mesho eni naku ahana kuli yange. 16 Nkuma honi njinapu citozi ceni muomu yakumileka vusunga ndi?

17 Ovo vantu vamuesa cizango hali yeni vuno honi visinganieka viavo kuviapuile viacili, vatonda linga vamitepese kuli yetu ngeci muzange vakevo. 18 Cinapu cuma cacili nga vamikokela ku viuma viacili, kaha cinapu cuma cacili kucilinga ntsimbu yoshe, kaha keti lika nga omo tulihamo. 19 Vana vange vacizango, vaje hanga naua mucili mu mushongo ngue uje mpuevo atonda kusema kuvanga noho muatambula Kilistu muli yeni. 20 Njitonda ngue njikale neni hano linga njitengulule lizi liange muomu njalishoshomuena hali yeni.

21 Njilekeni, yeni vaje vatonda kukava Lishiko, nkuma kumuekulivua lishiko ndi? 22 Muomu vanacisoneka nguavo Avilahama uakele na vana vavali va vamala, umo uakuli mpuevo ua ndungo kaha mukuavo uakuli mpuevo uakupatuka. 23 Vuno honi muana uje uakuli mpuevo ndungo uasemukile kuya ku vuntu, kaha muana uje uakuli mpuevo uakupatuka uasemukile kuya ku cikulaheso. 24 Honi eci cinapu ngue cisimo, ava vampuevo vanapu matavasano avali. Umo ahuminina ku Munkinda ua Sinai, kusemena vana mu vundungo, ou ikeye Hangale. 25 Honi Hangale ikeye Munkinda ua Sinai mu Alambiya, ikeye nemanena Yelusalema ije iliko, muomu ikeye ali mu vundungo na vana vendi. 26 Vuno honi Yelusalema ije ili muilu ikeyo yakupatuka, kaha ikeye nanetu. 27 Muomu vanacisoneka nguavo,

"Vuaheleleni, yeni vantsimpi vaje kuvekusema!

Lileni nakutambeka na nzolela, yeni vaje kumuesi mu mushongo uakusema!

Muomu vana va uje ivasezele vanapu vavengi

kupulakana vana vendi uje nashomboka."

28 Honi yetu, vamuanetu, ngue Isake, yetu tu vana vacikulaheso. 29 Vuno honi ngue kuntsimbu ije uje muana uasemukile kuya ku vuntu uapakesele uje uasemukile kuya ku cimbembesi, kaha omu mukemo mucilimo cipue hano. 30 Vuno honi visoneka nkuma vihandeka vika? Vihandeka nguavio, "Sheka mpuevo ua ndungo na munendi, muomu muana uje ua ndungo kasa kukasuana hamo na muana ua uje mpuevo uakupatuka." 31 Nankuma, vamuanetu, yetu keti tu vana va uje ndungo vuno honi va uje mpuevo uakupatuka.