1 Laja muapuile mu vatsi ku Cimbembesi muomu ku muononokele Njambi, nakulinga vupi. 2 Ha ntsimbu ije muakavangeyele vingila via vupi via ha mavu, muononokele muka kuyula ua vimbembesi via vinzili via muvukambuila ikeye honi Cimbembesi uje ali nakuendesa vantu vaje kuvononoka Njambi. 3 Muavusunga vene tuva voshe tuafuile ngue vakevo ha ntsimbu imo, kaha tuayoyele vene ngue ku cisemua ca mashungu etu a vuntu. Tualingile vije vuntu vuetu na visinganieka via vuntu viakele nakutonda. Muomu ku cisemua cetu ca vuntu ngue vantu voshe, tuapandele kuyanda ku vutenu vua Njambi.

4 Vuno honi Njambi uapua ua cikeketima cikuma, kaha na cizango cendi hali yetu capua cakama cikuma, 5 ngeci omo tuatsile mu Cimbembesi muomu yakuhona kuononoka cetu, kaha uatunehele ku muono hamo na Kilistu. Kaha munovoka ha ngozi ya Njambi. 6 Hakukala hamo na Kilistu Yesu, Njambi uatusanguile hamo nendi ngeci tukayule hamo nendi muilu. 7 Ualingile evi kupua cimueso ku vintsimbu vioshe vije vikeja ha kumuesa vukama vua kavumbi kendi mu cizango cije catumuesele kuhitila muli Kilistu Yesu. 8 Munovoka muomu ya kavumbi ka Njambi kuhitila mu lutsilielo. Eci keti ngue ha vilinga vieni houe, vuno honi cinapu vuana vua Njambi, 9 keti ngue ku vipangi vieni. Kuteua muntu umo akalihalesa. 10 Yetu tunapu vakutanga kuli Njambi, kaha hakukala hamo na Kilistu Yesu Njambi uatutangelele yetu kulinga vipangi viacili, vije via tuvuaheselele laja ngeci tuyoye mu cifua eci vene.

11 Nankuma vulukeni ha ntsimbu imo yeni keti Vayunda ku cisemua, vaje vavatumbula nguavo "Vakakuhona kulovoka" kuli Vayunda, vaje valitumbula vakevo vavenia nguavo vaka kulovoka eci cikeco cije civakalingi vamala ku mivila yavo. 12 Ha ntsimbu ije muashondolokele kuli Kilistu. Muapuile muvangenzi ku muakundamene ku vantu Vaisaleli vaje Njambi uahanguile. Kumuakele na mutambela mu matavasano, aje emanene ha vikulaheso via Njambi ku vantu vendi, kaha yeni muayoyele hano ha mavu kua kuhona kutsiliela na kuhona Njambi. 13 Vuno honi kuhitila muli Kilistu Yesu yeni vaje muakele kulahako na Njambi ha ntsimbu imo, vanamineha muyehi na njambi kuhitila mu maninga a Kilistu. 14 Muomu Kilistu natunehela ciyulo hakulinga Vayunda na vaje keti Vayunda kupua vantu vamo. Uahanene muvila uendi kupua nkombelo, ya kupujula civumbe cije cavatepesele na kuvapuisa vitozi. 15 Uamanusuile lishiko lia Vayunda hamo nakushika kualio na futisi yalio, ualingile eci ngeci vivunga vivali via vantu vipue civunga cimolika mukukala hamo nendi, ngeci kukale ciyulo. 16 Kuhitila ha kutsa cendi ha cilindakano Kilistu uanongesele vizindo viavo. Kuhitila ha cilindakano napandakana vivunga vivali nakuvipuisa muvila umolika nakuvahiluisa naua kuli Njambi. 17 Kilistu uezile nakuambulula Muzimbu Uacili ua ciyulo kuli voshe, kuli yeni keti Vayunda vaje vakele kulahako na Njambi na kuli Vayunda vaje vakele kuyehi na Njambi. 18 Kuhitila muli Kilistu yetu voshe, Vayunda na vaje keti Vayunda, tuasa kuija ku mesho a Tate mu Cimbembesi umo.

19 Nankuma, yeni keti Vayunda kumuapuile honi naua vangenzi cipue vinzinda, yenihoni munapu mu vandambo hamo na vantu va Njambi, yenihoni munapu vantu va ntanga ya Njambi. 20 Neni naua vanamitungu ha luvula lua tunganda na tunanguizi, cisimi caseho cikuma ca mu mbango cikeco Kilistu Yesu vavenia. 21 Ikeye umo uje muka kukuata njivo yoshe hamolika na kuyikolesa na kuyipuisa njivo yakulela ya Muene. 22 Muli Yesu yeni vana mitungu mumo na vakueni veka ngeci mupue cihela muje muakala Njambi kuhitila muli Cimbembesi cendi.