1 Yange Paulu na Timateo, vangamba va Kilistu Yesu,

Ku vantu voshe vakulela va Njambi muli Kilistu Yesu vaje vali ku Filipi, hamo na vantuama na vakuasi va cikungulukilo:

2 Kavumbi na ciyulo vikale kuli yeni vije vihuminina kuli Njambi Tatetu na Muene Yesu Kilistu.

3 Njikatsantsela Njambi yange mu vintsimbu vioshe vije njikamivuluka. 4 Mu malombelo ange oshe hali yeni voshe, njikalombela na nzolela, 5 kutsantsela muje mutunapangela hamo mu vipangi via Muzimbu Uacili kuhuma ha litangua lia kulivanga nakuheta kulelo. 6 Cilivene njazivuka nguange uje uaputukile cipangi cacili muli yeni akacitualelelaho na kumamanusuilo ha litangua lia Yesu Kilistu. 7 Canjipande yange kuvua ngacije hali yeni voshe, muomu njamihaka ku mutima uange, muomu yeni voshe muli hamo nange mu kavumbi, mu vioshe, cipue njili mu kamenga, cipue mukuamena na mukukolesa ngoo Muzimbu Uacili. 8 Muomu Njambi ikeye mukaleho uange uje azivuka muje vati njimitonda yeni voshe na cizango cije cihuminina kuli Kilistu Yesu.

9 Kaha eli likelio lilombelo liange nguange cizango ceni citualeleleho mukukola cikuma, na mana nakumona ca vusunga, 10 linga muase kumona viacili nakupua vakulela nakuhona kapayo ha litangua lia Kilistu, 11 mukashula na vushuka vua vusunga vuje vukeja kuhitila muli Yesu Kilistu ku vumpau nakushangazala ca Njambi.

12 Njitonda yeni vamuanetu muzivuke ngeci vije vinalingiua kuli yange vinakuasa kutuala Muzimbu Uacili kulutue. 13 Ha cuma eci linga vaka kuniunga lipela na vantu voshe vazivuke ngeci njili mu kamenga muomu ya Kilistu. 14 Kaha vaka kutsiliela vavengi vanasimpi muli Muene muomu ya kukala cange mu kamenga, kaha vanakolesa cikuma mukuambulula lizi lia Njambi kuakuhona liova.

15 Vamo cilivene vambulula Kilistu na lifuua na vimpata, vuno honi vamo na cizango cacili. 16 Ava vakukotokela vacilinga muomu ya cizango, vazivuka ngeci yange vananjihaka mu kamenga muomu yakuamena Muzimbu Uacili. 17 Ava vakulivanga vambuluile Kilistu na cimbembesi ca kulihalesa, keti mu vusunga vuno honi valinakuyongola ngeci vavuezeleleko ku tuyando tuange muomu njili mu kamenga. 18 Nkuma vikahoni? Mu ngila yoshe, cipue mu kulikuisa cipue mu vusunga cakamalika valinakuambulula Kilistu, kaha ha cuma eci njivuahelela. 19 Cilivene, kaha njikavuahelela. Muomu njazivuka nguange kuhitila mu malombelo eni nakukuasa ca Cimbembesi ua Yesu Kilistu vikanjipatula. 20 Cizango cange cakama na kutsiliela cange ngeci kunjikevu shuamua vuno honi nakusimpa coshe hano na vintsimbu vioshe Kilistu vakamuhana kasingimiko mu muvila uange, mu kuyoya cipue mu kutsa cange. 21 Muomu kuli yange kuyoya cinapu Kilistu, kaha kutsa cinapu nganio. 22 Nga muono hanga ucikala mu muvila, kaha eci cilumbununa vipangi viacili hali yange. Kaha kunjizivuka honi vika vije vinjinapande kuhangula. 23 Vananjipalakana ku viuma evi vivali. Mashungu ange anapu kuya nakukala na Kilistu, eci cikeco cinahiana cikuma. 24 Vuno honi cakama cikuma muomu yeni, nga kunja ciyoya tahi. 25 Njazivuka muacili cuma eci, nankuma njazivuka nguange njikakala nakutualelelaho neni voshe, muomu yakuvuezelela ceni nakuvuahelela mu lutsilielo, 26 ngeci muli yange mukase kulihalesa kuje kuneha vumpau muli Kilistu Yesu muomu yakuija cange naua kuli yeni.

27 Kaha katumamesi keni mu vuyoye kapue lika kaseho ya Muzimbu Uacili ua Kilistu linga hamo njikeja nakumimona cipue hamo njiuahiko, njikovue nguavo muakolesa mu cimbembesi umo lika, na mana amo aje atsiliela noku noku muomu ya lutsilielo lua Muzimbu Uacili, 28 keti mukale na liova lia vitozi veni. Eci cikeco cimueso kuli vakevo ngeci mukavahiana, vuno honi kuovoka ceni cikeco cihuminina kuli Njambi. 29 Muomu vanamitumbuilaco nguavo muomu ya Kilistu, kumukatsiliela lika muli ikeye vuno honi naua mukayanda muomu yendi, 30 muomu neni naua mulinakuhita muvukalu vuje muamuene njakele navuo, honi vukevuo vene vuje vumuli nakuvua hanga njili navuo.