1 Nankuma nga kuli kulikolesa cimo muli Kilistu, kaha naua nga kuli nakuzembeleka cimo kuhuma ha cizango cendi, kaha naua nga muli nakulitombola cimo muli Cimbembesi, naua nga kuli na ngozi imo cipue nga kulitetela, 2 kaha shulisiseni kuvuahelela cange mukukala na mana amo, na cizango cimo, nakupua umo mu cimbembesi na mana amo. 3 Keti mulinge cuma cimo na viyongola via cipululu cipue nakulihalesa, vuno honi mu kulikehesa kaha ambateni vakueni mu vulemu kupulakana yeni vavenia. 4 Keti mukale lika kulivuahelesa yeni vavenia vuno honi lingeni vije vivuahelesa na vakueni naua. 5 Kaleni na mana aua mukati keni, aje anapu eni muli Kilistu Yesu:

6 Uje cipuevene uakele mu cifua ca Njambi,

vuno honi kayonguele kupua hamo na Njambi.

7 Vuno honi ualipuisile ikeye vavenia uakuhona seho,

ualiambatele ngue ngamba,

kaha uasemukile mucifua ca vuntu.

8 Muomu uakele mucifua ca vuntu, ualikehesele ikeye vavenia nakuononoka noho ku kutsa,

cipue vene ha kutsa caha cilindakano.

9 Nankuma, Njambi namujundula cikuma

nakumuhana lizina lije lili helu lia mazina oshe,

10 linga ha lizina lia Yesu livuli lioshe likatsikame,

muilu, na ha mavu, na muntsi lia mavu,

11 kaha na ndaka yoshe ikambulula nguayo Yesu Kilistu ikeye Muene,

ku vumpau vua Njambi Tate.

12 Nankuma, vacizango cange, ngue mu munononokelamo ntsimbu yoshe, nkuma hano honi, keti lika muomu njiliko vuno honi cikuma kuma nganjiuahiko, pangeleni kuovoka ceni na liova nakujujuka. 13 Muomu Njambi alinakupanga muli yeni, linga mukale na cizango nakupanga ha cipangi cendi cacili.

14 Pangeni viuma vioshe kuakuhona kulinienieta cipue vimpata, 15 linga mukapue vakuhona kapayo nakusambua, vana va Njambi vakuhona kapayo mukati ka cikota ca lizangamena na makuli. Hakati kavo mukaviakuma ngue vieke ha mavu, 16 muka kakateye ku lizi lia muono, linga ha litangua lia Kilistu njikalihalesa nguange nzili yange na vipangi viange kuviayile muangoco.

17 Cipue vene nga vanjitila ngue viakunua ha nkombelo yakukombelela lutsilielo lueni, njivuahelela nakujolela neni voshe. 18 Mumolika vene neni naua munapande kuvuahelela nakujolela nange.

19 Njatsiliela muli Muene Yesu kutuma Timateo kuli yeni vuavuno linga akunjivuahelese na muzimbu uakuhuma kuli yeni. 20 Kunjesi naueka uakulifua ngue ikeye, uje asa kushoshomua cihindu ceni. 21 Voshe vali nakulimuena vije vivatonda vakevo vavenia, keti vije viatonda Yesu Kilistu. 22 Vuno honi muazivuka vati Timateo muje muanalisholola vukaleho vuendi, ngue muje muana akapanga na ishe, mukemo muanapanga hamo nange mu Muzimbu Uacili. 23 Nankuma, njatsiliela kumutuma vuavuno nga viuma vikanjendela muacili. 24 Kaha njatsiliela muli Muene nguange nange naua vuavuno njija.

25 Njasinganieka nguange njinapande kumihiluisa Epafolonditusi kuli yeni, uje ikeye muanetu na mukuetu mutukapangela na mukuetu lisualale, ikeye kanganda keni na mukuasi ku vipangi viange. 26 Muomu ikeye uamitonda cikuma yeni voshe, kaha ou muntu nashoto mutima hakuvua ngeci yeni munazivuka ngueni navavalele. 27 Cilivene navavalele, nakutonda kutsa. Vuno honi Njambi nakala na cikeketima hali ikeye, keti lika hali ikeye vuno honi na hali yange naua, nakunjitetela linga keti njikale na vusiua ha vusiua. 28 Nankuma, njili nakutonda cikuma kumutuma linga muakuvuahelele omo muakumumona naua, ngeci nange naua keti njishote mutima. 29 Nankuma mutambuleni muli Muene na nzolela yoshe, nakuhana kasingimiko kuli vamala vangacije, 30 muomu natondele kutsila ha vipangi via Kilistu nakuhaka muono uendi muvukalu linga amanese vipangi vieni kuli yange.