1 Ambahoni hanima ya miaka likumi na iuana njayile naua ku Yelusalema na Mbanambase hamolika na Tito. 2 Njayile kuje muomu ya kusholola, kaha njaliuanene navo vaje vantuama vuno honi capuile mu vushueke kaha njavahanene Muzimbu Uacili uje unjikambulula hakati ka vaje keti Vayunda, njatondele kuzivuka muacili nguange kunjishatukila cipue njashatukilile viangoco. 3 Vuno honi Tito uje uakele nange kuva musindiyiye linga alovoke, cipue vene ikeye uapuile Kangelengu. 4 Vuno honi muomu ya vaka kutsiliela va makuli vaje vezile mu vushueke, vaje vezile mukuseveleka linga vakuende vungungu ha kupatuka cetu kuje tulinaco muli Kilistu Yesu, linga vatupuise vandungo. 5 Kutualihanene kuli vakevo cipue muka ntsimbu lika, tualingile eci linga vusunga vua Muzimbu Uacili vavutulikile yeni.

6 Kuli vaje vavakele nakuhana kasingimiko ngue cuma cije caseho, vuno honi muoshe muje muvafuile, kuvalumbunukile cipue cimo kuli yange, Njambi kakele na civembulu, vaje vanjihandeka nguange vantu vavulemu kuvahakeleko cimo kuli yange. 7 Vuno honi mu ngila ikuavo naua omo vamuene nguavo njakakateya kuambulula Muzimbu Uacili kuli vaje vakuhona kulovoka, ngue Petulu muje muakakateyele kuambulula Muzimbu Uacili kuli vaje kulovoka, 8 muomu Njambi uje uakele nakupangesa Petulu ha vipangi via vaka kulovoka uapangesele nange naua kuli vaje keti Vayunda. 9 Yakomba, na Kayafase, na Yiuano vakevo vantuama vaje vavakele nakuhana kasingimiko, omo vanongonuene kavumbi kaje kavanjihanene kuli Njambi, kaha vakuatele mu livoko liange na Mbanambase mukumuesa ngeci tuva voshe tupangele hamo, linga yetu tuye kuli vaje keti Vayunda kaha vakevo vaye kuli vaje vaka kulovoka. 10 Voshe valombe yetu linga tuvuluke vihutu, eci cikeco cuma cije cinjikatondo kulinga.

11 Vuno honi omo Kayafase uezile ku Antioke njamusembuluile ku mesho endi muomu ikeye uapihisile. 12 Muomu tele kanda vamala vamo veje kuli Yakomba, ikeye ualile na vaje keti Vayunda, Vuno honi omo vezile uavashondolokele nakulihumisako ikeye vavenia mukuteua kulovoka. 13 Kaha ikeye na vakuavo voshe Vayunda vaputukile kulinga civembulu linga vene cipue Mbanambase na ikeye vamutanguile ku civembulu cavo. 14 Vuno honi omo njamuene nguange kuvesi nakulinga viakusungama ha vusunga vua Muzimbu Uacili, kaha njahandekele na Kayafase ku mesho avo voshe nguange, "Nkuma nga yove, cili vene u Kayunda vuno honi uyoya ngue uje keti Kayunda, kaha uasa vati kulinga vaje keti Vayunda linga vayoye ngue Vayunda?"

15 Yetu vavenia vaje Vayunda ku cisemua kaha keti vaje keti Vayunda vaka vipi, 16 tuzivuka nguetu muntu kasa kupua uakusungama ha vipangi lika via lishiko vuno honi kuhitila mu lutsilielo muli Yesu Kilistu, cipue yetu tunatsiliela muli Kilistu Yesu linga tupue vakusungama ha lutsilielo muli Kilistu, keti ku vipangi via lishiko muomu ha vipangi lika via lishiko naumo uahi akapuilaho uakusungama. 17 Vuno honi nga mukutonda cetu linga tupue va vusunga muli Kilistu, kaha yetu vavenia tualiuanene kupua vaka vipi, kaha nkuma Kilistu ikeye liavenia vupi ndi? Cilivene houe! 18 Vuno honi nga naua njitunga viuma vije vinjalundumuine, kaha njalimono yange vavenia nguange muka kupihisa. 19 Muomu yange kuhitila mu lishiko njatsile ku lishiko, linga njikayoye kuli Njambi. 20 Vanjishukikile hamo na Kilistu, kaha keti yange naua uje ayoya vuno honi Kilistu ikeye uje ayoya muli yange, kaha na muono uje honi njiyoya mu ntsitu njiyoyela ha lutsilielo muli Muna Njambi, uje uanjizangele nakulihana ikeye vavenia hali yange. 21 Kunjasa kuteua kavumbi ka Njambi, muomu nga vusunga vavuuana kuhitila mu lishiko, kaha Kilistu viahi viatsililile.