1 Vamuanetu, nga muntu umo vanamuuana na mulonga uoshe, kaha yeni vaje vanatambula cimbembesi munapande kumusungamesa mu kulikehesa. Kaha lihiluleni yeni vavenia kuteua mukakovele naua mu ceseko eci. 2 Liambateseni viteli via umo na mukuavo, kaha mukulinga eci mukashulisisa lishiko lia Kilistu. 3 Muomu nga uoshe uje asinganieka nguendi napu uakama, vuno honi keti mukemo muanapu, kaha ali nakulikuisa ikeye vavenia. 4 Vuno honi muntu na muntu ahilule vipangi viendi vavenia, kaha kuya ku vipangi viendi akasa kulihalesa ikeye vavenia keti hali mukuavo. 5 Muomu muntu na muntu akaliambatela citeli cendi vavenia.

6 Muntu uoshe uje ivanalongesa lizi akalipangela viuma vioshe viacili na uje namulongesavio.

7 Keti vamikuise, Njambi kuveku mushendumuna, muomu vioshe vije viakuna muntu, vikevio naua viakateja. 8 Muomu uoshe uje akuva ku muvila uendi, kaha ku muvila uendi naua kukeko kuakateja kunonga. Vuno honi uoshe uje akuva ku Cimbembesi, kaha ku Cimbembesi naua kukeko kuakateja muono uayaye. 9 Keti tuhone mukulinga viuma viacili, muomu ntsimbu ikeja ije tukateja muacili nga tutualelelaho nalukakateya. 10 Nankuma, muomu tucilina ntsimbu, tuyeni tulinge vucili ku vantu voshe, kaha cikuma kumani ku ntanga ije ya lutsilielo.

11 Taleni kuhama ca visona vije njili nakumisonekela na livoko liange! 12 Vaje vakatondo kuvuahelesa vantu ku ntsitu vakevo vaje vakamisindiya linga mulovoke. Eci vakacilingila lika linga vateue kuvapakesa muomu ya cilindakano ca Kilistu. 13 Muomu cipue vene vaje vanalovoka kuvekutulika lishiko, vuno honi vakashunguiya yeni linga mulovoke ngeci vauane vumpau mu muvila ueni. 14 Vuno honi yange kunjikalihalesa hali evi, kuvanga lika ha cilindakano ca Muene uetu Yesu Kilistu, uje muli ikeye mavu vana ashukika kuli yange, nange vananjishukika ku mavu. 15 Muomu kukuesi mulonga cipue ualovoka indi ku ualovokele, vuno honi cakama kupua uakutanga lualuha. 16 Ciyulo na cikeketima vikale kuli yeni voshe vaje venda na lishiko eli, na kuli Isaleli ya Njambi.

17 Kuhuma hano, keti kukale muntu umo anjihane vukalu, muomu njinambata vitamba via Yesu ha muvila uange.

18 Kavumbi ka Muene uetu Yesu Kilistu kakale na cimbembesi ceni, vamuanetu. Ameni.