1 Yange Paulu, kanganda ua Kilistu Yesu ku cizango ca Njambi,

Ku vantu vakulela va Njambi vaje naua vapua vakulongua muli Kilistu Yesu.

2 Kavumbi na ciyulo vikale kuli yeni vije vihuminina kuli Njambi Tatetu na Muene uetu Yesu Kilistu.

3 Tulemeseni Njambi ikeye Ishe ya Muene uetu Yesu Kilistu. Muomu mukulipandakana cetu na Kilistu natukuisula navikuisulo vioshe via Cimbembesi mu vihela via muilu. 4 Tele kanda vapange mavu, Njambi uatuhanguile laja linga tupue vendi muli Kilistu, tupue vakulela na vakuhona mulonga ku mesho endi.

Muomu ya cizango cendi, 5 Njambi uayonguelele kulutue ngeci kuhitila muli Yesu Kilistu akatupuisa kupua vana vendi. Eci capuile cakumulema na vutumbe vuendi vavenia. 6 Nkuma tushangazaleni Njambi ou natumuesa kavumbi kendi kakama cikuma muomu ya munendi yazanga. 7 Mu maninga a Yesu Kilistu tunapatuka na kutukonekela ku vipi vietu, kuya na vukama vua kavumbi ka Njambi, 8 kaje kanatuhana museteko yakama!

Mukuendelela na mana endi oshe na mukuzivuka coshe. 9 Njambi ualingile vije uatumbuile kulinga kulutue. Uatusholuelele vutumbe vuendi vua vushueke vuasinganiekele kumanesa kuhitila muli Kilistu. 10 Vutumbe ovu vuje Njambi aka vumanesa omo nga ntsimbu ya cili inapuho, akakungulula vioshe via muilu nevi via ha mavu kuhitila muli Kilistu.

11 Viuma vioshe Njambi uavilingile kuya na vutumbe vuendi. Njambi uatuhanguile kupua tu vantu vendi kuhitila muli Kilistu. Ovu vukevuo vutumbe vuendi vua tumbile hume ha mbangelo. 12 Yetu vakulivanga kukakala na likulahelo muli Kilistu tushangazaleni vumpau vua Njambi.

13 Neni naua muapuile mu vantu va Njambi omo muazivile lizi lia vusunga, Muzimbu Uacili uje uaminehelele kuovoka. Muatsilielele muli Kilistu, Kaha Njambi namihaka cimueso cakupua muvendi hakumihana Cimbembesi Uakulela uje uamikulahesele. 14 Cimbembesi ikeye natulingisa cili vene tukasuana vije Njambi nakulahesa vantu vendi, kaha tunasimpi ngeci Njambi a kapatula vantu vendi. Tushangazaleni vumpau vuendi!

15 Ha cuma eci, muomu njinevu lutsilielo lueni muli Muene Yesu, na cizango ceni ku vantu voshe vakulela va Njambi, 16 kunjalikelele kutsantsela kuli Njambi muomu yeni. Ntsimbu yoshe njikamilombelela. 17 Njitualelelaho kulomba ngeci Njambi ua Muene uetu Yesu Kilistu, Tate ua vumpau amihane Cimbembesi ca mana neci cakusholola linga mu muzivuke muacili. 18 Njili na kulomba ngeci mesho eni va emuise linga muzivuke kutsiliela cije civanamisanena na vufuko vua vumpau vuendi vuje vuva kasuana vantu vendi vakulela. 19 Naua njikalombo nguange muzivuke nzili yendi yakama kuli yetu vaka kutsiliela. Ije nzili ipanga muli yetu inapu ngue nzili yakama ije, 20 uapangesele omo uasanguile Kilistu ku vatsi nakumutumbika ku livoko liendi lia cilio mu cifuti ca muilu. 21 Kuje Kilistu ikeye muka kushika helu lia voshe vaka kushika muilu, vaka nzili yakama na vaka nzili na vimiene voshe, ikeye ali na lizina lili helu lia mazina oshe a nzili yakama aje aliko hano vene na aje akeja. 22 Njambi nahana nzili yoshe muli Kilistu nakumupuisa mutue ua vioshe mu cikungulukilo. 23 Cikungulukilo cinapu muvila ua Kilistu, na cikungulukilo cinashulu ikeye na ikeye nashulisisa vioshe.