1 Muomu ya kupatuka mukemo Kilistu natupatula, nankuma, imaneni ngoo kaha keti mulihane naua ku mutiyo ua vundungo.

2 Ivuilileni yange Paulu, njihandeka kuli yeni nguange nga mutambula kulovoka, kaha Kilistu kakakala na seho kuli yeni. 3 Njihilukilaho naua kunangula ku yala uoshe uje akatambula kulovoka nguange, ikeye vanamukutu mukutulika lishiko lioshe. 4 Vanamihumisa kuli Kilistu yeni voshe vaje vavapuisa va vusunga ku lishiko, munahumu ku kavumbi. 5 Muomu kuhitila muli Cimbembesi, tulina kuvandamena kutsiliela ca vusunga kuhitila mu lutsilielo. 6 Muomu muli Kilistu Yesu kukuesi kulovoka cipue kuhona kulovoka cije cili naseho, vuno honi lutsilielo lupanga kuhitila mu cizango.

7 Muakele nakulinga muacili, nkuma iya honi uamivindikile kuononoka vusunga? 8 Kusindiya eci kucahumine kuli uje uamisanene. 9 Kacimbaluila kakandende kakafutunuisa mukasha uoshe. 10 Njatsiliela muli Muene nguange kumukatambula cuma ceka kupulakana cange, kaha na uje uoshe alinakumiyandesa akauana cisompelo cendi.

11 Vamuanetu vuno honi nga yange hanga njicili nakuambulula kulovoka, nkuma vikahoni hanga vacinjipakesa? Ha mulonga ou kaha cije citsuntsuiso ca cilindakano vanacihumisa. 12 Njitonda linga vaje vantu vaje valina kumitanganesa keti valengesele aha lika, veceleni vatualeleleho nakulipuisa vayunuke.

13 Vamuanetu, yeni vamisanene ngeci mupatuke, kaha honi keti mupangese kupatuka ceni cipue lisesa lia ku muvila ueni ua ntsitu, vuno honi pueni vangamba kuli umo na mukuavo kuhitila mu cizango. 14 Muomu Lishiko lioshe vanalishulisisa mu lizi limo lika lije lihandeka ngualio, "Zanga mukueni ngue muje lizanga yove vavenia." 15 Vuno honi nga munapu ngue tusitu va mu musenge vaje valishuma nakulivulumuna umo na mukuavo kaha nangukeni linga keti mukalinongese umo na mukuavo.

16 Vuno honi njihandeka nguange endeni mu Cimbembesi kaha keti muvuahelese mashungu aku muvila ua ntsitu. 17 Muomu mashungu aku muvila ua ntsitu akaluisa Cimbembesi, kaha na mashungu a Cimbembesi akaluisa muvila ua ntsitu, muomu evi kuvia litombuele, kaha vikamikingi ku kulinga vije vimutonda kulinga. 18 Vuno honi nga mutava Cimbembesi kumituamenena kaha Lishiko kuliesi na nzili hali yeni.

19 Honi vipangi via muvila ua ntsitu viapua viangoco: vikevio viapua vupangala, kulijualesa, vilinga via kuteuesa, 20 kulemesa tumponia, vulozi, vutozi, vaka kulua, cipululu, vutenu, vaka kulizanga vavenia, vaka kulitepesa ku vakuavo, vaka cimbembesi ca kuzanga viuano, 21 vaka lifuua, vaka kupenda, nakulinga viuma vieka ngue evi. Njiminangula ngue muje naua munjaminanguile ha kulivanga, ngeci vaje voshe vakalingi viuma evi kuvakasuana Vumuene vua Njambi.

22 Vuno honi vushuka vua Cimbembesi vuapua cizango, nzolela, ciyulo, lukakateya, ngozi, vucili, kulongua, 23 kulikehesa na kulihilula, kaha kukuesi lishiko liluisa viuma evi. 24 Kaha vaje voshe vakundama kuli Kilistu Yesu vanashukika muvila ua ntsitu na vilinga viauo na mashungu auo. 25 Nga tuyoyela hali Cimbembesi, kaha tuyeni tutavese Cimbembesi linga atutuamenene. 26 Kutuapandele kupua vaka kulihalesa cipue kuliputuka umo na mukuavo, cipue kulivuila cipululu umo na mukuavo.