1 Ha cuma eci yange Paulu cinzinda ua Kilistu Yesu, omo ya mulonga ueni yeni keti Vayunda njilinakulomba kuli Njambi. 2 Muavusunga vene yeni muazivuka ngueni Njambi mu kavumbi kendi nanjihana vipangi evi via kuambulula Muzimbu Uacili. 3 Njambi uasholuele vutumbe vuendi vua vushueke nakuvusholola kuli yange. Kuya ngue muje munjinasoneka laja muvundende ha cuma eci. 4 Kaha nga mutanda vije vinjinasoneka muasa kuvuisisa muje munjikevuisisa vishueka via hali Kilistu. 5 Mu vintsimbu via hanima vantu kuva valekele vishueka evi vuno honi Njambi navisholola vuavuno kuhitila muli Cimbembesi kuli tunganda vendi vakulela na tunanguizi. 6 Cishueka eci, capuile ngeci hali lizi lia Muzimbu Uacili, vaje keti Vayunda hano honi vali namutambela hamo na Vayunda mu vikuisulo via Njambi vakevo vanapu muvila umo, na kulipangazela mu cikulaheso ca Njambi cije ca pangele muli Kilistu Yesu.

7 Njambi uanjihanene vuana vuakama vua kuambulula mu Muzimbu Uacili. Ualingile eci kuhitila mu nzili yendi ije ilina kupanga muli yange. 8 Yange njapua nji uamundende kuhiana vantu voshe vakulela va Njambi, vuno honi Njambi ua njihanene vipangi viacili viakuambulula Muzimbu Uacili kuli vaje keti Vayunda ua vufuko vua Kilistu vuje vua kukomouesa. 9 Uanjihanene naua vipangi via kumuesa vantu voshe vutumbe vua vishueka viendi muje mu vukalingiua. Njambi ikeye samatanga ua vioshe, uashuekele vishueka vuendi ku miaka yoshe ya kunima. 10 Visinganieka viendi hali evi vioshe viapuile kupangesa cikungulukilo kumuesa vaka kuyula na vaka nzili mu cifuti ca muilu muje vati mana endi muakapangelamo mu vioshe. 11 Evi vikevio Njambi uasinganiekele hume ha mbangelo kaha uavimanusuile kuhitila muli Kilistu Yesu Muene uetu. 12 Mukukala hamo na Kilistu na kuhitila mu lutsilielo luetu muli ikeye tuasahoni kuija mukusimpa na kutsiliela muli Njambi. 13 Nankuma, njimilomba nguange keti muzeye ha tuyando tuange tuje tunjili nakuuana muomu yeni. Muafuila kuziva kalemeso ngueni njalihana kuyandela viuma evi muomu yeni.

14 Muomu ya cuma eci njitsikama ha mavuli ange nakulombela kuli Njambi, 15 kuli ikeye ntanga yoshe ya hano ha mavu na muilu ili nakutambula lizina lia vusunga, 16 njilomba kuli Njambi ha vufuko vua vumpau vuendi ngeci amihane nzili kuhitila muli Cimbembesi cendi linga mukale na nzili mukati ka mitima yeni, 17 njilomba nguange Kilistu ayoye mu mitima yeni kuhitila mu lutsilielo. Kaha naua njilomba nguange mizi yeni na luvula lueni lutande mu cizango. 18 Mu ngila eyi vene yeni hamolika na vantu va Njambi voshe mukakala na nzili ya kuzivuka muacili vukama vua cizango ca Kilistu cakuhona kuhua. 19 Njilomba nguange muzivuke cizango cendi cipue vene kumuasa kucizivuka muacili. Kaha nga muzivuka cizango cendi mukashulilila na cifua ca Njambi.

20 Njambi asa kulinga vije viuma via kuhiana cikuma mu nzili ije ili nakupanga muli yetu. Asa kupanga mu kuhiana vije vituasa ku mulomba cipue kuhiana vije vituasa kusinganieka. 21 Kuli Njambi kukale vumpau mu cikungulikilo na muli Kilistu Yesu ku ntsimbu yoshe na ku miaka ya yaye Ameni.