1 Nankuma, vamuanetu, vaje vanjazanga nacishota mutima, nzolela yange na cilongo cange hanga vinemana ngoo muli Muene, vamuanetu vanjazanga. 2 Njilambelela Eundiya na Sintike linga valitavasane muli Muene. 3 Kaha njikulomba nove naua mutuapangela hamo ua vusunga, kuasa ava vampuevo muomu vanapanga cikuma hamo nange mu vioshe mu Muzimbu Uacili hamo na Kelementi na vaje voshe mutuapangelele hamo, vaje mazina avo ali mu livulu lia muono. 4 Joleleni muli Muene ntsimbu yoshe, naua njikahandeka nguange, joleleni.

5 Vantu voshe vazivuke kalemeso keni. Muene alimuyehi. 6 Keti mushoshomue ha cuma cimo, vuno honi mu vioshe ha lilombelo, kaha mu malombelo eni lombeni vije munajena kaha tsantseleni kuli Njambi mu mitima yeni. 7 Kaha ciyulo ca Njambi cije cipulakana kuvuisisa coshe, cikatulika mitima yeni na viyongola vieni muli Kilistu Yesu.

8 Mukumanusula, vamuanetu, vioshe vije viavusunga, na vioshe vije via kasingimiko, na vioshe vije viakuvuaha, na vioshe vije viakulela, na vioshe vije via cizango, na vioshe vije via kavumbi, nga kuli vucili, naua nga kuli vimo via seho kupulakana kushangala, kaha singaniekeni ha viuma evi. 9 Vioshe vije vimuna lilongesa nakutambula nakuivua nakumona muli yange, vilingeni kaha Njambi ua ciyulo akakala neni.

10 Njijolela cikuma muli Muene nguange honi kumamanusuilo kunjihakela mana ceni cinahinduka, cilivene muakele nakunjihakela mana vuno honi kumuakele na ntsimbu yakucimuesa. 11 Keti ngue nguavo munjihandeka evi kaha kuli vimo njinajena, muomu njinalilongesa, mu ngila yoshe njilimo, njinapande kupuisamo. 12 Njazivuka muje mucafua kukala mukujena, kaha njizivuka muje mucafua kukala na viavingi, muli vioshe na mu vintsimbu vioshe njinalilongesa vushueke vuakumona viavingi cipue njala, viavingi kupulakana cipue mukujena. 13 Njasa kulinga viuma vioshe kuhitila muli ikeye uje akanjikolesa. 14 Capuile ngozi yeni linga tulipangele tuyando tuange. 15 Yeni vene vavenia vaka Filipi muazivuka ngueni hambangelo ya Muzimbu Uacili, omo njahumine ku Masendoniya, nacimo cahi cikungulukilo calipandakanene nange mukuhana na mukutambula kuvanga lika yeni. 16 Muomu cipue vene mu Tesalonika muanjituminine vukuasi vintsimbu viavingi. 17 Keti nguavo njitonda vuana, vuno honi njitonda vushuka vuje vuvuezelela ku mbango yeni. 18 Njatambula fueto yakushula, na viavingi, njinapuisamo, ha kutambula vuana vuje vumuatumine kuli Epafolonditusi, vuje vua mulambu ua mazi akunika luengo luacili, ngue nkombelo ije yatambula Njambi nakuvuahela. 19 Kaha Njambi yange akamihana vioshe vije munajena kuya ku vufuko vuendi mu vumpau muli Kilistu Yesu. 20 Kuli Njambi yetu na Tatetu kukale vumpau miaka yoshe ya yaye! Ameni.

21 Vihindu ku vantu voshe vakulela va Njambi muli Kilistu Yesu. Vaka kutsiliela ava vali nange vanamihana vihindu. 22 Vantu va Njambi voshe kuno vanamitumu vihindu, cikuma kuma vaje vaku lipela lia Kayafase.

23 Kavumbi ka Muene Yesu Kilistu kakale na cimbembesi ceni.