1 Mukumanusula, vamuanetu, joleleni muli Muene. Kunjesi nashuamua yakusonekela kuli yeni viuma viakulifua, kaha eci cimikuasa yeni. 2 Litengeni kuli vaje vaka kulinga vupi, vaje tutali, litengeni kuli vaje vaka kunongesa muvila. 3 Muomu yetu tuapua vakulovoka va vusunga, vaje valemesa Njambi mu Cimbembesi, na vumpau muli Kilistu Yesu. Kaha kutue kutsiliela mu vuntu. 4 Cipue vene yange vavenia njili na cuma cakutsiliela mu vuntu. Nga kuli umo asinganieka nguendi ali na cuma ha kutsiliela mu vuntu, kaha yange njili na viavingi. 5 Vanjilovuele ha litangua lia mucitanu na atatu, yange njakundama ku vantu va Isaleli, muntu uaku muyati ua Mbenjemani, nji Kahevelu uakusemuka ku Vahevelu. Kaha ngue kuya ku lishiko yange nji Kafaliseo, 6 njakele na ntuima yakama mukupakesa cikungulukilo, ngue ku vusunga vua lishiko kuakuhonoua mulonga. 7 Vuno honi viuma vioshe via nganio vije njakele navio, njavitandele kupua viangoco muomu ya Kilistu. 8 Cilivene njilinakutanda vioshe kupua viangoco muomu ha seho yakama ya kuzivuka Kilistu Yesu Muene uange. Muomu yendi njinamono viuma vioshe kupua viangoco nakuvitanda viakuhona seho linga njinganiale Kilistu 9 nakukala muli ikeye, linga keti njikale na vusunga vuange lika vuje vuakundama ha Lishiko, vuno honi vuje vuahitila mu lutsilielo muli Kilistu, vusunga vuje vuhuminina kuli Njambi vuje vuakundama ha lutsilielo. 10 Linga njizivuke Kilistu na nzili ya kusanguka cendi, na kulipangela tuyando tuendi nakufua ngue ikeye mu kutsa cendi, 11 linga nga casiua hamo vaka njisangule ku vatsi.

12 Keti ngue nguavo njinahiana laja cuma eci cipue nguavo njinalele laja houe. Vuno honi njilina kutualelelaho linga njicipuise cange, muomu Kilistu Yesu nanjipuisa uendi. 13 Vamuanetu, kunjeku singanieka nguange njacipuisa cange, vuno honi cuma cimo njilinakulinga eci, kusuva viakunima nakutualelelaho na vije vilikulutue. 14 Njilina kutualelelaho lutue linga njiuane vuana vuje Njambi nanjisanena cikuma kuhitila muli Kilistu Yesu. 15 Yetu vaje tunakolo mu mana tunapande kukala na mana acifua eci, kaha nga mu vintsimbu vimo tusinganieka viakuliseza, kaha Njambi akacisholola naua kuli yeni. 16 Tuyeni lika tukakateye muavusunga kuli vije vitunauana. 17 Vamuanetu, lipandakaneni hamo mu kunjitemuinina, hakeleni mana kuli vaje vayoya ngue muje mutualingile yetu. 18 Muomu ngue muje munjamilekesele laja vintsimbu viavingi na hano vene njimilekesa naua honi na misozi nguange, yoyeni ngue vitozi va cilindakano ca Kilistu. 19 Mamanusuilo avo akapua akunonga, njambi yavo ikeye mazimo avo na vumpau vuavo vuli mu shuamua yavo, na mana akusinganieka via mavu lika. 20 Vuno honi yetu vukalo vuetu vuli muilu, kaha hali vukevuo tulina kuvandamena Musoyesi, ikeye Muene Yesu Kilistu, 21 uje akatengulula mivila yetu ya kutsa yakuzeya kupua ngue muvila uendi ua vumpau, na nzili ije ikamulingisa linga anehe viuma vioshe kuli ikeye vavenia.