1 Yeni vana ononokeni kuli visemi veni muomu muakundama kuli Muene. Eci cikeco cuma cacili kucilinga. 2 "Singimika isho na noko." Eli likelio Lishiko lia kulivanga muje Njambi uakulaheselemo cuma cimo. 3 Eci cikeco cakulahesele, "Nga usingimika visemi vove viuma vioshe vikapua viacili kuli yove mu vuyoye vuove kaha ukayoya ntsimbu yakama hano ha mavu."

4 Yeni visemi keti muyandese vana veni. Omo mu valela valongeseni mu vilongesa via Muene.

5 Yeni vangamba, ononokeni vamiene veni va hano ha mavu. Lingeni eci na mitima ya kasingimiko kavusunga, ngue vene mulina kupangela Kilistu. 6 Lingeni eci keti omo valina kumitalelela, muomu mutonda kuvuahesa ku mitima yavo, vuno honi na mitima yeni yoshe lingeni vije viatonda Njambi, ngue vangamba va Kilistu. 7 Lingeni vipangi vieni via vungamba nakujolela, ngue mulina kupangela Muene, keti ngue vantu. 8 Zivukeni ngueni Muene akafueta muntu na muntu, cipue ngamba cipue ua kupatuka, ha vipangi viendi viacili vianalingi.

9 Neni vamiene, lingeni naua cuma cimo kuli vangamba veni muku vapangesa muacili, keti muva teuese. Zivukeni ngueni yeni na vangamba veni muva voshe muli kuli Muene umolika ali muilu, uje kakele nacivembulu.

10 Hakumanusuila, koleseni muli Muene na mu nzili ya vukama vuendi. 11 Zaleni ku vitua vioshe vije Njambi namihana linga cimiasiuise mukukolesa mukulua na matumbe a Liyavolo. 12 Omo yetu kutuesi nakulua na vantu vuno honi tulina kulua na vimbembesi via nzili via mu vukambuila, na vaka kushika, na vaka nzili yakama na vinzili ya ha mavu ya milima. 13 Nankuma zaleni vitua vioshe via Njambi, ambahoni omo litangua lia vupi likeja cikamiasiuisa kuliohiela ku citozi kaha cipue muna manusula kuliohiela hanga mukemana ngoo.

14 Nankuma kaleni na kulivuahesela kaha likuteni vusunga ngue muiva mu vimbunda vieni. Zaleni kulongua cije cikeco cikapua ngue ntelo ya kuohiela vintulo vieni. 15 Zaleni mu vinkaku mukulivuahesela vualumo mukuambulula Muzimbu Uacili ua ciyulo. 16 Ntsimbu yoshe ambateni lutsilielo ngue ntelo. Omo yevi lika mukasa kuzima mivi ya tuhia ije yalina kuasha Satana. 17 Ambateni kuovoka kupua litepa lieni na lizi lia Njambi ngue mukuale uje uvanamihana ku Cimbembesi. 18 Lombeleni mu kulinga viuma evi, lombeni vukuasi kuli Njambi. Ntsimbu yoshe lombeleni ngue omo Cimbembesi mu cimituamenena. Mu cifua eci pueni vakuli vuahesela kaha keti muecele. Lombeleni ntsimbu yoshe ha vantu voshe va Njambi. 19 Nange naua munjikundikeko, linga Njambi anjihane mezi acili omo njihandeka linga njambulule nakusimpa na kusholola vushueke vua Muzimbu Uacili. 20 Njimu kakuimanena ua Kilistu linga njambulule ou Muzimbu Uacili cipue vene njili mu kamenga. Lombeleni linga njisimpe mu kuhandeka ngue mucina fuilamo.

21 Njili nakutuma kuli yeni Tatikikase muanetu ituazanga naua ngamba yetu uakulongua mu vipangi via Muene! Akamihana muzimbu uoshe uahali yanga muzivuke ngueni vati njina hindukilamo. 22 Omu mukemo njili nakumutuma kuli yeni, linga akamileke vati yetu voshe mutuna hindukila na kukolesa mitima yeni.

23 Njambi Tatetu na Muene Yesu Kilistu vahane kuli yeni vaka kutsiliela ciyulo na cizango mu kutsiliela. 24 Cikeketima ca Njambi cikale na voshe vaje vazanga Muene uetu Yesu Kilistu na cizango ca ku miaka yoshe.