1 Njili mu kamenga muomu ya kupangela Muene. Njimilomba muyoye muvuyoye vuaku fuilamo vua vantu vaje Njambi nahangula kupua vendi. 2 Ntsimbu yoshe pueni vaka kuononoka na kulikehesa naku vandamena. Mueseni kulikonekela umo na mukuavo mu cizango. 3 Koleseni kutulika muacili vumolika vuje vuanamihana Cimbembesi kuhitila mu ciyulo cije cinamikutu hamolika. 4 Kuli muvila umolika na Cimbembesi umolika, ngue muje vene kuakala lika kutsiliela cimolika cije Njambi namisanena. 5 Kuli lika Muene umo, na lutsilielo lumo, na kumbuitika cimo. 6 Kuli Njambi umo ikeye Ishe ya voshe, Muene ua voshe, uapanga mu voshe kaha ali mu voshe.

7 Umo na umo hali yetu voshe natambula vuana vuacili kusetekesa ku vije Kilistu uahanguile kupangezela. 8 Ngue muvihandeka visoneka nguavio,

"Omo ikeye ualondele kuya ku cihela cakulahako,

Uambatele vinzinda vavengi hamo nendi,

Nakuhana mavuana ku vantu."

9 Nkuma mezi aua ahandeka nguauo, "Ikeye ualondele kuya ku cihela cakulahako" alumbununa vika? Cinalumbunuka ngeci ha kulivanga uashulukile muintsi lia mavu akulova. 10 Uje uashulukile muintsi lia mavu, ikeye naua umolika uje ualondele muilu lia melu oshe linga ashulise mavu oshe na ikeye vavenia. 11 Kilistu ikeye uje uahanene mavuana, uahanguile vamo kupua tunganda, vamo kupua tunanguizi, vakuavo vapuile vaka kuambulula Muzimbu Uacili, veka naua kupua tuniungi na valongisi. 12 Ualingile evi muku vuahesela vantu va Njambi voshe ngeci vapange cipangi ca vuka Kilistu, mukutunga muvila ua Kilistu. 13 Eci cikatualelelaho noho tuva voshe tukapua vantu vamolika mu lutsilielo luetu na mu mana etu a Muna Njambi, tukapua vantu vakukola mumana na kuheta ha seteko ya kumanusula ya Kilistu. 14 Kaha kutukapuho ngue tuvanike naua. Kutukatavesa vaka makuli kutukuisa na vilongesa via makuli vije viakufua ngue mankimba na mpunzi vije vitupekumuna. 15 Vuno honi ha kuhandeka vusunga na cizango, tukakola mu vingila vioshe ngue Kilistu uje napu mutue. 16 Hali ikeye vilio via muvila vioshe vinali nungakana hamolika kaha muvila uoshe unalikuata hamo mu manunga. Muvila unakolo na kulitunga ukeuo vavenia mu cizango kuya ku mbazuvuila mu ikapangelamo cipangi cayo.

17 Mu lizina lia Muene, njiminangula keti muyoye ngue vantu vaje kuvazivuka Njambi, vaje viyongola viavo viapua viangoco, 18 kaha kuvuisisa cavo cili mu milima. Vakevo kuvesi na mutambela mu muono uje uakahana Njambi muomu vakevo vali kunzimba na mu kukaluuisa mitima yavo. 19 Vakevo kuvesi nashuamua yahi. Vana liecelela na kulinga viuma via vupangala kaha vali na lizangamena lia kutualelelaho kulinga viuma evi.

20 Muje keti mukemo mu muali longeselelemo hali Kilistu. 21 Muavusunga yeni muevua laja via hali ikeye kaha ha kupua vaka kumukava vamilongesele vusunga vuje vuli muli Yesu. 22 Vamilongesele kuseza vuntu vueni vua laja vuje vuakele naku miyoyesa muje mu muakele. Vuje vuntu vueni vua laja vavunongesele ha mashungu eni aje amakuli. 23 Visinganieka vieni vinapande kupua via viha. 24 Kaha munapande kuzala vuntu vua vuha vuje vuva napanga mu cifua ca Njambi. Ovu vuntu vua vuha vunapu vua vusunga cikuma na kulela.

25 Nankuma keti muhandeke makuli naua! Muntu na muntu napande kuhandeka vusunga kuli mukuavo muomu yetu tuva voshe tunapu vilio via mu muvila ua Kilistu. 26 Nga muniengua keti mutave kuniengua ceni cimituale ku vupi, kaha keti mutokese litangua mu kuniengua lika houe. 27 Keti mutave kuhana Liyavolo cihela. 28 Muntu uje uevile kapandele naua kuiva vuno honi aputuke kuononoka na kupanga cikuma linga akale nacimo ca kukuasa vihutu.

29 Keti mulikuasese mezi akupihia omo muhandeka, vuno honi likuaseseni mezi acili aje asakutunga vantu kuya kuli vivana honoua ngeci vioshe vimuhandeka vikapue viacili kuli vaje voshe vamivuilila. 30 Kaha keti mupihilise Cimbembesi Uakulela ua Njambi. Muomu Cimbembesi Uakulela ua Njambi uapua cimueso ca Njambi uakumimuesa ngue muakundama kuli ikeye. Cimbembesi Uakulela napu cikulaheso ngeci omo litangua lia kumanusuila likeja kaha Njambi aka mipatula. 31 Humiseni vizindo vioshe na vutenu. Keti kukale kuniengua na kulicokota cipue kulituka umo na mukuavo na matumbe amapi mukati keni. 32 Vuno honi pueni vaka ngozi na vaka cikeketima kuli umo na mukuavo. Lisambueseni umo na mukuavo ngue muana mikonekela Njambi kuhitila muli Kilistu.