1 Munapande kutemunuisa Njambi muomu muapua vana vendi vakumuya ku mutima. 2 Yoyeni vuyoye vua cizango ngue omo Kilistu ua tuzangele na kulilambuila ikeye vavenia hali yetu ngue nkombelo ya luengo luacili kuli Njambi.

3 Keti muhane vakueni visinganieka via kuhandeka ngue kuli vupangala, viuma via mazilo na lizangamena hakati keni, muomu viuma evi keti viacili ku vilinga ku vantu vakulela va Njambi. 4 Ku muapandele kuhandeka mezi ashuamua cipue a vulema ku vantu cipue kuhandeka likehelela lia mazilo. Evi keti viuma viacili kuli yeni vuno honi munapande lika kusantsela Njambi. 5 Munapande kuzivuka ngueni uoshe alinga vupangala, cipue muntu ua mazilo cipue ua lizangamena kakasuana Vumuene vua Kilistu novu vua Njambi. Uoshe alinga lizangamena alemesa tumponia.

6 Keti mutave umo amikuise na mezi a mupulungua, muomu ha viuma evi vukalu vua Njambi vukakala hali vaje vaka kujeneka kuononoka. 7 Nankuma keti mulipandakane hamo navo. 8 Ha ntsimbu imo muakele mu milima vuno honi muomu munapu mu vantu va Muene muli mu ceke. Munapande kuyoya ngue vantu vali mu ceke. 9 Ceke cikeco cikakuneha kuteja kuakama ca kusungama na vusunga. 10 Lilongeseni vije vivuahelesa Muene. 11 Keti muambateko mutambela ku viuma viangoco vije viva kalingi vantu, viuma vije vinakundama ku milima vuno honi vishololeni ku ceke. 12 Cinapu ca shuamua cipue kuhandeka viuma vije vivalinga mu vushueke. 13 Omo viuma vioshe visholoka mu ceke, ambahoni vusunga vuacifua cavio vukasholoka, 14 nankuma mukemo vahandeka nguavo,

"Yeni vaka kukosa hindukeni,

Sangukeni ku vatsi,

kaha Kilistu akatuila ceke cendi hali yeni."

15 Nankuma, nangukeni mu mulina kuyoyelamo. Keti muyoye ngue vaka kuhona mana vuno honi ngue vaka mana. 16 Pangeseni muacili vintsimbu vije mulinavio, muomu matangua ano anapu a mapi 17 Nankuma keti mupue ngue vilema, vuno honi ivuisiseni vije viazanga Muene ngeci mucipange.

18 Keti mupende na viniu vije viasa kumipihisa, vuno honi shuleni na Cimbembesi ua Njambi. 19 Handekeni kuli umo na nukuavo na mezi a miaso ya Visamo na miaso yakulela. Imbeni miaso na kushangazala Muene mu mitima yeni. 20 Ntsimbu yoshe tsantseleni kuli Njambi Tatetu mu viuma vioshe mu lizina lia Muene Yesu Kilistu.

21 Lihaneni kuli umo na mukuavo muomu yakusingimika Kilistu.

22 Vampuevo vakushomboka lihaneni kuli vamala veni, ngue muje mu mukalihana kuli Muene. 23 Yala ali na nzili yakama hali mpueyendi, ngue omo Kilistu ali na nzili yakama ha cikungulukilo. Kilistu vavenia ikeye muyoyesi ua cikungulukilo cije cikeco muvila uendi. 24 Vampuevo vakushomboka vanapande kulihana kuli vamala vavo mu vioshe, ngue cikungulukilo mucikalihana kuli Kilistu.

25 Vamala vakuambata, zangeni vampuevo veni ngue Kilistu muazangela cikungulukilo, kaha uahanene muono uendi hali cikeco. 26 Ualingile evi mukuhana cikungulukilo kuli Njambi kuhitila mu mezi endi, hanima ya kucilelesa mukucikusha mu mema. 27 linga akahane cikungulukilo mesho endi mu vumpau vuaco vuoshe, kuakuhona katoma cipue kapenga kamo cipue ceka ha viuma evi, vuno honi mukulela cipue mukuhona mulonga. 28 Mu ngila eyi vene vamala vakuambata vanapande kuzanga vampuevo vavo ngue muvakazangela mivila yavo vavenia. Yala uje azanga mpueyendi alizanga ikeye vavenia. 29 Naumo uahi uazinda muvila uendi vavenia. Vuno honi aulisa naku ulela ngue Kilistu vene muakalingi ku cikungulukilo, 30 muomu tunapu vilio via muvila uendi. 31 Ngue muvihandeka visoneka nguavio, "Ha cuma eci vene yala akaseza ishe na ina naku lipandakana na mpueyendi, kaha voshe vavali vakapua muvila umo." 32 Kuli cisinkiko cakulova ca vusunga mu visoneka evi, njili nakuhandeka hali via Kilistu na cikungulukilo. 33 Vuno honi cinenika yeni naua, yala uoshe napande kuzanga mpueyendi ngue mualizanga ikeye vavenia, kaha mpuevo uoshe napande kusingimika yaliendi.